Policija (16.05.24)
Wjacore awta zapalili
Kamjenc. W nocy wot wutory na srjedu su njeznaći tři awta na Lessingowym naměsće a na Stiftdróze w Kamjencu zapalili. Wobškodźenej buštej płót wokoło Lessingoweho muzeja kaž tež jězdnja. Škoda wučinja něhdźe 10 000 eurow.
Dalši wobchod w Rakecach?
Gmejna přihotuje do přichoda sahacy koncept za drobnowikowanje
Rakecy (JK/SN). Na swojim wčerawšim posedźenju přepoda Rakečanska gmejnska rada z wulkej wjetšinu hłosow nadawk za zdźěłanje koncepta za drobnowikowanje w gmejnje Hamburgskej firmje. Pozadk nadawka je, zo ma gmejna wotpohlad, na swojim teritoriju wjace nakupowanskich móžnosćow zarjadować. Kaž wjesnjanosta Swen Nowotny (CDU) radźićelam zdźěli, je so wjetše wikowanske předewzaće z wotpowědnej próstwu a poskitkom na gmejnu wobroćiło. Nowotny w tym wulku šansu hladajo na dalše polěpšenje wikowanskeje infrastruktury mjez Budyšinom a Wojerecami widźi. Z dalšim wikowanskim srjedźišćom móhli Rakecy w přichodźe wažny element za wobšěrne zastaranje ludnosće we wokolinje być.
Chcemy młodych k nam přiwabić
9. junija budu nimo wólbow do Europskeho parlamenta tež wólby gmejnskich a měšćanskich radow. Smy so w někotrych gmejnach wobhonili, što su tam w minjenych pjeć lětach docpěli.
Nětko je prawy čas w zahrodźe rostliny wšelakeje družiny ...
Město namjetuje serbsku přiradu
Kak měł gremij w přichodźe dźěłać? Wo tym je na poslednim posedźenju dźěłoweho kruha za serbske naležnosći při Budyskej měšćanskej radźe wčera šło. Tójšto rěči za to, zo dźěłowy kruh status změni a jako přirada dale skutkuje.
Budyšin (CS/SN). Budyski wyši měšćanosta Karsten Vogt (CDU) argumentowaše, zo njeje serbski dźěłowy kruh wobstatk hłownych wustawkow města. Přirada za wuwiće města pak tam zakótwjena je. Bychu-li dźěłowy kruh na přiradu přeměnili, móhł serbski gremij tež wobstatk hłownych wustawkow być. Rozsudy dźěłoweho kruha bychu potom bóle zawjazowaceho razu byli. Město dotalneje formulacije „Dźěłowy kruh poradźuje wyšeho měšćanostu“ měło wuprajenje „Přirada poradźuje měšćansku radu a wyšeho měšćanostu“ we Wustawkach města Budyšina wo spěchowanju serbskeje rěče a kultury stać.
Krótkopowěsće (16.05.24)
Słowakski premier stabilny
Bratislava. Strowotniski staw słowakskeho ministerskeho prezidenta Roberta Fica je po atentaće na njeho „stabilny, ale dale jara chutny“. Tole je zastupowacy ministerski prezident Robert Kaliňák dźensa słowakskej powěsćerni TASR prajił. Po informacijach chorownje su Fica pjeć hodźin operowali. Atentatnik bě wčera na 59lětneho třělał a jeho ćežko zranił.(Čitajće dale na stronje 2.)
Łužičana za prezidenta wuzwolili
Drježdźany. Twarski předewzaćel Uwe Nostitz z Bělšec je nowy prezident sakskeho foruma rjemjesła. 62lětneho twarskeho inženjera su wčera w Drježdźanach z jasnej wjetšinu hłosow za naslědnika Drježdźanskeho třěchikryjerskeho mištra Jörga Dittricha wuzwolili. Dittrich znowa kandidował njeje. Wón je mjeztym prezident Centralneho zwjazka rjemjesła Němskeje a wostanje wiceprezident w Sakskej, forum rjemjesła zdźěla.
Zrěčenje podpisali
Policija (15.05.24)
Elektriske nastroje pokradnyli
Kulow. W Nowej Wsy pola Kulowa su wobydlerjo w pódlanskim twarjenju jedneje ležownosće póndźelu popołdnju załamanje zwěsćili. Po zdaću běchu so njeznaći w nocy wot njedźele na póndźelu zadobyli a wšelake elektriske nastroje a graty pokradnyli. Wěcna škoda wučinja dohromady 25 eurow. Policisća su slědy zawěsćili. Wo dalše přepytowanja so nětko kriminalna słužba přisłušneho rewěra stara.
Fachowy dźeń
Budyšin. Budyska fachowa poradźowarnja swjeći lětsa swoje 25lětne a Budyski Dźěłowy kruh přećiwo seksualizowanej namocy swoje dźesaćlětne wobstaće. To je zarjadnišćomaj składnosć, fachowy dźeń na temu seksualizowana namóc mjez młodostnymi wuhotować. Zarjadowanje wotměje so jutře, 16. meje, wot 9 hodź. na Wysokej šuli Sakskeje policije w Budyšinje na Kantowej 25.
Na čitanje
Budyšin. Spisowaćelka Monika Maron čita pjatk, 17. meje, we 18.30 hodź. w Budyskim Antikwariaće při Tachantskej cyrkwi. Jeje romany wabja do diskusije. Wulkeho zajima dla je jenož hišće mało swobodnych městnow.
Z Romanom Knižku spominać
Budyšin. W Budyskim wopomnišću na Weigangowej 8a wuhotuje z Budyšina pochadźacy dźiwadźelnik Roman Knižka jutře wječor w 19 hodź. literarno-hudźbne čitanje. W geto Terezin su nacionalsocialisća wjace hač 140 000 židowkow a židow zajeli, mjez nimi mnohich wuměłcow. Swoje čitanja wěnuje Knižka twórbam wuměłcam, kotřiž su tam ćerpjeli.
Jubilej w Němskich Pazlicach
W Jenkecach wšědnje čerstwe jejka
Komunikacija dyrbi fungować
Njedosahace informacije wjedu k horcym diskusijam w gmejnskej radźe
Njeswačidło (JK/SN). Poslednje posedźenje Njeswačanskeje gmejnskeje rady aktualneje legislaturneje periody bě wospjet přewšo napjate. Po tym zo bě radźićelka Ramona Clauß próstwu zapodała, dnjowe dypki nastupajo reparaturu třěchi Njeswačanskeje zakładneje šule z dnjoweho porjada wuwzać a je na dnjowy porjad jednoho z přichodnych posedźenjow přestorčić, nasta kontrowersna diskusija. Radźićelka Clauß (Zjednoćenstwo towarstwow) wumjetowaše wjesnjanosće Gerdej Schusterej (CDU), zo je woprawdźity chutny staw třěchi šule radźićelam zamjelčał a zo chcyše krótko- dobnje wobzamknyć, reparaturu hišće w lěćnych prózdninach přewjesć. K tomu trěbnych 90 000 eurow mějachu so po měnjenju Schustera z inwestiwnych a klučowych připokazankow wokrjesa wzać. Dokelž nima gmejna hišće płaćiwy hospodarski plan za lětsa, móhła so suma w nim zaplanować.
