Runowahu dodźeržeć
Inwesticije su předewšěm wot eksternych faktorow wotwisne
Rakecy (JK/SN). Złožujo so na dobre wuslědki konsolidacije a spokojacy staw likwidnych srědkow planuje Rakečanska gmejna w přichodnymaj lětomaj wjetše inwesticije. Wosebje tak mjenowane klučowe produkty maja při tym prioritu. To je dopóznaće ze septemberskeho posedźenja gmejnskeje rady.
Při planowanju wobkedźbuje gmejna hižo tučasnje stupace kóšty za energiju a material. Wona liči ze spěchowanskimi srědkami z boka kraja Sakskeje kaž tež ze srědkow za strukturnu změnu.
Zo je gmejna zlutniwje hospodariła pokazuje fakt, zo je so jeje dołh wot 2,3 miliony eurow w lěće 2013 na 780 000 eurow w lěće 2024 pomjeńšił. Tute eficientne hospodarjenje a wobkedźbowanje datych poměrow a so wuwiwacych kóštow su wuchadźišćo za naročne nadawki gmejny, kaž to wjesnjanosta Swen Nowotny (CDU) zwurazni. Tuž ma gmejna na to dźiwać, zo wostanje runowaha mjez dochodami a wudawkami gmejny zawěsćena, jeli chce, kaž plan předwidźi, kónc 2024 měć wurunany etat.
Wopon za Krabatowe wiki
Dźewjeć metrow wysoki a ze wšelakimi woponami wuhotowany prezentuje so wot štwórtka woponowy štom na Staroměšćanskim torhošću mjez Serbskej studnju a radnicu we Wojerecach.
Wojerecy (SiR/SN). Krabatowe towarstwo, kotrež wěnuje so regionalnemu wuwiću w dwurěčnej Łužicy, je ideju za „Woponowy-pućowanski štom“ wuwiło. „Woponowy štom znazornja identitu městow a gmejnow z Krabatowym regionom a z aktualnymi podawkami, kotrež so přichodne dny wotměwaja“, wuswětla městopředsyda towarstwa Steffen Mühl.
Woponowc (Wappenbaum) budźe na Krabatowych wikach a na torhošću w starym měsće widźeć. Potom chcedźa jón hač do přichodneho zarjadowanja składować.
Požohnowanje konjacych zapřahow w Chrósćicach je kóžde lěto ...
Krótkopowěsće (26.09.22)
Za wosebity Oscar nominowany
Budyšin. Šěrokopasmowy projekt Budyskeho wokrjesa je so do kónčneho koła European Broadband Award Komisije EU dóstał, kaž krajnoradny zarjad zdźěli. Budyšin je w kategoriji „Kwalita a přistupnosć posłužbow“ hromadźe z projektomaj z Awstriskeje a Letiskeje nominowany. Hač wokrjesej renoměrowane myto „Šěrokopasmowy Oscar“ spožča, wo tym jutře w Brüsselu rozsudźa.
Termin w kanclerskim zarjedźe
Berlin/Budyšin. Skupina hornjołužiskich firmownikow je hromadźe ze zapósłancom Sakskeho krajneho sejma Markom Šimanom (CDU) dźensa w zarjedźe zwjazkoweho kanclera w Berlinje na eksistencielne temy wuwića w Hornjej Łužicy pokazała. Popołdnju bě rozmołwa ze społnomócnjenym zwjazkoweho knježerstwa za wuchodnu Němsku Carstenom Schneiderom (SPD) předwidźana.
