Krótkopowěsće (16.05.24)
Słowakski premier stabilny
Bratislava. Strowotniski staw słowakskeho ministerskeho prezidenta Roberta Fica je po atentaće na njeho „stabilny, ale dale jara chutny“. Tole je zastupowacy ministerski prezident Robert Kaliňák dźensa słowakskej powěsćerni TASR prajił. Po informacijach chorownje su Fica pjeć hodźin operowali. Atentatnik bě wčera na 59lětneho třělał a jeho ćežko zranił.(Čitajće dale na stronje 2.)
Łužičana za prezidenta wuzwolili
Drježdźany. Twarski předewzaćel Uwe Nostitz z Bělšec je nowy prezident sakskeho foruma rjemjesła. 62lětneho twarskeho inženjera su wčera w Drježdźanach z jasnej wjetšinu hłosow za naslědnika Drježdźanskeho třěchikryjerskeho mištra Jörga Dittricha wuzwolili. Dittrich znowa kandidował njeje. Wón je mjeztym prezident Centralneho zwjazka rjemjesła Němskeje a wostanje wiceprezident w Sakskej, forum rjemjesła zdźěla.
Zrěčenje podpisali
Policija (15.05.24)
Elektriske nastroje pokradnyli
Kulow. W Nowej Wsy pola Kulowa su wobydlerjo w pódlanskim twarjenju jedneje ležownosće póndźelu popołdnju załamanje zwěsćili. Po zdaću běchu so njeznaći w nocy wot njedźele na póndźelu zadobyli a wšelake elektriske nastroje a graty pokradnyli. Wěcna škoda wučinja dohromady 25 eurow. Policisća su slědy zawěsćili. Wo dalše přepytowanja so nětko kriminalna słužba přisłušneho rewěra stara.
Fachowy dźeń
Budyšin. Budyska fachowa poradźowarnja swjeći lětsa swoje 25lětne a Budyski Dźěłowy kruh přećiwo seksualizowanej namocy swoje dźesaćlětne wobstaće. To je zarjadnišćomaj składnosć, fachowy dźeń na temu seksualizowana namóc mjez młodostnymi wuhotować. Zarjadowanje wotměje so jutře, 16. meje, wot 9 hodź. na Wysokej šuli Sakskeje policije w Budyšinje na Kantowej 25.
Na čitanje
Budyšin. Spisowaćelka Monika Maron čita pjatk, 17. meje, we 18.30 hodź. w Budyskim Antikwariaće při Tachantskej cyrkwi. Jeje romany wabja do diskusije. Wulkeho zajima dla je jenož hišće mało swobodnych městnow.
Z Romanom Knižku spominać
Budyšin. W Budyskim wopomnišću na Weigangowej 8a wuhotuje z Budyšina pochadźacy dźiwadźelnik Roman Knižka jutře wječor w 19 hodź. literarno-hudźbne čitanje. W geto Terezin su nacionalsocialisća wjace hač 140 000 židowkow a židow zajeli, mjez nimi mnohich wuměłcow. Swoje čitanja wěnuje Knižka twórbam wuměłcam, kotřiž su tam ćerpjeli.
Jubilej w Němskich Pazlicach
W Jenkecach wšědnje čerstwe jejka
Komunikacija dyrbi fungować
Njedosahace informacije wjedu k horcym diskusijam w gmejnskej radźe
Njeswačidło (JK/SN). Poslednje posedźenje Njeswačanskeje gmejnskeje rady aktualneje legislaturneje periody bě wospjet přewšo napjate. Po tym zo bě radźićelka Ramona Clauß próstwu zapodała, dnjowe dypki nastupajo reparaturu třěchi Njeswačanskeje zakładneje šule z dnjoweho porjada wuwzać a je na dnjowy porjad jednoho z přichodnych posedźenjow přestorčić, nasta kontrowersna diskusija. Radźićelka Clauß (Zjednoćenstwo towarstwow) wumjetowaše wjesnjanosće Gerdej Schusterej (CDU), zo je woprawdźity chutny staw třěchi šule radźićelam zamjelčał a zo chcyše krótko- dobnje wobzamknyć, reparaturu hišće w lěćnych prózdninach přewjesć. K tomu trěbnych 90 000 eurow mějachu so po měnjenju Schustera z inwestiwnych a klučowych připokazankow wokrjesa wzać. Dokelž nima gmejna hišće płaćiwy hospodarski plan za lětsa, móhła so suma w nim zaplanować.
Korčmarjo maja chětro wojować
Saněrowanje dróhi S 108 we Łazu staršich a hosćencarjow starosća
Łaz (AK/SN). Prěni dźěl statneje dróhi S 108 we Łazu je z wikowanišća Penny hač k wotbóčce na Lěsnu dróhu saněrowany. Wot tam móža wobydlerjo po Starej dwórnišćowej hač k tankowni jěć. To je wjesnjanosta Thomas Leberecht (CDU) tydźenja na posedźenju gmejnskeje rady rozłožił. „Na pódlanskej čarje zastać pak je zakazane“, wón rjekny. Wobě busowej zastanišći při S 108 blisko předawanišća Netto stej mjeztym zwottorhanej. Linijowy wobchad tam nětko njejězdźi. Narunanske zastanišća su na Starej dwórnišćowej. W druhim tydźenju meje su podłu S 108 z twarom chódnika mjez předawanišćom Netto a pyramidu započinali. Wšo dohromady maja twarske naprawy na S 108 tři lěta trać.
Kerki rododendrona na Kamjenskej Pastwinej horje wozdebjeja ...
Milan Jurk žurnalizm testuje
Hižo nimale njedźeli syda 15lětny šuler 9. lětnika Serbskeho gymnazija sobu za wulkim blidom w běrowje šefredaktora, hdyž redaktorojo Serbskich Nowin na rańšim posedźenju wo wudaću wuradźuja, kotrež wječor wuńdźe. Młody Hórčan so hižo dawno za žurnalizm zajimuje. Tuž běše za njeho jasna wěcka, zo praktikum w Serbskich Nowinach zabsolwuje. Mjeztym je so ze wšelakimi wobłukami wšědneho dźěła serbskich žurnalistow zeznajomił. Hač su to pokiwy na terminy, předźěłanje interviewa, přełožk němskich tekstow do serbšćiny a rešerše po puću we Łužicy – Milan Jurk je sej w swojim praktikumje, kotryž so pjatk skónči, hižo wobšěrny přehlad tworił.
Krótkopowěsće (15.05.24)
Zaso wjace swójbow w Sakskej
Kamjenc. W Sakskej bydli zaso wjace swójbow z njepołnolětnymi dźěćimi hač hišće před dźesać lětami. Loni su nimale 417 000 swójbow z małolětnymi dźěćimi registrowali, 2013 běše jich 375 000 swójbow, statistiski krajny zarjad w Kamjencu składnostnje dźensnišeho Dnja swójby zdźěli. Porno tomu je ličba tajkich swójbow 1996 hišće 561 000 była. Loni wučinjachu mandźelstwa ze swojimi dźěćimi 54 procentow swójbow.
Strach wohenjow dale přiběra
Pirna. Strach lěsnych wohenjow w Sakskej přiběra. Předewšěm na sewjeru Zhorjelskeho a Budyskeho wokrjesa je po informacijach statneho zawoda Sakski lěs jara suche. Mjeztym su tam zamołwići warnowanski schodźenk pjeć postajili. Pobrachowacych spadkow dla móhła so situacija dale přiwótřić.
Češa pija mjenje piwa
