Krótkopowěsće (20.09.23)
17 namjetow mytowanych
Budyšin. W lětušim wubědźowanju idejow „Rěč zwjazuje. Rěc zwězujo. Sorbisch verbindet“ je jury 17 namjetow mytowała. Kaž Załožba za serbski lud wčera zdźěli, je hač do 25. julija 50 požadanjow dóšło. Mytowanske zarjadowanje budźe 17. nowembra w Budyšinje. Tam zhonja wuznamjenjeni tež wo wysokosći swojeho myta. Přehlad mytowanych namakaće pod .
Wuwzaćna dowolnosć móžna
Drježdźany. Sakska wuwólnja dotalny zakaz w boju přećiwo afriskej swinjacej mrětwje. W postajenym zawrjenym pasmje II, to je najbóle wohrožena kónčina, móža plahowarjo pod wěstymi wuměnjenjemi wuwzaćnu dowolnosć dóstać, zo bychu domjace swinje pod hołym njebjom plahowali. Krajna direkcija Sakskeje je za to płaćiwy powšitkowny wukaz wotpowědnje změniła.
Chmjelarstwo w zapisu UNESCO
Plahowanje ekstremow – kóždy dźeń dračina
Nic jenož na wsach, ale tež w městach maja mnozy domjacy skót. Něchtóžkuli nimo toho drobny skót plahuje. Wšitcy so wo strowotu swojich dwu- abo štyrinohatych lubuškow prócuja. K tomu přinošować chce naša serija z pokiwami z weterinarneje mediciny. (15)
Dźeń a bóle diskutuje so w towaršnosći wo tak mjenowanym plahowanju čwělow (něm.: Qualzuchten). Při tym njejedna so wo fachowy wuraz wosebiteje rasy zwěrjatow, ale je to wobwinowace wuprajenje, kotrež zjima wěste načasne rasy a družiny, hdźež genetika ćělne brachi wuskutkuje. Jedna so wo psy a kóčki a dalše zwěrjata, kotrež su intensiwnje plahowane, zo by so wosebita kajkosć ekstremnje wuwiła. Tak plahuja ludźo dakle snadneje wysokosće, z krótkimi nohami a dołhim chribjetom. Kajkosće su plahowarjam wažne, zo by dakl na hońtwje wužitny był, wosebje hdyž dyrbi přez niske kerki běhajo dźiwinu do praweho směra honić.
Za žně bě najwjetši čas
K jubilejej Jurja Słodeńka
Budyšin. Literarny wječor składnostnje 150. posmjertnych narodnin Jurja Słodeńka wotměje so štwórtk, 21. septembra, w 19 hodź., w Budyskej Smolerjec kniharni. Tam přednjesu čłonojo Towarstwa přećelow Smolerjec kninarnje někotre z „Wobrazow ze wsy“, kotrež je Słodeńk w 1920tych a 1930tych lětach w Serbskich Nowinach wozjewił. Wšitcy zajimcy su wutrobnje přeprošeni.
Statnu dróhu ponowja
Zejicy. Na statnej dróze S 100 dyrbja so šoferojo wot přichodneho tydźenja na poćeženja wobchada nastajić. Kaž Budyski krajnoradny zarjad zdźěli, chcedźa na wotrězku wot Zejic do Lejna kaž tež w Zejicach samych jězdnju ponowić. Twarske dźěła maja w pjeć wotrězkach wot 25. septembra hač do 30. oktobra trać. W tym času rjaduja wobchad z amplu.
Policija (19.09.23)
Muža na hawbje sobu wzał
Budyšin. Dokelž přejara nalěwo jědźeše, je njedźelu popołdnju na Budyskej Kamjentnej slěbrobarbny BMW napřećo přijěducy VW šmórnył a wobškodźił. Zawinowar pak dale jědźeše, tuž spěchaše sobujěducy z VWja pěši za BMWjom a jón při přichodnej ampli dosćahny. Dokelž šofer při zelenej swěcy dale jědźeše, skoči muž na motorowu hawbu a něhdźe 30 metrow sobu jědźeše, doniž njewotskoči. Při tym so wón zrani.
Witana podpěra
Drohotne wopisma zachowaja
W diecezanskim archiwje móža pilotowy projekt přewjesć
Budyšin (SN). We wobłuku pilotoweho projekta dóstanje diecezanski archiw Drježdźansko-Mišnjanskeho biskopstwa w Budyšinje 18 000 eurow za zawěsćenje drohotnych historiskich wopismow a dalšich dokumentow. Nawodnica archiwa dr. Birgit Mizscherlich so wjeseli, zo móža nětko dźěl swojeho wobšěrneho wobstatka fachowsce zawěsćić. „Z tutej podpěru a ze swójskim podźělom biskopstwa móžemy nětko započeć, něhdźe 240 našich cyłkownje něhdźe tysac wuznamnych wopismow rjedźić, zrunać a po potrjebje restawrować“, nawodnica rozłoži. Dotal su originalne dokumenty – zdźěla wjacore razy fałdowane – w papjerjanych wobalkach z 19. lětstotka chowali. W přichodźe maja so wone tak składować, zo so předewšěm fałdowana kroma skóncować njemóže.
Najnowše frizury a trendy předstajili
Kóždy čłowjek dyrbi w mjeńšich abo wjetšich wotstawkach k frizerej chodźić. Zo móhli frizerki a frizerojo swojich kupcow derje posłužować, so
wo najnowšich trendach wobhonjeja. Jedna składnosć bě njedźelu we Wojerecach.
Wojerecy (KD/SN). Zjednoćenstwo frizerkow a frizerow Budyskeho wokrjesa je předwčerawšim we Wojerowskej Łužiskej hali swojim čłonam najnowše frizury za žony a muži předstajiło a jim nowe trendy rozłožiło. Něhdźe 150 zastupjerjow frizerskich salonow wot Wósporka hač do Ottendorfa a wot Załomja hač do Halštrowskeje Hole stej wyša mišterka Szilvia Schiffel a jednaćelka Budyskeje rjemjeslniskeje komory Sabine Gotscha- Schock witałoj. Frizury předstajili su sobudźěłaćerki Wojerowskeho salona „Haarschneider“.
