Zahaja Krabatowy tydźeń
Wojerecy. Składnostnje zahajenja Krabatoweho tydźenja jutře, 29. septembra, před radnicu w starym měsće Wojerec dźěći z Němčanskeje pěstowarnje w 14.30 hodź. serbski program předstaja. W 16.30 hodź. móža wopytowarjo dźěćacu rejwansku skupinu Brětnja dožiwić. Tomu so w 17.30 hodź. Serbska ludowa rejwanska skupina Ćisk přizamknje, kiž tradicionelne młóćenje z cypami pokaza. Tež „připołdnica“ steji na programje – w kamishibai-dźiwadle. Při jewišću je stejnišćo župy „Handrij Zejler“. Rěčnaj motiwatoraj Marija Šołćić a Lucian Kaulfürst budźetaj z keramiku resp. dudami přitomnaj. Oficielne zahajenje přewjedźe wyši měšćanosta Torsten Ruban-Zeh (SPD) w 14 hodź. Krabatowy tydźeń budźe hač do 8. oktobra trać. Dalše informacije: .
Kupjel zawrjena
Kamjenc. W Kamjenskej halowej kupjeli dyrbja w nazymskich prózdninach nuznje trěbne reparatury přewjesć. Tohodla wostanje kupjel wot póndźele, 2. oktobra, hač do njedźele, 15. oktobra za zjawne płuwanje zawrjena. Sawna hodźi so w tym času we wobmjezowanej měrje wužiwać, a to wot póndźele do pjatka stajnje wot 12 do 22 hodź. 3. oktobra wostanje sawna zawrjena.
Policija (28.09.23)
Plantažu konopje namakali
Hermsdorf. Pódla awtodróhi A 4 pola Hermsdorfa su wobydlerjo póndźelu plantažu konopje namakali a policiju informowali. Zastojnicy zwěsćichu na to 250 tajkich rostlin na kromje pola ze słónčnymi róžemi. Kriminalna policija pad přepytuje.
Bjez dołha do přichoda
Gmejna přewozmje techniku a nastroje sportoweho towarstwa
Trjebin (AK/SN). Prawniski dohladowanski zarjad Zhorjelskeho wokrjesa je gmejnski etat za lěto 2023 schwalił – to zhonichu gmejnscy radźićeljo na njedawnym posedźenju gmejnskeje rady w Trjebinje. Tamniša komornica Dana Piehl předstaji mjezyrozprawu financow. „Naša gmejna njeje zadołžena. Wjetše kredity nochcemy brać. Byrnjež přichod jenož ćežko posudźować móhli, zwažu sej prajić: Naša financielna situacija je stabilna, smy we wšěch wobłukach po planje“, podšmórny wona. Hladajo na dochody je gmejna dohromady 2,4 miliony eurow zaplanowała, wot toho je dotal 770 000 eurow dóšło. Nastupajo wudawki kalkuluje komuna lětsa z cyłkownje 2,7 milionami eurow – z toho je dotal 900 000 eurow wudała.
Wosobinski serwis digitalnje
Malešecy (SN/MWj). Wot swojich dohromady 21 wotnožkow je Budyska wokrjesna lutowarnja dotal dźesać z tak mjenowanym widejowym serwisom wuhotowała. Wot spočatka oktobra so dalša w Malešecach přidruži.
Widejowy serwis zwjaza wosobinske poradźowanje z digitalizowanjom, kaž lutowarnja zdźěli. Wužiwa-li wopytowar widejowy serwis we wotnožce, nastanje z pohibowanskim sensorom abo wotpowědnym kneflom zwisk do centrale. Sobudźěłaćerka abo sobudźěłaćer so wosobinsce na wobrazowce zjewi, móže so z kupcom rozmołwjeć a jeho přeća wobdźěłać, runje tak kaž by to direktnje při woknješku činił. Identifikować dyrbi so wopytowar z wupokazom a swojej ec-kartku. Dźakowano zatwarjenej kamerje hodźa so trěbne podłožki hnydom w Malešecach zascannować a do Budyskeje centrale pósłać. Na wobrazowce kupc wšitke wuslědki hnydom widźi a móže podłožki hnydom podpisać.
Z wjacorymi tydźenjemi zapozdźenja su na městnje bywšeho hosćenca ...
