W SKI wudźěłki Jurja Wjesele wopytowarjow překwapjeja

Budyšin. (SN/HaJ). Wjace hač 50 wopytowarjow je minjenu póndźelu do Serbskeje kulturneje informacije (SKI) w Budyšinje přichwatało, zo bychu metalowe wudźěłki 74lětneho Ralbičana Jurja Wjesele wobdźiwali. Mała holčka majkaše zamyslena družču šnóru, sobudźěłaćerka muzeja zběhny hwěžku za pychu serbskeje katolskeje njewjesty do wysokosće a wuzběhny zmužitosć, drohotne wudźěłki tak blisko, jenož na blidach, bjez přidatneho škita prezentować. Starši muž kedźbliwje masiwny swěčnik zběhny a zwěsći, zo je ćežki. „To njeje jenož rjemjesło, to žno je wuměłstwo z metala“, němskorěčny wopytowar přispomni. „Mój Božo, što tutón čłowjek ze swojimaj rukomaj zdokonja“, so Serbowka dźiwaše. Hižo do narěče a programa SKI běchu młodźi a starši wopytowarjo zahorjeni, samo hnući a chwalachu móžnosć wuměłski aspekt metaloweho rjemjesła a nabožnu čućiwosć křesćanskich twórbow z metala wosobinsce zapřimnyć.

Róžant. Popłatki staršich za zawodowe wudawki Ralbičanskeje pěstowarnje budu jedna z temow přichodneho posedźenja gmejnskeje rady Ralbic-Róžanta jutře, štwórtk, we 18.30 hodź. w sydarni Róžeńčanskeho gmejnskeho zarjadnistwa. Dale zaběraja so radźićeljo z wustawkami wo zarunanju čestnohamtskeje dźěławosće a z wustawkami wo wotškódnjenju wohnjowych wobornikow. Nimo toho póńdźe wo plan potrjeby wohnjoweje wobory.

Campus na dwórnišću

Radwor. Staršiska iniciatiwa Radwor přewjedźe w druhim tydźenju nazymskich prózdnin na bywšim Radworskim dwórnišću nazymski campus. Mysleny je wón za šulerjow wot 1. lětnika. Wot 9. hač do 13. oktobra chcedźa so tam wšědnje wot 9 do 15 hodź. pod serbskim fachowym nawodom z přirodu a zwěrjatami w nazymje zaběrać, slědźić, eksperimentować, paslić, warić, pjec a wjele wjace. Přinošk płaći dźesać eurow na dźeń za zastaranje a material. Zajimcy njech přizjewja so pola Diany Mejnoweje pod telefonowym čisłom 035935/ 219 862 abo e-mailnje pod . Pjatk, 14. oktobra, přewjedu dźěłarničku za wudźenje. Městna pak su hižo wšitke wobsadźene.

Budyšin (CS/SN). Štóž chce sej wot klětušeho w Budyskej měšćanskej bibliotece knihi a druhe medije wupožčić abo dalše posłužby wužiwać, njebudźe to hižo darmotnje činić móc. Z jeničkim hłosawzdaćom je Budyska měšćanska rada na swojim zašłym posedźenju wobzamknyła, zo maja wužiwarjo biblioteki popłatk płaćić. Kaž nawodnica Marie-Theres Pyka rozłoži, su dotalne wustawki, po kotrychž bě wužiwanje darmotne, mjeztym 20 lět stare. W tym času pak su paletu poskitkow sylnje rozšěrili. Tak maja nětko wobšěrny online-poskitk a zajimcy móža tak mjenowane streaming-posłužby wužiwać. Tohodla změja dorosćeni wot januara 2024 popłatk 15 eurow wob lěto zapłaćić. Dźěći, młodostni, studenća a mějićeljo karty za čestnohamtskich budu biblioteku dale darmotnje wužiwać móc, rentnarjo pak porno tomu nic.

Zbožo w njezbožu měł

Kamjenc. Wichor je wčera wječor w Hornjej Łužicy wjacore štomy powalił a tak škodu načinił. Kedźbliweho jandźela pěstona měješe po wšěm zdaću šofer w Kamjencu. Wosrjedź jězby padny štom na jeho wosobowe awto. Kaž z dźiwom so muž njezrani. Zhorjelska policajska direkcija zliči w běhu dweju hodźin 13 zasadźenjow. Zwjetša dyrbjachu wohnjowi wobornicy štomy rumować.