Kabinet jutře w Serbskim domje
Lěpše wuměnjenja docpěć
Nowotwar Kulowskeho depota wohnjoweje wobory postupuje
Sulšecy (AK/SN). Nawoda Kulowskeho twarskeho zarjada Stephen Rachel je na schadźowanju měšćanskeje rady w Sulšecach potwjerdźił, zo nowotwar Kulowskeho wohnjowoborneho depota na Třělnišću derje postupuje. „Wonkowny twar je dozhotowjeny, a bórze ma so fasada barbić.“ Za dwě njedźeli zahaja wuhotowanje wonkownych připrawow z plestrowanjom přijězda a parkowanišćow. Wjace dźěłać maja rjemjeslnicy hišće nutřka. Klětu w měrcu ma nowy depot hotowy być. Předewzaće je tuchwilu najwažniša twarska naprawa w měsće. Něhdźe połdra miliona eurow nałoža za planowanja a twar, nic pak wuhotowanje a wonkowne připrawy. Město Kulow wobdźěli so na cyłkownych kóštach z 500 000 eurami, po dalšich 500 000 eurow Swobodny stat Sakska a Zwjazk ze spěchowanskeho programa Socialne město (SSP). Z nowym depotom chcedźa wuměnjenja za wohnjowych wobornikow bytostnje polěpšić. W twarjenju su rumnosć za kubłanske zarjadowanja, kuchnja, běrowowe rumnosće a moderne předrasćernje zaměstnjene. Maja tam tež moderne sanitarne připrawy.
Policija (23.09.22)
Muža při wotbočenju přewidźała
Serbske Pazlicy. 37lětna wodźerka awta marki Dacia je srjedu dopołdnja w Serbskich Pazlicach do 18lětneho muža zrazyła. Při wotbočenju k sportnišću je wona muža na mopedźe marki Simson přewidźała, kiž do směra Njebjelčic jědźeše. Muža dowjezechu do chorownje. Wěcna škoda wučinja něhdźe 5 000 eurow.
Na wjerchowski koncert
Do wohnjoweje wobory
Syła zajimcow chce so wohnjowy wobornik abo wohnjowa wobornica stać. Nawoda gmejnskeje wobory Ralbicy-Róžant Michał Maywald je zašłu wutoru zakładny wukubłanski kurs zahajił.
Krótkopowěsće (23.09.22)
Kubłanske wužadanja rozjimali
Kiel. Čłonojo Mjeńšinoweje rada štyrjoch awtochtonych mjeńšin w Němskej su so na swojim posedźenju wčera w Kielu mjez druhim ze społnomócnjenym za mjeńšiny w najsewjernišim kraju Němskeje Johannesom Callsenom rozmołwjeli, kaž jednaćelka Domowiny Judith Šołćina zdźěli. Wužadanja na polu kubłanja tam bydlacych Sewjernych Frizow bě we wuměnje myslow dominowaca tema.
Interkulturne tydźenje
Budyšin. Wot jutřišeho hač do 9. oktobra wotměja so w Budyskim wokrjesu znowa Interkulturne tydźenje. Ze Swjedźenjom zetkawanja chcedźa je jutře na Budyskich Žitnych wikach oficialnje zahajić. Wšitcy wobydlerjo su ze swojimi wšelakorymi kulturami, rěčemi, nabožinami a identitami přeprošeni, při mnohich blidach do rozmołwy přińć.
Rusojo w Čěskej přećiwo Putinej
Pój, wječoro, k nam rjany
Budyšin. Serbski ludowy ansambl přeproša jutře, pjatk, 23. septembra w 19.30 hodź. do Budyskeho Serbskeho domu. W srjedźišću steji komornohudźbne tworjenje Korle Awgusta Kocora. Čłonojo orchestra předstaja w prěnim dźělu wječorka kompozicije za smyčki a klawěr, kaž Trio za husle, violoncello a klawěr, Sonatinu čo. 2 G-dur za husle a klawěr a tež smyčkowy kwartet. Twórba Liany Bertókoweje „Hommage á Kocor“ za dwaj hłosaj, husle a klawěr zahaji druhi dźěl koncerta, čerpacy z bohateho pokłada pěsnjow załožerja serbskeje wuměłskeje hudźby. Tak zaklinči twórba „Tři norwegske pěsnje“ z pózdnjeho tworjenja Kocora. Štyri spěwy ze „Šěsć serbskich spěwow“ je młody komponist swojemu wučerjej Karlej Eduardej Heringej wěnował. Na kóncu zaklinčitej hišće kompoziciji za ansambl drjewowych dujerjow. Je to wobdźěłanje spěwa „Pój, wječoro, k nam rjany“ wot Jana Cyža a „Kocoriana-Suite“ za dujerski kwintet čo. 2 wot Jana Pawoła Nagela.
Najstarša Budyšanka zemrěła
