Krótkopowěsće (04.04.24)
Pozicija ministra wobkrućena
Drježdźany. Pobrachowacy fachowcy we Łužicy su problem, na kotryž je sakski minister za regionalne wuwiće Thomas Schmidt (CDU) hižo dlěši čas skedźbnił. Hdyž so nětko ifo-institut kaž tež zastupjerjo industrijneje a wikowanskeje komory njedostatka fachowcow boja, to poziciju ministra wobkrući. Změna strukturow žada sej nimo nowych dźěłowych městnow tež inwesticije do mjechkich faktorow stejnišća, rjekny Schmidt.
Łužiska akademija přichoda
Lubnjow. Druhu Łužisku akademiju přichoda wuhotuja wot 7. do 12. julija w konferencnym centrumje LEAG w Lubnowje. 50 młodych ludźi změje tam šansu, so do swěta wobnowjomnych energijow z diskusijnymi kołami, dźěłarničkami a wulětami zanurić. Zajimcy w starobje 18 do 27 lět z Braniborskeje, Sakskeje a Berlina móža so hač do 30. apryla přizjewić. Prěnja akademija běše loni.
Pakt wohroženych městow
Na jutrowne spěwanje dopominali
Ryby pola skótneho lěkarja
Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich lubuškow prócuja. K tomu přinošować chce naša serija z pokiwami z weterinarneje mediciny. (29)
Tak kaž w trikowych filmach, hdźež sedźi hólc ze škleńcu wody, w kotrejž rybička płuwa, w čakarni skótneho lěkarja so přepytowanje a hojenje rybow přez lěkarja wězo njewotměwa. Skótneho lěkarja skerje k rybam wołaja, jeli schorja jědźne ryby w plahowanskich hatach abo zawodach. Wšako přenjesu so tež w raju rybow bakterije abo wiry, kotrež zamóža w najhóršim padźe wšitke ryby jedneje družiny inficěrować.
Wosebite kliniki a eksperća su so za chorosće rybow specializowali a poskićeja informaciske zarjadowanja, kaž tež kontrolne wopyty zawodow plahowanja jědźnych rybow.
Policija (03.04.24)
Transporter do Lkw-ja zrazył
Hamor. Při wobchadnym njezbožu blisko Hamora bu wčera popołdnju wodźer transportera ćežko zranjeny. 48lětny bě ze swojim jězdźidłom na zwjazkowej dróze B 156 z dotal njeznateje přičiny na napřećiwnu jězdnju zajěł a na njej frontalnje do nakładneho awta zrazył. Njezbožo sta so z tajkim wotmachom, zo so wobě jězdźidle do přirowa sunyštej. Nimo toho su dźěle transportera a Lkw-ja dalšej awće wobškodźili. Helikopter dowjeze zawinowarja njezboža do chorownje. Dróhu dyrbjachu nachwilnje zawrěć.
Swědkojo zańdźenosće lětstotka
Njeswačidło. 52. wosebitu wustajeńcu Njeswačanskeho domizniskeho muzeja „1890–1990 swědkojo zańdźenosće“ su ćichi pjatk popołdnju wotewrěli. Hač do jutrowneje póndźele wopyta ju nimale sto zajimcow. Přehladka je přewšo wjele zajima zbudźiła, pokaza dźě wona z něhdźe 200 eksponatami wuwiće a podawki Njeswačidła we wonym času.
Na sćěnach wisaja někotre mólby z motiwami ze wsy, kotrež su wjesnjenjo za wustajeńcu wupožčili. W prěnjej wulkej witrinje so z pokazkami wo wsy na něhdźe 30 fotach pokročuje. Wuhladaš tam prěnju pohladnicu wo Njeswačidle ze štyrjomi kolorěrowanymi motiwami kaž Stary hród. Wona je z lěta 1890. Njeswačan je ju tehdy znatemu pósłał. Druha witrina pokazuje něhdyše twarjenja ze wsy, kotrež hižo njewuhladaš, dokelž buchu kónc apryla 1945 při ćežkich wojowanjach zničene a po tym hižo znowa njenatwarjene. Něhdźe 75 procentow twarjenjow bu tehdy zničenych.
Něhdźe 400 křižerjow je wčera na dźakne kemše do Róžanta ...
Porjedźenka
Krótkopowěsće (03.04.24)
Hódnoty běchu jutry přewysoke
Drježdźany. Njewšědne wjedrowe zjawy su minjeny jutrowny kónc tydźenja wobwliwowali, zdźěli wčera sakski wobswětowy zarjad. Njejasne njebjo je nimo procha z pusćiny Sahara tež mikroproch zawinował. Koncentracija procha bě na měrjenskich stacijach minjenu sobotu a njedźelu dnjowu hódnotu 50 mikrogramow na kubikny meter překročiła.
Prawidła spěšnišo předźěłać
Podstupim. Braniborski hońtwjerski zwjazk sej žada, zo maja so prawidła za zatřělenje problematiskich wjelkow spěšnišo předźěłać. „Zatřělenje wjelkow, kotrež su škody zawinowali, dyrbi rutina być“, wuzběhny jednaćel zwjazka Kai Hamann. Mjeztym drje je braniborske knježerstwo postajenja přeměriło, naćiski pak hišće we wuběrkach krajneho sejma wobjednawaja.
Aziatiski šeršeń so rozpřestrěwa
Z kmótřiskej całtu so zaběrali
Policija (02.04.24)
Bijeńca před hosćencom
Šunow. Po informacijach Zhorjelskeje policajskeje direkcije je w nocy na póndźelu před Šunowskej Fabrikskej hospodu k tak mjenowanemu zhromadnemu zranjenju ćěła dóšło. Skupina něhdźe wosom njeznatych je so něhdźe w 3 hodź. k hosćencej podała a z někotrymi hosćimi rozkoru započała. Spočatnje werbalne rozestajenje wuwjercholi skónčnje w bijeńcy, při kotrejž třoch młodostnych w starobje 18 do 21 lět zranichu, dweju z nich ćežko. Wuchowanska słužba dowjeze jeju do chorownje. Skućićeljo so do njeznateho směra zhubichu. Wo jich motiwje policiji dotal ničo znate njeje. Policija pad přepytuje a prosy wobydlerjow wo pomoc. Swědkojo, kotřiž su bijeńcu abo do toho werbalne rozestajenje wobkedźbowali, abo kotřiž móža snano pokiwy k podhladnym skućićelam podać, njech přizjewja so na Kamjenskim policajskim rewěrje pod telefonowym čisłom 03578 3520 abo na kóždym druhim policajskim rewěrje.
