W Kubšiskej gmejnje wjedźe Budyski wokrjes wulkej hižo zahajenej twarskej předewzaći dale. Loni zakónčeny projekt je gmejnu po wšěm zdaću před wjetšimi škodami zachował.

Kubšicy (UM/SN). Lěto 2024 steji w Kubšiskej gmejnje cyle w znamjenju prócowanjow, zahajene twarske projekty dale wjesć. Předewšěm wěnuja so při tym dróhotwarstwu a zastaranju z pitnej ­wodu. „Na našim gmejnskim teritoriju mamy cyły rjad twarskich projektow, ­kotrež wjacore lěta traja a na kotrychž smy jako gmejna wobdźěleni“, rozłoži wjesnjanosta Olaf Reichert (njestronjan).