Tež w Radworju hejsowali
Zo njemóža póstnicy jenož w Kulowje abo w Serbskich Pazlicach swjećić, dopokazachu šulerjo a šulerki Radworskeje šule minjeny štwórtk. Je hižo z dobrej tradiciju, zo swjećitej zakładna a wyša šula zhromadnje póstnicy. Dołho běchu šulerjo dźesateju lětnikow tutón zabawu přihotowali. Jednotliwym lětnikam přirjadowachu moto, po kotrymž mějachu so holcy a hólcy předrasćić. Zdobom mějachu nadawk swójsku reju nazwučować. Dźesatki organizowachu přikuski, napoje a sportownju wudebichu.
Hižo wot ranja běchu zakładni šulerjo rozpjeršeni. Po snědani smědźachu skónčnje w sportowej hali rejować a swoju wušiknosć při wšelakich stacijach dopokazać, kotrež běchu starši šulerjo natwarili.
Po wobjedźe swjećachu potom šulerjo wyšeje šule. Nic jenož šulerjo, ale tež wučerjo běchu wulkotnje předrasćeni. Rjadownje předstajichu swójske reje, přewjedźechu wšelake hry a sej zarejowachu. Po cyłej hali knježeše hołk a tołk. Wězo so najlěpša reja hódnoći.
Policija (13.02.24)
Rozestajenje na póstnicach
Kulow. Na póstniskim swjedźenju na Wojerowskej dróze w Kulowje je w nocy na póndźelu k namócnemu rozestajenju dóšło. 20lětny bě tam 25lětnemu z pjasću mjezwoči dyrił, tak zo dyrbješe so starši lěkarsce zastarać dać. Skućićel změje so nětko podhlada zranjenja ćěła dla zamołwić. Kriminalna słužba policije pad dale přepytuje.
Drogi brał a z awtom jěł
Němcy. 19lětneho wodźerja transportera su policisća njedźelu dopołdnja w Němcach zadźerželi. Drogowy test reagowaše pola njeho pozitiwnje na konop, amfetaminy a kokain. Młody muž dyrbješe na to krej wotedać.
Jank a Hanka dźěło pytałoj
Njebjelčicy (AKR/SN). Wjesoła a lóštna nalada knježeše minjeny pjatk w Njebjelčanskej „Bjesadźe“. Tam běchu nory na žónske póstnicy přeprošeni, zo bychu zhromadnje pisany a zabawny wječor dožiwili.
Přećah wjeršk póstnicow
318. Kulowska karnewalowa sezona so dźensa w połnocy skónči
Kulow. Póstniske wjedro měnješe sobotu z noricami a norami jara derje, njedźelu nic tak derje a wčera póndźelu potom poł a poł. Při wulkim ćahu po piwowym městačku bě wjedro při prěnim přechodźe mjenujcy chětro rjane, při druhim pak přewšo pancate. Po prěnim kole běchu prěni hosćo hižo zaso domoj jěli.
Wjacori hosćićeljo w 24 barach pak přihotowachu so hižo na popołdniše a wječorne pohosćenje. Tak tež Birgit Bartowa, mějićelka bary na Ždźarjanskej droze: „To smy róžowu póndźelu hižo wjacore razy dožiwili. Najprjedy hejsowaše so při rjanym wjedrje a po połojcy so wjedro změni. Tak je to tež dźensa.“ Bartec swójba ze swojimi přećelemi a pomocnikami pak wjele wot dešća a šwihelow njepytny, wšako pohosćeše wona po prěnim přechodźe wulkeho přećaha hižo swojich hosći, a to mjez druhim z kwasnej poliwku, rybičkowymi całtami a samopječenymi tortami.
Zaso protesty
Zakaz trubjenja ignorowali
Nory po měsće ćahnyli
„My za Kamjenc“ město konfliktow
Na wólbnej cedlce za měšćansku radu wolerjo w Kamjencu lětsa drje mjenje stronow nadeńdu, ale město toho njezwučene nadstronske zjednoćenstwo z wjele kandidatami.
Kamjenc (SN/mb). Tež w Lessingowym měsće Kamjencu so na lětuše komunalne wólby hotuja. Tam su nětk njewšědne zjednoćenstwo wutworili: „Hromadźe za Kamjenc“ („Miteinander für Kamenz“). Na lisćinje kandidatow za měšćansku radu stej zapósłanča SPD w zwjazkowym sejmje Kathrin Michel a něhdyša zapósłanča Lěwicy w krajnym sejmje Marion Junge. A tež Alex Theile, kiž běše w lěće 2022 zhromadny kandidat Lěwicy, SPD a Zelenych při wólbach krajneho rady w Budyskim wokrjesu, je w kole noweho zwjazka widźeć. Dotal běchu štyrjo měšćanscy radźićeljo z čłonom frakcije Lěwicy, nimo Theile mjez druhim Volker Johne a Thomas Lieberwirth – tući třo pak nětk za „Hromadźe za Kamjenc“ kandiduja.
Krótkopowěsće (13.02.24)
Wjele dočasnje šulu wopušći
Berlin. Kwota młodych ludźi w Němskej, kotřiž šulu dočasnje wopušća, je z 12,2 procentami wyša, hač na runinje EU. Tam wučinja wona 9,6 procentow, tak zdźěli statistiski zarjad EU Eurostat. Jenož Rumunska, Španiska a Madźarska maja hišće wyše kwoty.
Spominaja na zničenje 1945
Drježdźany. Město Drježdźany spomina dźensa z mnohimi zarjadowanjemi na zničenje města před 79 lětami. Politika a towaršnosć chcetej po tradiciji z rjećazom ludźi přez historiski centrum a přez Łobjo tónraz wosebje sylne znamjo za měr a demokratiju pokazać. Tež sakski ministerski prezident Michael Kretschmer (CDU) a wyši měšćanosta Dirk Hilbert (FDP) so wobdźělitaj.
Debata wo wulkopósłanstwje
Wjelča hodźina a ćěmne mysle
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk znatym a mjenje znatym chorosćam, zo by je čitarjam trochu bliže rozłožował (38).
Normalny cyklus spara traje něhdźe 90 mjeńšin. Kóždu nóc přeńdźemy štyri do pjeć tajkich cyklusow: Raz lochko spimy, raz kruće. W fazach lochkeho spara přeco zaso wotućamy, hač do 30 króć kóždu nóc. So wě, zo so na to zwjetša njedopominamy. Mnoho ludźi pak so mjerza, zo zas a zaso mjez třoch a štyrjoch rano wotućeja a sej na to cyłu chwilu wusnyć njemóža. Wonu hodźinu mjenujemy tež wjelču hodźinu. Wjelki wšak su aktiwne, hdyž měło poprawom wšitko spać. Za čas wjelčeje hodźiny bědźimy so z negatiwnymi myslemi a reflektujemy wulke kaž tež małe problemy. Dožiwjamy depresiji podobnu fazu, kotraž nam dalši spar znjemóžnja. To wšak nima jeničce psychologiske, ale tež wočiwidne medicinske přičiny.
