Dźěło w zahrodce a rostlinarni w juliju (9)
Z tutym rjadom přinoškow chcemy wam měsačnje poručeć, što móžeće w zahrodce abo w rostlinarni zdokonjeć. Přejemy wam wjeselo při dźěle a radosć při wobkedźbowanju toho, štož pod wašimaj rukomaj rosće.
Policija (09.07.24)
Wobchadna kontrola ze sćěwkami
Budyšin. Zastojnicy Budyskeje policije zadźeržachu pjatk dopołdnja awto typa Audi A 6 na Dróze Thomasa Manna, dokelž awtowej značce hižo płaćiwej njeběštej. W běhu kontrole zwěsćichu, zo šofer tež płaćiwu jězbnu dowolnosć nima. Z tym běše jězba za 21lětneho němskeho staćana zakónčena. Policisća wotewzachu jemu awtowe klučiki a wotšrubowachu njepłaćiwej awtowej znamjeni. Młody muž ma so nětko jězdźenja bjez jězbneje dowolnosće a bjeze zawěsćenja dla před sudnistwom zamołwić.
Wodźenja w čěšćinje
Wojerecy. Měšćanski muzej a hród Wojerecy poskića zajimcam štwórtk, 11. julija, w 11 a 13 hodź. wodźeni po wustajenišću w čěšćinje. Nimo regularneho zastupa sej přidatny popłatk nježadaja. Dźeń pozdźišo slědujetej w 11 a 13 hodź. – tohorunja w čěšćinje – wodźeni po bywšim lěhwje wójnskich jatych w Narću. Popłatk na wosobu wučinja 5 eurow resp. potuńšeny 3 eura. Přizjewjenja su pak telefonisce pod čo. 03571-20937504 pak z mejlku na móžne.
Wopominaja Kaeublera
Budyšin. Składnostnje 100. posmjertnin zasłužbneho něhdyšeho Budyskeho wyšeho měšćanosty dr. jur. Konrada Johannesa Kaeublera přeproša Muzej Budyšin štwórtk, 11. julija, na wopomnjenske zarjadowanje. W 19 hodź. přednošuje Eveline Günther wo „wusahowacym žiwjenskim skutku Kaeublera, kotremuž mamy so na přikład za twar Mosta měra a dźensnišeho krajnoradneho zarjada dźakować“. Nimo toho chce wobydlerska iniciatiwa Die Eumeniden wo žiwjenju Kaeublera informować. Zastup je darmotny.
Wobnowja wjesny puć we Łazu
Gmejna a Budyski wokrjes matej twarske dojednanje
Łaz (AK/SN). Wobnowjenje statneje dróhi S 108 a z tym tež wjesneho přejězda we Łazu ma spěšnje pokročować. Po prěnim twarskim wotrězku wot Penny-wikow hač do wjesneho wuchoda směr Běły Chołmc lětsa, ma so klětu na wuchod wsy, na směr Delni Wujězd dale twarić. Gmejnska rada je njedawno jednohłósnje twarskemu dojednanju mjez Łazom a Budyskim wokrjesnym zarjadom za dróhotwar a wobchad přihłosowała. „Wudate trěbne financne srědki za twarske zwoprawdźenje maja so při hospodarskim planowanju 2025 wobkedźbować“, wuswětli nawoda wěcneho wobłuka twarski a imobilijowy management Jens Kieschnick. Ponowjenje dróhi je zhromadna naprawa gmejny Łaz a Sakskeho krajneho zarjada za dróhotwar a wobchad. Planowane je mjez druhim tež ponowjenje chódnika, nadróžneho wobswětlenja, kanala za dešćikowu wodu, wodowoda a busowych zastanišćow. Tuchwilu twari so z wotbóčki Lěsna dróha hač k Łazowskej tankowni. Busowe zastanišća při S 108 so wottorhaja.
Hale wjacorym firmam z domicilom
We łužiskich wsach běchu stajnje hižo najwšelakoriše rjemjesła zakótwjene a su so zdźěla lětstotki zachowali. Dźensa je so wulki dźěl z tychle rjemjesłow bohužel pozhubił. W našej lětnjej seriji chcemy wobswětlić, hdźe běchu kotre rjemjesła doma a kotre wosebitosće su so při tym wobkedźbowali. (9)
Nowa Wjeska ze swojimi ani 180 wobydlerjemi słuša dźensa do Worklečanskeje gmejny. W lěće 2017, składnostnje 400. róčnicy prěnjeho naspomnjenja wsy, předstajichu Nowowješćenjo we wulkim swjedźenskim ćahu bywše a nětčiše rjemjesła, mjez druhim tež, kak je so wjes w NDRskim času ze srjedźišćom wulkoratarstwa mjez Njebjelčicami, Chrósćicami a Ralbicami stała. Tehdy su składy za zorno, wuběranišćo běrnow, sušernje tobaka a porjedźernje ratarskich mašinow nastali. Tak tomu dóńdźe, zo je so napohlad zapadneje wsy dospołnje změnił. Tam natwarichu Nowowješćan a Worklečan ratarjo 14 wulkich halow. Prěnju tajku su w lěće 1968 dotwarili. Poslednju hobersku halu su za tehdyšej Krawcec ležownosću w lěće1985 dotwarili.
