Na synje přenocować
Helmec swójba w Jitku móže skónčnje swoje plany zrealizować
Jitk (UM/SN). Wobhospodarjer Krabatoweho statoka w Jitku Sven Helm je wjesoły, wšako móže nětko z twarskimi dźěłami za dawno planowany natwar „synoweho hotela“ započinać. „Planowanske zadźěwki za twar hotela smy wotstronili“, wón praji.
W lěće 2022 běše wón z mandźelskej Korneliu prěni raz wo planowanej, jednorej, rustikalnej móžnosći za přenocowanje w bywšim hospodarskim twarjenju statoka rozprawjał. Tehdy je Sven Helm nadźiju zwuraznił, zo tute předewzaće w lěće 2023 dokónči. „Nětko je tola trochu dlěje trało, dokelž dyrbjachmy twarski plan wjace króć změnić, zo bychmy twarsku dowolnosć dóstali“, wón powěda a doda: „Njejsmy móhli runočasnje wjacore ideje zwoprawdźić a zdobom z twarjenjom započinać.“ Nimo toho dyrbjachu Helmecy wočaknyć, zo łastojčki lehnyć přestanu. Hakle po tym su twarske dźěła móžne. A łastojčkow maja na dworje dosć a nadosć. Wone maja tu idealne žiwjenske wuměnjenja a su sebi tohodla Jitkowski burski statok za swój domicil wupytali.
Wšitko dyrbi won
Mały Wjelkow (SN/MiR). Mike Salomon je z Małowjelkowskich sotrownjow tworił domicil za zajimcow wuměłstwa, zwonka wulkeje kultury. Kulturne wjerški wotměwaja so zwjetša pod hołym njebjom na nostalgisce skutkowacej ležownosći. Nětko pak so tam tójšto změnja. „Wšitko dyrbi won“ – z tutym hesłom namołwja Mike Salomon ludźi sej do sotrownjow dóńć. Towarstwo Remise z.t. jako załožer projekta, kotrehož wotpohlad je z kulturnymi poskitkami projekt Małowjelkowskich sotrownjow wuchować, so nětko wot wšeho inwentara dźěli. Tutón běchu entuziasća w zašłych lětach z wulkej lubosću a akribiju zběrali. Zdobom rozpušća wone historisce zarjadowane apartmenty za dowolnikow, mjez kotrymiž bě přenocowanje w pastyrskej budce na słomje móžne. Nětko su wšitcy witani, kotřiž su na ležownosći njezapomnite koncerty, rejowanske popołdnja a filmowe nocy dožiwili. Štóž trjeba jónkrótnu a rjanu nadobu, meble abo tež jenož impozantny dekoraciski objekt, ma wot julija hač do septembra, kóždu póndźelu wot 14 do 18 hodź.
Po wjacorych změnach na twarskim koncepće je Sven Helm skónčnje ...
Krótkopowěsće (15.07.24)
Próstwy nětko zapodać
Budyšin. Próstwy wo podpěru projektow, kotrychž financny wolumen je wjetši hač 10 000 eurow, móža so pola Załožby za serbski lud hišće hač do 31. julija zapodać. Wo tym informuje institucija w swojim wokolniku. Do tutych próstwow słušeja tež tajke wo pjenjezy ze srědkow za změnu strukturow, kotrež kraj Sakska rozdawa.
Zranjenaj po rozestajenju
Budyšin. Wospjet je w młodźinskim klubje „Kurti“ na Pchalekowej k namócnosćam dóšło. Šěsć zababjenych muskich wosobow w ćmowych drastach je sobotu w nocy před klubom sedźacych wopytowarjow nadběhowało a zbiło, tak zo dyrbješe chorobna słužba 40- a 48-lětneho muža zranjenjow dla zastarać. Njeznaći skućićeljo ćeknychu.
Pomjezne sobudźěło tyje
Wo starym šulstwje
Njeswačidło. „Šulstwo Njeswačanskeje wosady po reformaciji hač do lěta 1945“ rěka nowa wosebita wustajeńca w tamnišim domizniskim muzeju, kotraž so njedźelu w 14 hodź. wotewrje. Handrij Wirth je přehladku wo stawiznach štyrjoch šulow we wosadźe zestajał z wjele dokumentami, wučbnicami a zajimawymi podawkami w tutych kubłanišćach. W Njeswačanskej wosadźe běchu něhdy cyrkwinska šula w Njeswačidle, dalše šule w Bóšicach, w Zarěču a we Łuze.
Do přirodowědneje stacije
Bjedrichecy. Biosferowy rezerwat Hornjołužiska hola a haty přeprošuje njedźelu, 14. julija, na lěćny swjedźeń do Bjedrichec. Při přirodoškitnej staciji wobsteji wot 15 do 19 hodźin składnosć so informować a mnohe poskitki wužiwać. Lětuši swjedźeń steji pod hesłom ratarstwo. Wustajeńca pokaza ratarske nastroje. Wopytowarjo dožiwja na ležownosći žně. Fotowa wustajeńca wěnuje so stawizniskim stacijam Bjedrichec. Dźěći zabawja so při klankodźiwadle a při paslenju.
Swětło a čas zeznać
MC Grodk na nawal přihotowany
Fota z dowola za SN
Kaž w dawnych časach płokali
Prózdninskej lěhwje požadanej
Budyšin (kb/SN). „Nawal přizjewjenjow za lětušej rěčnej prózdninskej lěhwje Serbskeho šulskeho towarstwa běše jara wulki.“ To zdźěli koordinatorka SŠT, Marlis Młynkowa. Tam chcedźa serbsku rěč při wšěch składnosćach nałožować a polěpšić. Projektaj spěchuje Załožba za serbski lud k 90 procentam.
Dźensa rano je so 64 dźěći do wočerstwjenskeho centruma KiEZ we Wodowych Hendrichecach podało. Tam čaka na nje wotměnjawy program z dźěłarničkami za hudźbu, sport a techniku. Wosebite dožiwjenje budźe nócne pućowanje. Lěhwo nawjeduje Marlis Młynkowa, kotruž studenća wučerstwa podpěruja. Přichodnu póndźelu poda so 20 młodostnych do čěskeho Harrachova. Woni chcedźa sej město wobhladać, pućować a krosnować. „Lěhwo budźe Marie Matješkec nawjedować“, rjekny Marlis Młynkowa, „wona je nazhonita kubłarka a je referendariat za wyšu šulu wotzamknyła. Podpěrować chce ju Matej Wjeńka.“ Wobdźělnicy su šulerjo w Chrósćicach, Ralbicach, Pančicach-Kukowje, Worklecach, Radworju Budyšinje, Kulowje a Drježdźanach.
Policija (12.07.24)
Wopačna zdźělenka
Budyšin. Po telefoniskej zdźělence wo schowanej bombje na tankowni Aral w Strowotnej studni wčera rano, je policija bjezposrědnje ležownosć ewakuěrowała a areal kołowokoło zašlahała. Specialisća za rozbuchliny pak po systematiskim pytanju ničo njenamakachu. Kriminalna policija přepytuje nětko wopačneje zdźělenki dla.
