Wojerecy (AK/SN). Evelin Graf dó­stanje Čestnu jehłu Güntera Petersa 2023 za wosebity čestnohamtski anga­žement we Wojerecach. Tole je wutoru měšćanska rada wobzamknyła. Počesćenje wotměje so 6. decembra.

Z tym počesći město mnohostronske iniciatiwy Evelin Graf. Wot lěta 2000 angažuje so wona w přiradźe města za zbrašenych a je mjeztym wjele lět jeje předsydka. W měsće zasadźuje so wona za wotstronjenje zadźěwkow předewšěm při busowych zastanišćach, we Wojerowskim dwórnišću a w zjawnych twarjenjach. Wot lěta 2019 skutkuje sobu w měšćanskej přiradźe za seniorow.

Hižo wot 2014 přisłuša Evelin Graf přiradźe Wojerowskeje měšćanskeje rady za serbske naležnosće, kotruž wona dźensa nawjeduje. W tutej funkciji zasadźuje so wona konsekwentnje za dwurěčne na­pisy při hasach a twarjenjach w měsće. Na wutrobje leži jej pokročowanje Witaj-projekta w Němčanskej pěstowarni „Pumpot“ a dalewjedźenje koncepta 2plus we Wojerowskej zakładnej šuli „Handrij Zejler“. W swojim modowym wobchodźe w starym měsće je ­Evelin Graf hižo časćišo serbske ­wokno we ­wobłuku žiweho adwentneho kalendra wuhotowała.

Před lětomaj stej spřećelenej mandźelskaj poraj staru šulu w Chrósće pola Wulkeje Dubrawy kupiłoj. Wot toho časa je so hižo wjele činiło, tež hdyž to wonkownje hišće widźeć njeje.

Chróst (UM/SN). Teren wokoło stareje šule w Chrósće je čisty. Ale twarske róšty při fasadźe njesteja. Tež hewak ničo na twarske dźěła njepokazuje. „To je tež normalne, wšako trjebamy za koncept a plany přetwara tajkeho twarjenja dosć chwile, prjedy hač móžemy twarić započeć“, prajitaj Christian Koker a Antje Vorwerk. Zhromadnje ze swojimaj mandźelskimaj Sylviu Koker a Jörgom Vorwerkom staj wonaj před dobrym lětom za wjes wu­znamne twarjenje kupiłoj. „Minjene měsacy smy wužili, zo bychmy swoje plany wuwili a ze zarjadnistwami wothłoso­wali“, Christian Koker rozłoži.

Dźěła na prózdninskich domach při Krabatowym młynje so nachileja

Čorny Chołmc (SiR/SN). Wětřik torha na twarskej foliji. Na kromje Čornochołmčanskeho Krabatoweho młyna knježi twarska atmosfera. A tola swědči ansambl prózdninskich domow hižo nětko wo tym, zo knježi tu wosebity duch. Nutřka w pjeć nowych domach wonja za drjewom a čerstwej barbu. Kóždy dom ma swójske mjeno. W „Lubosći k domiznje“ skića so hosćej swětły napohlad. Kachle su hižo zatwarjene. Hdyž tu prěni hosćo přenocuja, móža sej tež ­palne drjewo skazać a sej ze zatepjenymi kachlemi hišće rjeńšu atmosferu stworić.

Pěskecy (SN/MWj). Z wokrjesneje wustajeńcy rasowych nuklow minjeny kónc tydźenja w Großröhrsdorfje je so wjelelětny a nazhonity plahowar Achim Weclich z Pěskec z dobyćom wróćił. Ze štyrjomi ze swojich dołhokosmatych liškowych nuklow je 67lětny titul wokrjesneho mištra dobył. „Tajke dobyće ma za mnje jara wulku hódnotu, dokelž běchu plahowarjo z cyłeho wokrjesa zastupjeni“, po­wěda Pěskečan.

W Großröhrsdofje bě 60 wustajerjow z 370 nuklemi zastupjenych. Porno časej do korony wšak je to mało. Před lětami je so w Kamjencu wjace hač sto wusta­jerjow ze 710 nuklemi wobdźěliło. Při­wšěm so Achim Weclich nad swojim dobyćom wjeseli. „Jako plahowar so prócuješ, zo su wšitke twoje zastupjene nukle rjane a předpisam wotpowěduja. Hdyž maš jenož jenički trochu špatniši eksemplar pódla, hižo šansu na dobyće nimaš.“