Projekt Worklečanskeje gmejny „Kupa komunikacije, kreatiwity a ...
Choćebuska Lodka bórze w nowym šaće
Choćebuz (SN/BŠe). Serbska kulturna informacija Lodka w Choćebuzu, budźe přichodne měsacy wobšěrnje přetwarjena. „Próstwa je hižo dlěje předležała“, wujasni nawodnica imobilijoweho zarjadnistwa Załožby za serbski lud, Serafina Pašcyna, na naprašowanje. Wuhotowanje Lodki je prosće dodźeržane. Kulturna informacija přećehnje přechodnje do pódlanskeho domu, hdźež steji wobchod k dispoziciji. Tam je městna dosć, tak zo móžetej sobudźěłaćerce dale swoje poskitki zajimcam spřistupnić. „Za přećah Lodki je tydźeń předwidźany. W tutym času wostanje informacija zawrjena“, Serafina Pašcyna rozjasni. Přećah je dźě chětro wobšěrny. Nimo techniki a wudźěłkow ma so tež kasa, meble atd. zarjadować. W přichodźe dyrbja so zamołwići tež hišće mjez wšelakimi wariantami rozsudźić. Hakle potom budźe jasne, w kotrym nowym šaće so Lodka prezentuje. Twarske dźěła znajmjeńša hač do kónca lěta traja.
Krótkopowěsće (09.07.24)
Wujězd Porchow zašlahany
Porchow. Štóž je jutře, srjedu, na A 4 wuchodnje Drježdźan do směra na Zhorjelc po puću, njemóže mjez 10 a 13 hodź. wujězd Porchow wužić. To je komunikaciski team we wotnožce wuchod awtodróhoweje towaršnosće Zwjazka zdźělił. Woni dyrbja tón čas sćěwki njezboža wotstronić. Jako alternatiwny wujězd poručeja awtojězdźerjam sćěhowacy wujězd do Hornjeho Wujězda.
Bičwolejbulowu turu zahajili
Ralbicy. W Ralbicach je so wčera bičwolejbulowa tura Radija Satkula zahajiła. Dobyło je mustwo „Słónčna róža“ wokoło kapitana Eliasa Kummera. Něhdźe 350 ludźi je hry přewodźało. Přichodnu póndźelu pokroči turněr w Jaseńcy, potom wuhotowany wot dwanatkow Serbskeho gymnazija Budyšin. Dohromady wosom stacijow we wosom wsach Hornjeje Łužicy steja na programje tury. Finale wuhraja wolejbulisća 26. awgusta w Miłoćicach.
Rozsud wo swětowym herbstwje
Puć do Róžanta ponowjeny
Skót pře tetanus šćěpić
Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich lubuškow prócuja. K tomu přinošować chce naša serija z pokiwami z weterinarneje mediciny. (36)
Hišće před něšto wjace hač 130 lětami móhła mała rana k žiwjenjastrašnej situaciji rozrosć. Hakle ze sławnym Emilom von Behringom su prěnje šćěpjenja přećiwo tetanusej wuwili. Tehdy hišće zasadźowachu pasiwnu imunizaciju pola wojakow w Prěnjej swětowej wójnje. Dźensa dźěći samozrozumliwje najpozdźišo dwaj měsacaj po narodźe aktiwnje pře tetanus šćěpja.
Imunitny škit pak počasu přeco zaso woteběra. Jedne z prěnich prašenjow, po tym zo sy po kusnjenju přez psa do nuzoweje přijimarnje dóšoł, je, hač sy w minjenych dźesać lětach přećiwo tetanusej šćěpjeny.
Domjacy skót so prawidłownje pře tetanus nješćěpi, nimo koni. Te dóstawaja znajmjeńša kóžde druhe lěto sykawu přećiwo rozbudźakej clostridium tetani. To pak na tym njezaleži, zo je kóń jeničke zwěrjo, w kotrymž móže rozbudźak tetanus wuwabić.
