Krótkopowěsće (31.08.23)
Özdemir w Hornjej Łužicy
Stróža/Koćina. Zwjazkowy ratarski minister Cem Özdemir (Zeleni) je dźensa z hosćom w Hornjej Łužicy. Zhromadnje ze sakskim ratarskim ministrom Wolframom Güntherom wopyta wón mjez druhim Ringpfeilec hatarstwo w Stróži a Koćinski Krabatowy mlokowy swět. Ministraj chcetaj sej dźěławosć zawodow spřistupnić.
Starosć wo chorownju
Biskopicy. Frakcija CDU Biskopičanskeje měšćanskeje rady starosći so wo dalše wobstaće tamnišeje chorownje. Tuž je wona wyšemu měšćanosće nadawk dała a wokrjesny sejm wo to prosyła, so za dlěšodobne zachowanje chorownje hornjołužiskich klinikow (OLK) na stejnišću Biskopicy zasadźić. Zwjazkowe knježerstwo planuje zakoń wo reformowanju chorownjow.
Wjele bjezdźěłnych z Ukrainy
Plan za wuwiće regiona je wobkrućeny
Statny minister za regionalne wuwiće, Thomas Schmidt (CDU), předsydźe regionalneho planowanskeho zwjazka Hornja Łužica/ Delnja Šleska wobkrućenje podlěšenja regionalneho wuwićoweho plana přepoda.
Drježdźany (SN/MG). Regionalne planowanje je w Sakskej naležnosć kraja. Nimo toho su štyri regionalne planowanske wobłuki za cyłkowne planowanje we wotpowědnych kónčinach zamołwite. Zakład za jich skutkowanje je w lěće 2013 wudaty krajny wuwićowy plan.
25. awgusta přepoda w Drježdźanach statny minister za regionalne wuwiće, Thomas Schmidt, wobkrućenje za nowy, druhi tajki plan za planowanski region Hornja Łužica/Delnja Šleska. Přiwzał je plan předsyda planowanskeho zwjazka, krajny rada Zhorjelskeho wokrjesa, Stephan Meyer (CDU).
„Předźěłany regionalny plan za Hornju Łužicu a Delnju Šlesku je poradźeny přikład za fleksibelne, kreatiwne planowanje rumow. Z regionalnym planom je planowanski zwjazk dopokazał, zo móže rumnostne planowanje tež na wulke, nowe wužadanja kaž změnu strukturow reagować“, wuzběhowaše minister Schmidt.
Štó je njeskutk wobkedźbował?
Skónčnje jednotne měnjenje
Gmejnscy radźićeljo so na stejišćo k fotowoltaice dojednali
Róžant (JK/SN). Dołho je trało, nětko pak je jasne: gmejnska rada Ralbic-Róžanta je so na jednotne měnjenje k planowanej fotowoltaikowej připrawje pola Šunowa dojednała. Na minjenym posedźenju parlamenta měješe kóždy radźićel chwile, swoje wosobinske měnjenje k temje zwuraznić. Do toho bě wjesnjanosta Hubertus Ryćer (njestronjan) přitomnych wobydlerjow Šunowa namołwił, swoje měnjenje k naležnosći podać. Při tym so pokaza, zo je wulka wjetšina ludźi přećiwo nastajenju tajkeje připrawy pola Šunowa. Tež mjeztym redukowana wulkosć płoniny wobydlerjow njepohnuje, so hinak rozsudźić.
„Čej’ da sy?“ w kniharni
Wulět swójbow lětsa do Kulowa
Ze serbskimi mjenami so rozestajeli
Wochozy. Bertko, Laduš, Kowal, Wochozy a Delni Wujězd – tele serbske mjena holanskich kónčin a wjele dalšich stejachu minjeny pjatk w srjedźišću zarjadowanja w Šwjelowej bróžni we Wochozach. Ta bě kopata połna wopytowarjow. Nimale 30 zajimcow bě přišło na zarjadowanje z dr. Hyncom Rychtarjom, kiž přednošowaše wo nastaću a wuwiću swójbnych a městnych mjenow. Jeho rozłožowanja běchu tak putace, zo sćěhowachu je připosłucharjo dwě hodźinje dołho z połnej koncentraciju.
Wjetšina ludźi bě z přećom wuswětlenja swojeho mjena abo mjenow znatych přichwatała. Woni móžachu z wotmołwami a wjele dalšimi informacijemi spokojom domoj hić. Tež po zarjadowanju so někotři wobydlerjo Wochoz hišće dlěje z dr. Rychtarjom rozmołwjachu. Iniciatorka popołdnja bě motiwatorka za serbsku rěč wokoło Slepoho a Wochoz Juliana Kaulfürstowa.
Mjenowědne zarjadowanje wotmě so we wobłuku rjada „Zetkanje na kofej“, kotrež towarstwo Šwjelowa bróžnja w běhu ćopłeje sezony jónu wob měsac přewjeduje. Juliana Kaulfürstowa
Myto za angažement młodostnych
Budyšin (SN). Syć za dźěćace a młodźinske dźěło spožči lětsa znowa myto za młodźinski angažement w Budyskim wokrjesu. Z mytom připóznawaja a hódnoća w zjawnosći wosebity angažement młodostnych. Ze spožčenjom myta pokazuje so na mnohotnosć, energiju a kreatiwitu młodostneho w čestnohamtskim dźěle a na słužbu za towaršnosć a w towaršnostnym žiwjenju. To móže wuwabić motiwaciju a być přikład za druhich, so aktiwnje a čestnohamtsce angažować.
Myto za młodźinski angažement spěchuje so z programa partnerstwa za demokratiju w Budyskim wokrjesu, wot Budyskeje nalutowarnje a Wuchodosakskeje nalutowarnje ze sydłom w Drježdźanach.
