Krótkopowěsće (24.06.24)
Lěsy tuchwilu derje zastarane
Pirna. Lěsy w Sakskej su hladajo na lěćo tuchwilu derje z wodu zastarane. Situacija je lěpša hač lěta do toho, zwurazni wčera rěčnik statneho zawoda Sakski lěs Renke Coordes. Hladajo na dlěše suche a horce periody kaž tež strowotu štomow w lěsach je to jara wažne. Sezona lěsnych wohenjow je dotal přerězna.
Dobry wothłós na zběrku
Budyšin. We wobłuku rjadu Zwjazka serbskich wuměłcow „tracTare“ je minjeny pjatk dźesać zajimcow w Budyskej kehelerni wo antologiji „Prěni raz“ diskutowało. Mjez druhim stej wudawaćelka Marka Maćijowa a awtorka Sylwija Šěnowa dotal dobry wothłós ciloweje skupiny – zběrka měri so předewšěm na čitarjow w starobje dwanaće do 14 lět – na knihu wuzběhnyłoj.
Čěska – chipowa wulkomóc?
Na škot seniorow
Ralbicy. Wutoru, 25. junija, škotuja serbscy seniorojo w sportowym domje w Ralbicach a to w 14 hodź. Nowačkojo su rady witani. Škotowe koło pokročuje potom 30. Julija w Radworskej „Zelenej hałžce“.
Koncert na farskej zahrodźe
Radwor. Chór Meja přeprošuje wutrobnje na swój lětni koncert njedźelu, 23. junija, na farsku zahrodu do Radworja. Nyšpor je na tutej njedźeli w 15 hodź. Po tym je zhromadna swačina a w 16 hodź. zaklinča zynki, kotrež wjedu was spěwajo po Łužicy.
Serbski swjedźeń w Choćebuzu
Choćebuz. Lětsa 15. raz zarjaduje město Choćebuz Serbski swjedźeń a to sobotu, 22 junija, w Parku Puškina. Na jewišću sćelaka RBB postrowitaj Was wot 14 do 18 hodź. Diana Šejcowa a Gregor Kliem. Wonaj powjedźetaj přez pisany serbski program. Mjez druhim wustupja spěwarjo a rejowarjo SLA, hudźbnik Jacke Schwarz, raper STOI a Janšojski chór.
Łužisku kupjel klětu dotwarja
Wojerowskim měšćanskim zawodam hlada tójšto dźěła do rukow
Wojerecy (SiR/SN). Moto Wojerowskich měšćanskich zawodow (SWH) rěka do přichoda: „Zastarować, pohibować, zahorjować“. Tak chce so zawod tuchwilnym a přichodnym wužadanjam zbližić. Na přikład planuja inwesticije za wjetše a nowe busy, wšako je potrjeba na nich wulce stupała. Nimo šulerjow wužiwa tež stajnje a wjace dorosćenych busy.
Hač do kónca přichodneho lěta chcedźa nimo toho twarske dźěła na Łužiskej kupjeli zakónčić. Dokelž su financy w předpolu jara derje planowali, móža nětko samo přidatnje słónčnu łubju a nowe špundowanje zatwarić.
„Njerěčimy jenož wo změnje strukturow, ale zeskutkownjamy ju“, rozkładźe jednaćel SWH Thomas Bleier. Tuž chcedźa wjacore miliony eurow inwestować, zo by so zawod do přichoda stabilnje na wikach za ćopłotu a energiju pozicioněrował. Dohromady planuja inwesticije we wysokosći 200 milionow eurow.
Poskitk Phylak derje přiwzali
W lěće 1996 załožena towaršnosć Phylak Sakska zwr w Nowej Wsy (Burgneudorf) je minjenu njedźelu zajimcow na dźeń wotewrjenych duri přeprosyła. Swójbne předewzaće produkuje přirodne žałby a spagyriske lěki, kotrež skutkuja cyłkownje, podobnje homeopatiskim srědkam.
Nowa Wjes (JoS/SN). Hižo hodźinu po wotewrjenju duri běše zawodne parkowanišćo połne a to nic jenož z awtami ludźi z wokoliny. Dohromady běše něhdźe 600 zajimcow přišło.
Sobudźěłaćerjo Phylak wotmołwjachu z wulkej wutrajnosću na njeličomne prašenja kołowokoło spagyriki. Poskićowana literatura k tutej temje běše jara požadana mjez wopytowarjemi. Na přednoškach – mjez druhim přednošowaše jednaćel dr. Gopolsamy Naidu sam – běchu městna połnje wobsadźene. Referenća znazornichu zhotowjenje přirodnych lěkow kaž tež terapeutiske wobłuki spagyriki. Dźěći a dorosćeni móžachu pod nawodom fachowcow sami přirodnu žałbu zhotowić. Produkty w zawodnej předawarni běchu runje tak požadane kaž kosmetiske poradźowanje.
Njeswačidło běše wčera dopołdnja prěnja stacija oldtimerow, ...
Serbske kubłanske srjedźišćo w nošerstwje SŠT „Lipa“ kaž ...
Na kromje skandala
Diskusija wo tym, kak maja so posedźenja gmejnskeje rady Ralbicy-Róžant wotměć, zawostaji njepřijomny zaćišć.
Róžant (JK/SN). Hižo w aprylu bě Zjednoćenstwo swobodnych Delanskich wolerjow zapodało na gmejnsku radu próstwu, wuradźować a wobzamknyć, zo so posedźenja gmejnskeje rady kaž tež wšitke dalše posedźenja gmejnskich organow w serbskej rěči wotměwaja. Wšitkim tym, kotřiž serbšćinu njewobknježa abo njerozumja, měło so na tajkich zarjadowanjach z pomocu simultaneho přełožka abo dalšej techniskej móžnosću zrozumjenje zmóžnić a tak sćěhować wotběh a wobsah posedźenja.
Krótkopowěsće (21.06.24)
Kubłanisćo strukturu změni
Smochćicy. Kubłanišćo swjateho Bena ma w přichodźe prawnisku formu towaršnosće z wobmjezowanym rukowanjom być. Tole je jedna z mnohich změnow na městnje. Dale wutworja městno jednaćela, wobłukaj kubłanje a přenocowanje matej so dźělić. Dotalny nawoda poda so kónc lěta jako nawoda katolskeho kubłanja dorosćenych do Drježdźan, hdźež změje nowe sydło.
Biosfera 6 wušła
Budyšin. Za šulerjow 6. lětnika Serbskeho gymnazija je nowa serbska wučbnica biologije „Biosfera 6“ wušła. Z Licencneho wudaća nakładnistwa Cornelsen móža šulerjo wot noweho šulskeho lěta wuknyć. Serbskaj wučerjej a fachowcaj Rejza Šěnowa a Konrad Lipič staj wučbnicu, kotraž wobsahuje pjeć kapitlow, do serbšćiny přełožiłoj.
Wo Moskwu wjace njerodźa
