Jónkrótne hrajkanišćo přepodali
Prózdninska rozmołwa z wuměłcom
Telemedicina garant zastaranja
W Braniborskej maja nowy koncept mediciniskeho zastaranja ludźi. Tak mjenowana telemedicina ma tam falowacym lěkarjam wotpomhać. Je to model přichoda?
Choćebuz (SN/MG). Zwjazkowe strowotniske ministerstwo ma telemedicinu jako přichod lěkarskeho zastaranja we wjesnych kónčinach. Z pomocu digitalnych nastrojow a komunikaciskich srědkow móža lěkarjo tak, byrnjež při pacientach njebyli, diagnozy stajić, rozmołwy wjesć a pacientow w nuzowych padach zastarać. Za to dadźa lěkarjo potom nuzowym sanitetarjam instrukcije.
We Łužicy spěchuje so tajki wutwar telemediciny nětko w štyrjoch wokrjesach: Dubja-Błóta, Łobjo-Halštrow, Hornje Błóta-Łužica a Sprjewja-Nysa. Tež město Choćebuz profituje wot pjenjez. Cyłkownje 650 000 eurow wučinja cyłkowny financielny ramik. Z pjenjezami chcedźa wšitke nuzowe jězdźidła z tabletami a wotpowědnej software wuhotować.
Njejasny status Ralbičanskeho teritorija wjelkow
Wuchodna Sakska wostanje kónčina, w kotrejž sydli wjetšina wjelkow w Swobodnym staće Sakskej (Serbske Nowiny informowachu). Dotal su 41 wjelčich teritorijow w Sakskej wobkrućili, kaž Krajny wobswětowy zarjad w Drježdźanach na zakładźe nachwilnych wuslědkow lětušeho monitoringa wjelkow zdźěli.
Drježdźany (SN/at). We wuchodnej Sakskej su najwjetšu dynamiku nastupajo wutworjenje, přesunjenje a zhubjenje wjelčich teritorijow zwěsćili. Nowej stadle stej so w južnym dźělu Zhorjelskeho wokrjesa, w Kotmarskim a Knježnjacym lěsu, wutworiłoj. Na sewjeru wokrjesa je so kónčina Rychwałd přidružiła. Runočasnje njejsu wjelče teritorije Minakał, Tautewalde a Linz blisko Kinsporka w Budyskim wokrjesu kaž tež Trjebuz (Trebus) sewjernje Niskeje znowa dopokazać móhli. Dokelž su so stadła zhubili, dóńdźe k tomu, zo so druhe, hižo wobstejace teritorije přesunychu. K tajkim słušatej teritorijej Dubc II a Nowowjesčanska (Noeser) hola pola Rózborka, kotrejž stej w monitoringowym lěće 2023/ 2024 hromadźe rostłoj. Njejasne je tuchwilu hišće status Ralbičanskeho teritorija.
Krótkopowěsće (24.07.24)
Dźeń industrijneje kultury
Zły Komorow. Druhi dźeń industrijneje kultury swjećitej Turistiska syć industrijna kultura Braniborskeje a zwjazk muzejow kraja 10. awgusta. Wotewrjenske zarjadowanje budźe w historiskej zběharni łódźow w Niederfinowje składnostnje jeje 90lětneho wobstaća. 29 městnosćow w Braniborskej a Sakskej na wopyt přeprošuje. Mjez nimi su Picnjanski muzej hětnistwa a rybarstwa, Elektroporclinowy muzej Wulka Dubrawa a Wojerowski Zusowy kompjuterowy muzej.
Wuslědki wostanu stabilne
Drježdźany. 95 procentow wšěch šulerkow a šulerjow w Sakskej je lětsa swoje zakónčace pruwowanja wuspěšnje zmištrowało. Loni bě jich 96 procentow. Přerězna abiturna znamka je lětsa 2,18. Znamki wostanu tak w cyłku stabilne. Wjetšich dalšich chabłanjow hladajo na wolene pruwowanja a wuslědki tež njeje.
Korejčenjo natwarja milinarnju
Policija (23.07.24)
Bróžnja so wotpaliła
Radšow (Groß Radisch). W Radšowje blisko Wysokeje Dubrawy mějachu zastojnicy wohnjoweje wobory kaž tež policije sobotu w nocy ruce połnej dźěła. Z dotal njeznatych přičin je so ratarska mašina, kotruž běchu wobsedźerjo na kóncu žnjenskeho dnja w bróžni wotstajili, zapaliła. Woheń so jara spěšnje wupřestrěwaše. Bórze palachu so w bróžni wotstajeny připowěšak a wosobowe awto kaž tež twarjenje same. Wšitko so wohenja dla zniči. Fachowcy trochuja sumu škodow na něhdźe 300 000 eurow. Přepytowar policije hišće za přičinu wohenja slědźi.
