Policija (27.06.24)
Starožitnosće pokradnył
Wojerecy. Njeznaty muž bě wutoru nawječor we Wojerecach, Lubušu a Brětni po puću a prašeše so wobydlerjow za starožitnosćemi. Najprjedy da sej wón antikwity pokazać, na to pak z nimi so zhubi, wudawajo, zo chce do awta po kwitowanku hić. Tak pobrachuje nětko 77lětnemu mužej we Wojerecach drohi kapsny časnik a žonje w Lubušu pjeć złotych pjeršćenjow w hódnoće 1 800 eurow. W Brětni je sej skućićel wšelake debjenki pokazać dał, potom pak so zaso wotsalił.
Nětko dyrbja z rezerwy brać
Přidatne wudawki za nowotwar pěstowarnje so hižo njespěchuja
Róžant (JK/SN). Hač donětka su přidatne wudawki za nowu Ralbičansku pěstowarnju docpěli nahladnu sumu 1,1 miliona eurow. Kaž SN hižo rozprawjachu, je Sakska natwarna banki (SAB) přidatne wudawki z 90 procentami spěchowała. Tole pak nětko wuběži, dokelž Swobodny stat Sakska hižo dosć srědkow za spěchowanje nima. To wuskutkuje so tež na staw financow gmejny Ralbicy-Róžant.
Na minjenym posedźenju gmejnskeje rady wuradźowachu radźićeljo wo přidatnych 21 000 eurach za estrich. Firma je gmejnje ultimatum stajiła, zo hižo dale njedźěła, hdyž krótkodobnje přidatne srědki w mjenowanej wysokosći njedóstanje. To by měło fatalne sćěhi za dalši wotběh twara, dokelž njemóža potom durje zatwarić, elektriku dozhotowić a tepjenske a sanitarne dźěła dokónčić. Gmejna drje by pjenjezy měła, ale wašnje, kak stej wona a planowanski běrow z faktom přidatnych srědkow wobchadźałoj, radźićelow rozhori.
Bywše rěznistwo dźensa hladarnja
We łužiskich wsach běchu stajnje hižo najwšelakoriše rjemjesła zakótwjene a su so zdźěla lětstotki zachowali. Dźensa je so wulki dźěl z tychle rjemjesłow bohužel pozhubił. W našej lětnjej seriji chcemy wobswětlić, hdźe běchu kotre rjemjesła doma a kotre wosebitosće su so při tym wobkedźbowali. (6)
Denise Schreiber, Dennis Bilik, Simon Naumann a Greta Schmidt ...
Krótkopowěsće (27.06.24)
Pjenjezy za LAB schwalene
Budyšin. Dohromady 68,6 milionow eurow je etatny wuběrk zwjazkoweho sejma wčera za planowany slědźerski centrum za twarske maćizny LAB w Budyšinje schwalił. „To je dobra powěsć za wobydlerstwo w našim wokrjesu a za twarske hospodarstwo po wšěm swěće“, wuzběhnje Budyski krajny rada Udo Wićaz (CDU) w nowinskej zdźělence. LAB přeslědźuje móžnosće, kak hodźało so spěšnje, tunjo a naslědnje twarić.
Europa nadal přewjele pije
Genf. Po aktualnej studiji zwěsća Swětowa strowotniska organizacija WHO, zo hodźi so „Europa nadal jasnje po rozdźělnych wašnjach konsuma alkohola rozrjadować, korjenjace hłuboko w kulturje“. Tak pije so na wuchodźe najwjace palenca a na juhu skerje wino. Zasadnje měło so „njewotwisnje wot družiny mjenje pić, wšako zemrěje na 100 000 wobydlerjow na přikład w Němskej 25, w Pólskej 50 a w Ukrainje 125 ludźi wob lěto direktnje w zwisku z alkoholom“.
„Winnetou II“ z nowym rekordom
Chinska mrětwa nuklow kaž epidemiska žołma
Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich lubuškow prócuja. K tomu přinošować chce naša serija z pokiwami z weterinarneje mediciny. (35)
Mjez plahowarjemi nuklow je chinska mrětwa wuwołana. Přetož wona móže w zmysle słowa přez nóc cyły wobstatk nuklow morić. Druhe mjeno za mrětwu je RHD (Rabbit hemorrhagic disease), štož da so jako krawjaca chorosć nuklow přełožić.
Rozžohnowanje a witanje
Pytaja pomocnu hladarku
Chrósćicy. Dom swjateje Ludmile w Chrósćicach poskića dźěłowe městno pomocneje hladarki abo pomocneho hladarja starych ludźi. Wone hodźi so hnydom wobsadźić. Dźěło płaći so po tarifowych rjadowanjach Carity. Požadanja přijimuja z póštu abo z mailku na . Nadrobniše informacije poda nawodnica Mónika Wenclowa pod telefonowym čisłom 035796 947330.
Zakónča lětuši rjad na zahrodźe
Budyšin. Ze štyrjomi koncertami zakónči Serbski ludowy ansambl lětuši rjad zarjadowanjow na Kulturnej zahrodźe. Jutře, štwórtk, chce Duo Kratschkowski wopytowarjam pod Röhrscheidtowej baštu mjez druhim židowsku hudźbu, francoske šansony kaž tež kompozicije Antonija Vivaldija a Astora Piazzole na akordeonomaj předstajić. Zajutřišim slěduje wustup seksteta Tango Misterio, sobotu wotwjeduje skupina Septana publikum do „poetiskeho swěta persiskeje hudźby“. Njedźelu postara so Trio Voyage z delnjoserbskej jazzowej spěwarku Lenu Hauptmann wo kónčny akcent.
Policija (26.06.24)
Pjenježne dary pokradnyli
Wojerecy. Přewšo njekřesćansce su so njeznaći minjenu njedźelu popołdnju we Wojerowskej Janskej cyrkwi zadźerželi. Kaž policija zdźěli, wočinichu woni w času wot 12 do 17 hodź. jałmožnu a wzachu z njeje njeznatu sumu pjenjez. Nimo toho pokradnychu drjewjanu pišćel, z kotrejž su w cyrkwi dalše pjenježne dary zběrali a w kotrejž bě tohorunja njeznata suma pjenjez. Jeničce wěcnu škodu trochuje policija na 150 eurow.
Wollmannecy na čole wobory
Kameradojo w Sćijecach na stolětne wobstaće zhladowali
Sćijecy (WL/SN). Hnydom dwójny jubilej su minjeny kónc tydźenja w Sćijecach swjećili. Kameradojo dobrowólneje wohnjoweje wobory zhladowachu na swoje stolětne wobstaće, mjeztym zo młodźinska wobora mjeztym 25 lět wobsteji. Tuchwilu maja w Sćijecach 25 muži a pjeć žonow w aktiwnej słužbje, dalšich pjećoch w starobnym wotrjedźe kaž tež 24 dźěći a młodostnych w młodźinskej woborje.
Zahajili su swjedźeń pjatk z přijećom hóstnych woborow. Mjez gratulantami bě zapósłanc Sakskeho krajneho sejma Marko Šiman (CDU), kiž runje tak kaž wjelelětny zamołwity za młodźinsku woboru Maćij Handrik swoje postrowy zdźěla serbsce přednjese. Přijěli běchu tohorunja kameradojo Budyskeje powołanskeje wobory kaž tež ći z dobrowólnych woborow z wokolnych wsow a gmejnow. Sobotu běchu Sćiječenjo a jich hosći na dźeń wotewrjenych duri do gratownje přeprošeni.
