9. junija budu nimo wólbow do Europskeho parlamenta tež wólby gmejnskich a měšćanskich radow. Smy so w někotrych gmejnach wobhonili, što su tam w minjenych pjeć lětach docpěli.

Bóšicy (SN/MiR). Drje najsylniša dopomnjenka Bjarnata Cyža jako naměstny wjesnjanosta w Bóšicach stej pomocnej akciji za Pólsku a Čěsku. Spočatk 2000tych lět je wón zhromadnje z wjesnjanostu Stanijom Ryćerjom pomocne srědki do susodneju krajow wozył. Wšako běše tam woda wulku škodu načiniła. Ze słowjanskim duchom, wutrobitosću a bjez wulkich rozmyslowanjow staj sej wonaj tam přećelow zdobyłoj. „Mi je stajnje wažne, zo tež w Bóšičanskej gmejnje serbske žiwjenje knježi“, Cyž rjekny, „wšako mamy w našich dźewjeć wjesnych dźělach hišće něhdźe połojcu wobydlerjow, kotřiž serbsce rěča abo so k serbskemu žiwjenju wuznawaja.“ W nadawku wjesnjanosty pěstuje wón mjeztym dlěje hač dźesać lěta styki do čěskeje partnerskeje gmejny Srbsko njedaloko Prahi. W awgusće přijědźe składnostnje 650. róčnicy prěnjeho naspomnjenja ­Wětrowa wolejbulowe mustwo wot tam na wopyt do Łužicy.

Při rjanym wjedrje je njedźelu tójšto přihladowarjow na mejemjetanje do Serbskich Pazlic přichwatało. Mjez hosćimi bě mnoho dźědow a wowkow, kotřiž wužichu składnosć swoje wnučki při hajenju nałožka wobkedźbować. Po słódnej swačinje ze samopječenymi tykancami a kofejom zarejowa dohromady 16 porow wokoło mejki, dźewjeć młodźinskich a sydom dźěćacych. Wšitke holcy wjerćachu so w pyšnej narodnej drasće. Běh wo krónu mejskeho krala doby Jonas Ričl, kotryž wuzwoli sej Stefanie ­Bulankec za swoju mejsku kralownu. Pola dźěći rěkaše lětuši por Luba Brězanec a Jonas Brückner. Foto: Angelika Krječmarjowa

Budyšin (SN/at). Budyski wokrjesny sejmik je so wčera posledni raz we wólbnej dobje 2019–2024 zešoł. Radźićelki a radźićeljo wobzamknychu wudawki wyše plana za jobowy center Budyšin we wob­jimje 4,061 mio. eurow. We wobłuku kubłanja a wobdźělenja trjebaja 1,550 milionow eurow wjace za při­zwolenje wukonow ukrainskim dźěćom a młodostnym. Jich ličba je so porno planowanjam wo tójšto zwyšiła. Wjace kóštow njezawinuja nimo zwyšeneje wosobinskeje šulskeje potrjeby tež wudawki za wobjed, transport šulerjow a spěchowane wuknjenje. Sylnje stupali su kóšty za zaměstnjenje (KdU), předewšěm za tepjenje a ćopłu wodu. Wočakowane přidatne wudawki je tu 1,971 mio. eurow. Kalkulowali su z woteběracej ličbu padow. Suma za prěnje wuhotowanje bydlenjow je wot 2021 na 2023 wo 205 procentow přiběrała. Tež tohodla su přidatne pjenjezy 270 000 eurow za druhe wukony za kwartěr a tepjenje kaž tež za jonkrótne wukony trěbne.

Wobzamknjene přidatne kóšty wo­krjes jeno zdźěla sam kryje. 1,611 mio. eurow Zwjazk přewostaji a 800 000 eurow je z přidatnych dochodow z narunanja socialnych wukonow KdU.

Prěni raz Serbow wopytał

Budyšin. Intendant MDR Ralf Ludwig je wčera wječor Budyski Serbski dom wopytał. Mjez druhim so předsyda Domowiny Dawid Statnik, čłon rozhłosoweje rady MDR Bjarnat Cyž a direktor MDR Sakskeje w Drježdźanach Sandro Viroli na rozmołwje wobdźělichu. Prěni raz wopyta loni wuzwoleny intendant MDR Serbow. W Budyskim studiju gratulowaše wón redakciji młodźinskeho wusyłanja Radijo Satkula k 25. jubilejej.

Zrěčenje dočasnje wupowědźili

Budyšin. Nastupajo njewěsty přichod produkciskeho stejnišća Alstom w Zhorjelcu je industrijne dźěłarnistwo IG metal zrěčenje wo přichodźe z koncernom wupowědźiło. Zrěčenje měješe so poprawom w lěće 2026 zakónčić. Tež zawod w Budyšinje je potrjecheny.

Filharmonija z nowym nawodu