Na „Kofej w třoch“ do muzeja
Budyšin. Pod hesłom „Lejpold. Korčma při serbskim highwayju.“ přednošuje Daniela Heckowa wo 200-lětnych stawiznach něhdyšeho hosćenca při puću mjez Chrósćicami a Delanami. Serbski muzej Budyšin přeprošuje zaso na „Kofej w třoch“ a to srjedu, 19. junija, w 15 hodź.
Hišće městna w lěćnym campje
Němske Pazlicy. Syć za dźěći a młodźinu w Biskopicach (KiJu) ma hišće swobodne městna w swojim lěćnym campje w Němskich Pazlicach a to wot 08. do 14. julija za dźěći w starobje 10 do 16 lět, kaž tež wot 16. do 20. julija za dźěći w starobje wot 6 do 8 lět. Nazorniše informacije a móžnosć knihowanja nańdźeće pod: www. aktiv-erlebnis-lausitz.de.
Blidarstwo w Běłym Chołmcu
We łužiskich wsach běchu stajnje hižo najwšelakoriše rjemjesła zakótwjene a su so zdźěla lětstotki zachowali. Dźensa je so wulki dźěl z tychle rjemjesłow bohužel pozhubił. W našej lětnjej seriji chcemy wobswětlić, hdźe běchu kotre rjemjesła doma a kotre wosebitosće su so při tym wobkedźbowali. (3)
Běły Chołmc je ze swojimi dźensa něhdźe 800 wobydlerjemi třeći najwjetši wjesny dźěl Łazowskeje gmejny. Stawizny wjeski sahaja wróćo hač do prěnjeho naspomnjenja sydlišća w lěće 1492. Běłochołmčenjo su z prawom hordźi na swoju wjes a na skutkowanje swojich prjedownikow. Wosebje na njebojazny bój serbskich roboćanow wo swobodu w lětach po 1760. W lěće 1794 steješe na čole zběžkarjow 28lětny ćěsla Jan Cuška, kotrehož kolebka steješe w Běłym Chołmcu. Wróćo zhladujo běše Běły Chołmc před połdra lětstotkom hišće dospołnje serbska wjes. Arnošt Muka zwěsći w lěće 1880, zo běše 91 procentow ludnosće serbska. Porno tomu zwěsći Arnošt Černik 1950, zo běše podźěl na mjenje hač połsta procentow woteběrał.
Mašiny made in Dźěžnikecy
Wustajeńca wo w Hornjej Łužicy zhotowjenych syčomłóćawach
Hornja Hórka (SN/bn). Syčomłóćawy made in Dźěžnikecy běchu – a zdźěla hišće su – po cyłym swěće wužiwane ratarske mašiny. Po informacijach Christiny Lehnert, bywšeje zamołwiteje za předań do sewjerneje Europy tehdyšeho kombinata Ludowy zawod (VEB) Fortschritt, eksportowachu je do „wjace hač 50 krajow“, předewšěm do „tak mjenowaneho socialistiskeho bratroweho wukraja“, ale na přikład tež do Bliskeho ranja a do Chiny. Wjeršk docpě produkcija w 1980ych lětach, jako dźěłachu w tworni Biskopicy/Dźěžnikecy dohromady něhdźe 7 000 přistajenych, třećina z nich w Dźěžnikecach; za čas jako VEB zhotowichu tam cyłkownje nimale 100 000 syčomłóćawow.
Krótkopowěsće (18.06.24)
Nowe wukubłanske móžnosće
Berlin. W zwisku ze změnu strukturow w brunicowych regionach na wuchodźe Němskeje su tři nowe wukubłanske poskitki wutworili. Tak chcedźa dualne wukubłanje fachowcow we wotpowědnych kónčinach spěchować, zdźěli wčera zwjazkowe hospodarske ministerstwo. To potrjechi wukubłanske směry we wobłukach hladanje, mechatronika a digitalizacija.
Dóstanu wjace mzdy
Budyšin. Dźěłaćerjo twarskeje branše w Budyskim wokrjesu dóstanu w přichodźe wjace mzdy. Přerěznje budźe tomu 260 do 380 eurow wjace na měsac, zdźěli dźěłarnistwo IG BAU wuchodna Sakska, kotrež so nad nowym tarifowym wobzamknjenjom wjeseli. Dźěło je z tym dale a atraktiwniše. Mjeztym so zaso wudani w twarskim wobłuku dźěłać.
Trjebaja 35 milionow eurow
Hdyž naše dźěći wuši bola
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk znatym a mjenje znatym chorosćam, zo by je čitarjam trochu bliže rozłožował (47).
Tři jubileje w Rownom swjećili
Serbsko-němske čitanje
Drježdźany. Swobodny zwjazk němskich awtorow Sakskeje (FDA) kaž tež Institut za slawistiku na Drježdźanskej TU přeprošujetej srjedu, 19. junija, we 18.30 hodź. na serbsko-němske čitanje do Domu rěčow na TU (Zellersche Str. 22, 2. poschod, rumnosć SE1-217). Čita mjez druhim Měrana Cušcyna. Hudźbnje wobrubitaj zarjadowanje Marta Hantušec a Frieder Sparsobrod.
Namša pod hołym njebjom
Slepo. Ewangelska wosada w Slepom přeprošuje njedźelu, 23. junija, w 10 hodź. na namšu za zdźerženje stwórby pod hołym njebjom na wosebitym městnje a to w zbywacym čwaku lěsa před Wochožanskej wuhlowej jamu, při dróze mjez Miłorazom a Slepom. Prěduje generalna superintendentka Theresa Rinecker ze Zhorjelca. Wšitcy kemšerjo su po mši na mjezsobnu rozmołwu – mjez druhim k temje „Zhubjena domizna“– a přikusk prošeni.
Posledni test w Chrósćicach
Serbske mustwo za Europeadu 2024 změje štwórtk, 20. junija, w 19 hodź. swoju poslednju testowu hru přećiwo mustwu SJ Chrósćicy na tamnišim sportnišću.
Janske jěchanje w Kózłem
Dešć běharjow njewotdźeržał
Woboje jej wjeselo a hobby
Minakałska pražernja kofeja ma nowu wobhospodarku
Minakał (UM/SN). Pražernja kofeja kotraž ma w Minakałskej starej kowarni swoje doma, ma nowu wobhospodarku. Je to Susann Rudolph. Wona je njedawno naslědnistwo Christine Michael-Hensel nastupiła, kotraž je pražernju w lěće 2021 wotewrěła.
Predikat „jara derje“ za oratorij
Budyšin (CM/SN). Oratorij „Elias“ Felixa Mendelssohna Bartholdyja, sobu najwuznamnišeho zastupjerja romantiki w Němskej, słuša tež dźensa zaso do koncertneho repertoira z nabožnej tematiku w Němskej. W času nacionalsocialistiskeho nadknjejstwa běše tuta jeho poslednja kompozicija – kaž wšo Mendelssohnowe tworstwo – z antisemitiskich přičin zakazane.
Wosebje dale woblubowany pak je monumentalny, přez dwě hodźinje trajacy oratorij „Elias“ w Americe a w Jendźelskej. K prapremjernemu předstajenju w lěće 1846 dojědźe sej na třista sobuskutkowacych z wosebitym ćahom z Londona do Birminghama. Samo kralowna Victorija wopyta ze swojim mandźelskim Albertom jedne z dalšich předstajenjow w Londonje.
