Z někotrejžkuli nowostku su mejemjetanja syły přihladowarjow přiwabili

Bukecy/Chrósćicy/Radwor (SN/FH/mj/jh/MiR/BŠe). Na mejemjetanje w Chrósćicach je so zašłu sobotu nimo 15 porow młodźiny tež 15 porow dźěći zakładneje šule a sydom porow w předšulskej starobje wobdźěliło. Wšitke holcy běchu sej narodnu drastu zwoblěkali. Mjez pěstowarskimi dźěćimi běštaj Matejo Paška a Luis Materne najspěšnišaj. Wonaj wu­zwolištaj sej Jete Wjelic a Amaliju Paškec za mejsku kralownu. Mejski kral zakładneje šule je Jurij Matka a mejska kralowna Lota Wjelic. Mjez młodostnymi bě ­sej Feliks Cyž najspěšnišo k mejskemu wjerškej doběžał. Za kralownu wuzwoli sej Verenu Suchec z Chrósćic. Běh wo mejskeho krala je so hišće při suchim wjedrje wotměł, bórze po tym pak dyrbjachu wšitcy dešća dla do stana přećahnyć. Kapała „Horjany“ je so wo dobru naladu postarała. Dźěći zarejowachu „Takle wjerćimy“, „Šewca“ a „Katyržinku“ a młodźina teptaše „Serbske koło“.