Do kolebki Witaj-hibanja
Centrum logistiki wotpokazali
Planowany centrum logistiki w Sćijecach njebudźe – Budyska měšćanska rada je wčera ze 16 hłosami wulkoprojekt wotpokazała, jenož 14 radźićelow je z „haj“ wothłosowało.
Budyšin (CS/SN). Namjet CDU, tajnje wo zwadnej naležnosći wothłosować, drje wjetšinu nadešoł njeje. Ale centrum logistiki tohorunja nic, tohodla su přitomni wobydlerjo měšćanskeje štwórće sprjewineho města po posedźenju změrowani domoj šli. Do toho su w hodźince za prašenja wobydlerjow swoje wulke wobmyslenja jasnje zwuraznili. Tak praješe Clemens Kowolik, zo by přidatny wobchad nakładnych awtow cyłe město wobćežowało. Wočakowanje inwestora, zo bychu truckerojo jeničce wotjězd awtodróhi Słona Boršć wužiwali, je po jeho měnjenju iluzoriske. Z wida ludźi je jenož wobškodźenje měšćanskich dróhow wěste, nic pak wužitk z přemysłowym dawkom. Ležownostny dawk za areal wučinja maksimalnje 150 000 eurow.
Žony a mužojo zhromadnje za runoprawosć
Ćisk (AK/SN). We wobłuku interkulturelnych tydźenjow w Budyskim wokrjesu wobjednawachu wčera ze zetkawanskim wječorom na Ćišćanskim dworje temu „So zmandźelić abo wudać: Tradicija a nowozapočatk.“ Organizatoraj zarjadowanja běštej Kulturne towarstwo Ćisk a wobydlerski zwjazk Wojerecy pomhaja z wutroby.
Něhdźe 25 zajimcow, reprezentowacych šěsć kulturow, bě w Ćisku. Zhromadna kurdiska kwasna reja bě wobdźělnikam ze składnosću, so mjez sobu zeznać. Mjez nimi bě tež zamołwita za runostajenje města Wojerecy Korina Jenßen.
W fokusu stejachu žeńtwa a nućena žeńtwa, intimnosć a seks do mandźelstwa, wotehnaće, amputacije dźělow genitalijow a dalše brizantne prašenja. Njenanuzowani rysowachu wobdźělnicy swój kulturno-nabožny runje tak kaž wosobinski wid. „Wažne je, zo nas zeznawaja. A zo rěčimy mjez sobu na samsnej runinje“, měnješe Khabat Ibo, kurdiski Syričan a předsyda towarstwa migrantow Immigrants Network Wojerecy.
Krótkopowěsće (28.09.23)
Wjetšina pře nowy móst
Budyšin. Wothłosowanje wo planowanym nowym mosće za pěškow nad Sprjewju w Budyšinje je zakónčene. Snadna wjetšina 56 procentow dohromady něhdźe 5 500 wothłosowacych projekt wotpokaza. Woprašowanje njeje reprezentatiwne a tuž njezawjazowace, ma pak „Budyskej měšćanskej radźe nastupajo rozsud wo twarje pomhać“.
Do wuchodneje Belgiskeje
Njebjelčicy/Brüssel. Pod temu „Wot Europy a regionow wuknyć“ je so dźensa rano 28 čłonow Serbskeho sejma kaž tež dalši zajimcy z busom na štyridnjowsku ekskursiju do Brüssela a k Němskemu zhromadźenstwu we wuchodnej Belgiskej podało. Program je Załožba Slavonic Europe zestajała. Tak planuja za jutře zetkanje z prezidentom wuchodobelgiskeho parlamenta, Charlesom Servatym.
Natwarja wosebitu powjaznicu?
Policija (27.09.23)
Padustwu zadźěwał
Niska. Sobudźěłaćer wagonownje w Niskej je na zawodnej ležownosći póndźelu rano paducha lepił. Wón informowaše hnydom policiju. Při přepytowanju skućićela namaka wona nimo metaloweho šrota w hódnoće 500 eurow tež mjeńše mnóstwo konopeje.
Statny škit pyta swědkow
Cyžecy. W zwisku z widejom w socialnych syćach, w kotrymž su młodostni wospjetnje z hitlerskim postrowom na oktoberskim swjedźenju w Cyžecach widźeć, je nětko decernat statneho škita přepytowanja přewzał. Za to pyta nadal swědkow.
