Krótkopowěsće (27.03.24)
Dar Jürgena Maćija přiwzali
Budyšin. Wobstatk eksponatow fotografikarja Jürgena Maćija w Budyskim Serbskim muzeju je wospjet rozrostł. Budyski wokrjes je dar přiwzał, tak zo wopřijima zběrka wotnětka tež seriju „Agrarlandschaften“ a kasetu z 23 portretami a awtografami cyłkownje dźewjeć serbskich spisowaćelow, mjez druhim Kita Lorenca, Jurja Kocha a Jurja Brězana. Maćij „dźakuje so rukopisy přewostajacym awtoram za podpěru“.
Medicinska uniwersita we Łužicy
Choćebuz. Braniborski kabinet je wčera w Podstupimje wobzamknył, zo ma so w Choćebuzu medicinska uniwersita Łužica – Carl Thiem załožić. Naćisk zakonja dyrbi parlament wobjednawać. Koncept noweje uniwersity je naprawa wuwića strukturow we łužiskej pohórnistwowej kónčinje.
Digitalizacija so wudaniła
Policija (26.03.24)
Moped manipulowany był
Ćisk. W nocy na póndźelu je wodźer mopeda w Ćisku spytał, so policajskej kontroli wuwinyć. Młodostny bě wobsadce policajskeho awta na Budyskej dróze napadnył, přikaz zastać wón ignorowaše. Na nawsy pak policisća 16lětneho dosahnychu. Spěšnje so wukopa, čehodla bě wón ćeknył. Moped njebě zawěsćeny a technisce manipulowany. Za to wužiwane dźěle pochadźachu po wšěm zdaću z padustwow. Nimo toho młodostny scyła žanu jězbnu dowolnosće njewobsedźeše. Dale jěć wón tuž hižo njesmědźeše. Jězdźidło policisća sćazachu.
Mało chwile za prawy rozsud
Pro a kontra přepławjenskeje hrjebje w Šunowje dla
Róžant (JK/SN). Gmejna Ralbicy-Róžant ma płaćiwy koncept za hladanje a wobhospodarjenje wodźiznow 2. rjadu. Koncept je wuwiła a zestajiła dźěłowa skupina gmejnskich zastupjerjow pod fachowym nawodom inženjerskeho běrowa Stowasser z Radebeula. W koncepće je mjez druhim předwidźane, wěste wodźizny na teritoriju gmejny porjadnje pod wobswětoškitnymi aspektami a wobkedźbujo škit před wulkej wodu wuporjedźić a brjohi podłu wodźiznow skrućić.
Njepowalna kačka
Pisany wěnc poskitkow
Kofej w třoch z HERCAMI
Budyšin. Kónc 1960ych lět zdobychu Beatles a Rolling Stones swět, w Pólskej znaješe kóždy Czerwone gitary. Tež we Łužicy chcychu młodźi Serbja beatowu hudźbu činić a załožichu skupinu HERCY. Wo swojej hudźbje a wo swojich wosobinskich dopomnjenkach na tehdyši čas rozprawjeja čłonojo skupiny na přichodnym zarjadowanju w rjedźe „Kofej w třoch“, jutře, srjedu, w 15 hodź. w Budyskim Serbskim muzeju. Zarjadowanje poćahuje so na inscenaciju Němsko-Serbskeho ludoweho dźiwadła „Na tamnym boku měsačka“ Lubiny HajdukVeljkovićoweje, kotraž je hač do 6. apryla na hłownym jewišću dźiwadła widźeć.
Přeprošuja na rozpominanje
Smochćicy/Budyšin. Smochčanske kubłanišćo swjateho Bena přeprošuje ćichi pjatk na rozpominanje do Budyskeho wopomnišća na Weigangowej. Křižowy puć započnje so w 10 hodź. Na zarjadowanju spominaja na horjo woporow diktaturow a namócneho knjejstwa 20. lětstotka hač do dźensnišeho. Po tym móža sej wobdźělnicy trajnu wustajeńcu wobhladać. Zajimcy zetkaja so w 9.50 hodź. před wopomnišćom.
Wjace wěstoty za dźěći
Šćeńca (AK/SN). Budyski wokrjes chce w Šćeńcy we Łazowskej gmejnje wot apryla Stróžansku dróhu ponowić. „Za to dyrbimy dróhu dospołnje zawrěć. Prěni wotrězk, kiž wobsahuje 190 metrow dróhi, traje wot 22. apryla hač do 20. junija. Hłowne křižowanišćo jako druhi wotrězk traje wot 21. junija hač do 2. awgusta. Po móžnosći k spočatkej noweho šulskeho lěta ma wšitko hotowe być“, rjekny Maik Wirrig z wokrjesneho zarjada za dróho- a hłubokotwar na njedawnej zjawnej rěčnej hodźinje wjesnjanosty w Šćeńcy.
Něhdźe tysac wopytowarjow je njedźelu wiki jutrownych jejkow w ...
Změnu wustawkow přestorčili
Hižo tydźeń do wčerawšeho 23. posedźenja Budyskeho wokrjesneho sejmika běše so frakcija AfD wo šmórnjenje dnjoweho dypka „Změna hłownych wustawkow wokrjesa Budyšin“ postarała a to medijam jako „wulki wuspěch“ zdźěliła.
Budyšin (SN/MiP). W naspomnjenej změnje hłownych wustawkow dźěše mjez druhim wo to, dotal štyri wokrjesne wuběrki na dwaj zredukować a z tym tež ličbu w tu sobuskutkowacych krajnych radźićelow wot 92 na 52 znižić. Frakcija AfD ma to „za masiwne zasahnjenje do prawa sobuskutkowanja radźićelow“ a je na posedźenju wokrjesneho wuběrka tydźenja pjatk próstwu na změnu dnjoweho dypka zapodała.
Krótkopowěsće (26.03.24)
Wolerske zjednoćenstwo nastupi
Radwor. Serbske wolerske zjednoćenstwo w Radworju nastupi k wólbam gmejnskeje rady 9. junija z wosom kandidatami. Tole su na wčerawšim posedźenju zjednoćenstwa w Radworskej „Meji“ wobzamknyli. Při komunalnych wólbach před pjeć lětami běchu ludźo po tutym puću dweju serbskeju zastupnikow do gmejnskeje rady wuzwolili. Dalši Serbja kandiduje mjez druhim na lisćinje CDU.
Kampanja za turizm
Budyšin. Wobsedźerka serbskeho hosćenca „Wjelbik“ w Budyšinje, Mónika Lukašowa, je jedne ze sydom wobličow noweje turistiskeje kampanje za region mjez Žitawskimi horinami we wuchodźe a wjace hač 20 jězorami wokoło Lipska w zapadźe Sakskeje. Plakaty noweje imegoweje kampanje maja dwurěčnosć w Hornjej Łužicy widźomnu činić a wopytowarjow přiwabić.
Słowakscy fachowcy do Čěskeje
