Dobra přičina jubilej woswjećić
Budyšin (WL/SN). Najstarše Budyske rěznistwo zhladuje tele dny na wosebity jubilej. 29. junija swjećeše tuchwilny mějićel tradicionalneho předewzaća Thomas Keller swoje 65. narodniny. Předewzaće wobsteji hižo w pjatej generaciji. 1. oktobra lěta 1876 běše Oswald Rossig, pradźěd Thomasa Kellera, rěznistwo załožił. Max Rossig je wobchod dale wjedł a po nim Gerhard Zschau. Dalši mějićel běše Gottfried Keller, kiž bě w lěće 1990 nawodnistwo swojemu synej Thomasej dale dał, kiž je zhromadnje z mandźelskej Marion najstarše rěznistwo Budyšina wjedł. Byrnjež hižo dołho skutkowało, je Kellerec předewzaće načasne a moderne. Thomas Keller angažuje so w regionalnym zjednoćenstwje rěznistwa a zasadźuje so za wukubłanje powołanskeho dorosta w sprjewinym měsće.
Požadarjow předstajili
Třo kandidaća nastupja lětsa k wólbam wyšeho měšćanosty w Běłej Wodźe
Běła Woda (AK/SN). K wólbam do zastojnstwa wyšeho měšćanosty w Běłej Wodźe, lětsa 1. septembra, powabja so žonje a muž. Wotpowědnu kandidatnu lisćinu je tamniši wólbny wuběrk póndźelu schwalił. Wólby su trěbne, dokelž so druha wólbna doba amtěrowaceho wyšeho měšćanosty Torstena Pötzscha (wolerske zjednoćenstwo Klartext) kónči. Po 14 lětach w zastojnstwje wón ze strowotnych, swójbnych a politiskich přičin hižo znowa njekandiduje, tak běše njedawno zdźělił.
Tołmača z rukomaj
Budyšin. „Spuk unterm Riesenrad – Jetzt ist Bautzen dran“ pokaza Němsko-Serbske ludowe dźiwadło sobotu, 6. julija, w 21.30 hodź. z tołmačenjom za hłuchich a na słuch słabych wopytowarjow.
Na Gig-festiwal
Róžant. Lětuši „God is good (Gig)-festiwal“ wotměje so wot 5. do 7. julija w Róžeńće. Pjatk wječor budźe w 19 hodź. Boža mša w hnadownej cyrkwi. Na jewišću putniskeje łuki wustupi mjez druhim pólske duwo Koncert Dwa Serca. Sobotu přihotuja organizatorojo dźěłarnički a njedźelu dźěćacy swjedźeń.
Krimi we wobchodźe
Budyšin. We wobłuku rjadu „Literarna kofejownja“ čita zajutřišim, pjatk, we 18.30 hodź. Hrubjelčanski awtor Křesćan Krawc. W srjedźišću wječorka steji jeho němskorěčna kriminalka „Der Wassermannräuber“. Zastup je darmotny, ale proša wo pjenježny dar.
Serbska pišćelowa hudźba live
Stefan Kießling, w Lipsku bydlacy a mjezynarodnje skutkowacy koncertny organist serbskeho pochada, nahra w Lipšćanskej nowej propstowskej cyrkwi swj. Trojicy na modernych pišćelach firmy Vleugels w Badensko-Württembergskim Hardheimje twórby šěsć komponistow.
Budyšin (CRM/SN). Wot Załožby za serbski lud spěchowana CD-edicija wuńdźe loni w prěnim nakładźe. Nětko je hudźbnik minjenu njedźelu w Michałskej cyrkwi w Budyšinje CD zjawnosći prezentował a při tutej składnosći wulki dźěl na njej zapřijatych kompozicijow na Eulowych byrglach zahrał. Nimo toho wjedźeše rozmołwy z komponistomaj Ulrichom Pogodu a Janom Cyžom wo jeju poćahu k pišćelam, kaž tež k pišćelowej hudźbje scyła.
Postrowjenje a rozžohnowanje
Přichodni a něhdyši šulerjo kroča pola Dźěłaćerskeho dobroćelstwa Łužica (AWO) we Wojerecach nowe puće. Tele dny su so tam z něhdyšimi wučomnikami rozžohnowali a nowych witali.
Wojerecy (SiR/SN). Dźěłaćerske dobroćelstwo Łužica (AWO) we Wojerecach je kónc tutoho šulskeho lěta swojich nowych wukubłancow a wukubłanče witało. Zdobom pak su so z tymi, kotřiž su wukubłanje zakónčili, rozžohnowali. To su a běchu zajimcy za wukubłanje we wobłukach hladar/hladarka a pomoc za hladanje. Posledni mjenowany wukubłanski puć je hišće młody a ma rosćacu potrjebu, předewšěm falowacych fachowych mocow dla. Pola AWO-Łužica su prěni přichodni pomocnicy hladanja hižo loni swoje wukubłanje zahajili.