Do wikow za twaršćizny so zadobyli
Budyšin. Njeznaći skućićeljo su so sobotu na dotal njeznate wašnje do twarskich wikow při Delnjokinjanskej dróze w Budyšinje zadobyli. Jednoho z nich nadeńdźe sobudźěłaćer wěstotneje firmy a informuje policiju. Najebać spěšnych pytanskich naprawow, poradźi so paducham ćeknyć. Hižo nahromadźene a składowane rubjenstwo w cyłkownej hódnoće 5 500 eurow pak njejsu sobu wzać móhli.
Naprašowanje wokrjesa
Budyšin (SN/MiP). Jónu w měsacu dóstawaja wobydlerjo wokrjesny žurnal „Von Zeit zu Zeit“ do póstoweho kašćika. Wot toho časa, zo wokrjesne zarjadnistwo swoje hamtske informacije w interneće wozjewja, njeje wudaće tajkich informaciskich nowinow hižo winowatostny nadawk. Zo by dokładniši přehlad měło, hač a kelko ludźi wokrjesny žurnal čita, je Budyske wokrjesne zarjadnistwo reprezentatiwne naprašowanje přewjedło. Něhdźe 400 wosobow je so wobdźěliło. Wuslědk běše pozitiwny. Žurnal je do wjetšiny domjacnosćow dóšoł, 85 procentow naprašowanych jón rady čita.
Zdobom je zarjadnistwo naprašowanje z pohódnoćenjom swojeho dźěła zwjazało. Něhdźe 81 procent naprašowanych je z dźěłom zarjada spokojom. „Wuslědk mje jara wjeseli. Na druhim boku je mje překwapiło, dokelž sam skerje zdźělenki dóstanu, hdyž něšto w porjadku njeje“, přispomni krajny rada Udo Wićaz (CDU).
Módroćišć nawuknyć
Choćebuz. Pod hesłom „Direktny śišć à la módrośišć“ přeprošuje Serbski muzej w Choćebuzu wšitkich młodych a staršich zajimcow na dźěłarničku do swojich rumnosćow na Młynskej dróze 12. Ličba wobdźělnikow je wobmjezowana. Organizatorojo proša wo přizjewjenje pod čisłom: 0355-794930. Kursy dźěłarnički wotměja so 1. awgusta, wot 10 do 11 hodź. kaž tež wot 14 do 15 hodź. za dźěći a swójby a wot 15.30 do 17 hodź. za dorosćenych.
Bibliske dny za dźěći
Slepo. Wot 29. do 31. julija zarjadujetej Slepjanska ewangelska wosada a hort tamnišeje zakładneje šule „Dźěćace bibliske dny“ na bibliskim hrajkanišću farskeje ležownosće na Měrowej čo. 68. Hłowna tema dnjow je fascinowaca, napjata stawizna wo Józefje a jeho bratrach, kotraž ma zbožowny wukónc z wujednanjom. Přeprošene su wšitke dźěći w starobje wot 6 do 12 lět. Přinošk za wobdźělenje na třoch dnjach je dohromady pjeć eurow. Přizjewjenja su pod tel. čo. 035773-76211 abo z mejlku na móžne.
Na molowansku dźěłarničku
Swětowy dźeń rangera
Posledni króć wuradźowali
„Stara“ gmejnska rada w Hamorje z wobzamknjenjomaj dźěło zakónčiła
Hamor/Delni Wujězd (CK/SN). W mnohich komunach maja měšćanscy a gmejnscy radźićeljo tuchwilu lěćnu přestawku. Nic pak w Hamorskej gmejnje. Jich radźićeljo zetkachu so zašły tydźeń posledni króć w zestawje, w kotrejž běchu woni zašłych pjeć lět zhromadnje skutkowali. Na idyliskim Sprjewinym hrodźiku w Ludowym parku wjesneho dźěla Delni Wujězd je kóždy radźićel mały dar přijał. Mjez druhim tež magacin gmejny. Tón poda přehlad wo tym, što je so w zašłych pjeć lětach wšitko poradźiło a što so radźiło njeje.
Najebać wosebitu přiležnosć posedźenja mějachu radźićeljo dnjowy porjad dodźeržeć a spjelnić. Tak su jednohłósnje nastajenje wudospołnjenskich wustawkow za ležownosć we wjesnym dźělu Wochozy wobzamknyli. Kónčina leži we wonkownym wobłuku, tak zo njeby wobtwarjenje dowolene było. Tuž dyrbjachu po wuprajenju nawodnicy twarskeho zarjada Cortiny Kokles naprašowanja zajimcow za twarjenjom wotpokazać. Z wustawkami chcedźa nětko wuměnjenja za wupokazanje twarskeju ležownosćow wutworić.
