Čerstwu trawu za Hrańčan dejki
Nětko zaso Serb w předsydstwje
Njebjelčicy (SN/MiR). Njebjelčanske towarstwo Kamjenjak ma nowe předsydstwo. Po wjacorych lětach chce w nim tež zaso Serb skutkować. Lukaš Deleńk běše před štyrjomi lětami zamołwitosć jako financnik swojej naslědnicy přepodał. Wotnětka je wón z najwyšej ličbu hłosow 15 přitomnych čłonow towarstwa zastupowacy předsyda, byrnjež so w kandidaturje jako přisydnik předstajił. Jako předsyda skutkuje w přichodnymaj lětomaj Hubert Lange.
Zahajene projekty dale wjesć
Łaz (AK/SN). Łazowska gmejna chce loni zahajene twarske naprawy zaměrnje dale wjesć. Gmejnska rada je z dwěmaj napřećiwnymaj hłosomaj a jednym hłosa wzdaćom njetrjebane zbytki etata za społnomócnjenje (Haushaltsermächtigungen) ze zašłych lět do etata 2024 přewzała. Za inwesticije su dochody we wysokosći 1,6 milionow eurow a za wudawki 2,5 milionow eurow zwěsćili. Za běžne wěcne nadawki a posłužby so z społnomócnjenjow 551 000 eurow přenjesu. „To potrjechi započane naprawy“, rjekny komornica Mandy Liepert. Wona mjenowaše polěpšenje wody we bydlenjach Šćeńcy 32 000 euro, hladanje hydrantow 8 000 eurow, kóšty za plan wužiwanja płoninow gmejny kaž tež za plan wobtwarjenja 82 000 eurow, za prawniske poradźowanje koncesiskeho dorěčenja miliny dla 25 000 eurow, hladanje centralneho wotstronjenja mazaneje wody we Łazu a Běłym Chołmcu 7 000 eurow, hladanje gmejnskich dróhow, pućow a naměstow, 252 000 eurow kaž tež za wobstajne hladanje wodźiznow druheho rjada 144 000 eurow.
Dobra akcija konjam na wužitk
Chwačan jěchanske towarstwo ma nowu připrawu za napojenje koni
Chwaćicy (UM/SN). Woltižěrowanske a jěchanske towarstwo Chwaćicy je sej dawne přeće spjelniło: awtomatiske napojišćo za swoje konje. Dotalny wodowy system běše jara stary a je w zymje prawidłownje zamjerznył. Nětko dóstawaja konje swoju wodu po potrjebje, awtomatisce, ručež z klamu na knefl stłóča.
Měšćanosta hižo njekandiduje
Krótkopowěsće (06.06.24)
Zakónčacy koncert młodźiny
Drježdźany. Sakscy, we wobłuku lětušeho wubědźowanja Młodźina hudźi wuznamjenjeni talenty su wčera na Drježdźanskim hrodźe Albrechtsberg koncert mytowanych wuhotowali. Mjez druhim zahra Wotrowčan Adrian Simon na klawěrje, kiž słuša k dohromady 13 wobdźělnikam z wokrjesow Budyšin a Zhorjelc, kotřiž běchu we wurisanju „podestowe“ městna docpěli.
Muzej čěskeho łódźnistwa
Veletov. Najebać połoženja wosrjedź Europy ma Čěska njewočakowano wulku tradiciju mórskeje pławby. We Veletovje pola Kolína chcedźa tohodla w juliju wosebity muzej wotewrić. Ekspozicija měri so na wulku mórsku flotu z časa Čěskosłowakskeje, kotraž bu w 1990tych lětach rozpředata. Přehladka ma samo originalny kapitanski móst zbywaceje łódźe Třinec wopřijimać, kotraž tuchwilu w Rotterdamje na zešrotowanje čaka.
Wjace pjenjez w kapsy
Štož njeje jenož naležnosć serbskich radźićelow
Kak zhladujetaj wjelelětnaj wokrjesnaj radźićelej Dawid Statnik (CDU) a Hajko Kozel (Lěwica) na wólbnu dobu 2019-2024 Budyskeho wokrjesneho sejmika? Jeju mysle je Axel Arlt zjimał.
Hory a doły wólbneje periody
„Spřisahanje w serbšćinje“ bě za Hajka Kozela (Lěwica) z narodneje perspektiwy wjeršk na spočatku wólbneje periody. Dawid Statnik skedźbni porno tomu na zajimy wobydlerstwa, kotrež maja radźićelki a radźićeljo zastupować. Wokrjes pak „ma rjad socialnych posłužbow wukonjeć. Tute jemu ze zakonjow wurostu. Bohužel njejsu so wotpowědne financy k dispoziciji stajili“, wopisuje radźićel CDU chutne połoženje.
Podobnje radźićelej Janej Budarjej (wón je so minjeny štwórtk w interviewje w SN wuprajił) je Statnik wótrje kritizował, „zo njejsu při zarjadowanju wólbnych wokrjesow jasnišo na serbski sydlenski rum dźiwali“. Ale so wón nadźija, zo „budu w sejmiku dale Serbja skutkować“. Za Kozela je „wěsty doł w tym, zo přeco hišće nimamy połnohódny a runohódny wuběrk za serbske naležnosće, kaž maja to naši susodźa we wokrjesu Sprjewja-Nysa w Braniborskej“.
Hódni a runoprawni sobudźěłaćerjo z kwalitu a wukonom
Wojerecy (AK/SN). Předewzaće YADOS a Łužiske dźěłarnje za zbrašenych chcedźa zhromadne dźěło pohłubšić. To podšmórnychu zastupjerjo firmy při njedawnym wopyće sakskeje socialneje ministerki Petry Köpping (SPD). „Přistajenje ludźi ze zbrašenjom nam dyrbizna njeje. To je woprawdźita hódnota. Kwalita a wukonliwosć tutych ludźi nas přeco zaso zadźiwatej“, rjekny prokurist Olaf Besser na wobchodźenju po zawodźe YADOS.
Pytaja za Tatianu B.
Zhorjelc. Hižo wot 17. meje pyta Zhorjelska policija za 16lětnej Tatianu B. Naposledk běše wona na dróze Bismarcka w Zhorjelcu po puću. Nětko prosy policija ludnosć wo pomoc. Zhubjena je 1,55 cm wulka, je šwižna a ma hładke, dołhe, swětłe włosy. Naposledk běše wona w čornych legginsach, ćmowej stepowanej kapje a w běłych sportowych črijach po puću. Pokiwy podajće prošu telefonisce pod čo. 03581 650 0.
Diesel pokradnyli
Kodrecy (Kodersdorf). Dohromady 350 litrow diesela su njeznaći skućićeljo njedźelu w nocy z dweju nakładneju awtow na parkowanišću „Wiesaer Forst“ při awtodróze A4 pokradnyli. Trochowana hódnota spakosćeneho diesela je 525 eurow. Škoda w zwisku ze załamanjom wučinja 50 eurow.