Wěriwi ze serbskich katolskich wosadow su na swjedźenju Marije ...
Krótkopowěsće (03.07.24)
Wjac wučomnikow za hladanje
Kamjenc. Ličba wučomnikow, kotřiž rozsudźichu so loni za wukubłanje w hladanskim powołanju, je rozrostła. Kaž krajny statistiski zarjad w Kamjencu zdźěli, bě jich cyłkownje 8 856 žonow a muži z wotpowědnym wukubłanjom. To je rozrost wo 7,7 proc. Podźěl žonow je 74,7 proc. Mjez wučomnikami su tež dorosćeni nad 30 lět.
Wotewrja běrow w Ulan Batoru
Drježdźany. W nadawku sakskeho ministerstwa za wědomosć kaž tež sakskeje krajneje konferency rektorow wotewrě Freibergska hórniska akademija w mongolskej stolicy Ulan Bator nowy wědomostny zwiskowy běrow na campusu tamnišeje uniwersity. Swobodny stat chce tu młodych Mongolčanow na studij do Sakskeje wabić.
Drohoćinki zaso „doma“
Mylenja jědźenja (1)
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk znatym a mjenje znatym chorosćam, zo by je čitarjam trochu bliže rozłožował (48).
Jědźenje je jedna ze zakładnych potrěbnosćow čłowjeka. Kóždy z nas dyrbi jěsć, zo by přežiwił. Přiběrajcy zaso na to dźiwamy, što jěmy. Wšako zwyši njestrowe zežiwjenje riziko schorjeć. Runje tak rozsudne kaž wuzwolenje ćěłu tyjacych zežiwidłow je mnóstwo jědźe wažny faktor za strowotu. Wot časa koronapandemije incidency mylenja jědźenja zaso stupaja, wosebje pola młodych ludźi. Woni maja zdźěla wulke problemy prawe mnóstwo namakać. Oficielny register diagnozow naliča nam tři mylenja jědźenja: anoreksiju, bulimiju a binge-eating. Anoreksiju wopisujemy w němčinje wobchadnorěčnje tež jako „Magersucht“. Je-li tomu woprawdźe tak, ma so situacija jako akutna posudźować.
Policija (02.07.24)
Wolij na dróze
Pančicy-Kukow. Zastojnicy Kamjenskeho policajskeho rewěra so zašłu njedźelu njemało dźiwachu. Dopołdnja běchu woni na Dróze Ćišinskeho w Pančicach-Kukowje zwěsćili, zo je někajke jězdźidło wolij zhubiło. Wolij bě po čarje, kotraž bě něhdźe połsta metrow dołha a 30 centimetrow šěroka, wuběžał a asfalt zamazał. Dobrowólna wohnjowa wobora z Pančic-Kukowa dyrbješe njedostatk wotstronić. Po tym přijědźe rjedźenske předewzaće, kotrež je z wosebitymi srědkami jězdnju zaso wurjedźiło. Nažel njeje znate, štó je škodu zawinił a hač wón sam wo tym wě.
Dalši „Snobjed z kulturu“
Biskopicy. We wobłuku rjadu „Kultur.Frittag“ wuhotuje Biskopičanski Dom zetkawanja B28 kóždu prěnju njedźelu měsaca „Snobjed z kulturu – kultura k snobjedej“. Přichodne zarjadowanje zaha- ja 7. julija, w 10 hodź., wobmjezowaneho městna dla proša zarjadowarjo wo přizjewjenje, a to telefonisce pod čo. 03594 256 210 161 abo z mejlku na . Z trochu zbožom pak je brunch tež krótkodobnje přistupny. W 12 hodź. slěduje předstajenje klankoweho jewišća Hellwig z „Hru za wulkich“.
Kralownje zaklinčitej
Budyšin. We wobłuku rjadu Budyskeho pišćeloweho lěća přeproša Budyski cyrkwinskohudźbny skutk na dalši „koncert za dwoje pišćele“. Jutře, 3. julija, chcetaj tachantski kantor Kamil Maksymilian Kulawik na Kohlowych a cyrkwinskohudźbny direktor Michael Vetter na Eulowych pišćelach Budyskeje tachantskeje cyrkwje swj. Pětra připosłucharjow z rědkimi twórbami putać. Tydźeń pozdźišo koncertuje Tomaš Žur we wobłuku rjadu w Budyšinje. Koncertaj započnjetaj so wobě w 19.30 hodź., zastup je stajnje darmotny. Pjenježne dary pak so njewotpokazuja.
