Z tutym rjadom přinoškow chcemy wam měsačnje poručić, što móžeće w zahrodce abo w rostlinarni zdokonjeć. Přejemy wam wjeselo při dźěle a radosć při wobkedźbowanju toho, štož pod wašimaj rukomaj rosće.

Poslednje skónčne dny w februaru wabjachu nas zaso dlěje won do přirody a do zahrodki. Słónčko so směješe a ćopliše temperatury lubjachu wjeselo při přihotowanju hrjadkow, parnišćow (Frühbeet) a powyšenych hrjadkow kaž tež při wusywanju a wosadźenju młodych rostlinkow za nadźijomnje bórzomne žně. Přiwšěm měli temperatury dale kruće wobkedźbować. Direktnje do hrjadki wusyć móžemy nětko w měrcu tołstu bunu, spinat, cyblu, ale tež lěćny porej, radisku a morchej. Zo bychmy prawidłowny wotstawk mjez jednotliwymi rynkami dodźerželi, tu mały tip, kotryž móhł při tym pomhać: Na wobě wonkownej a na srjedźny zub hrabjow tyknu so małke prózdne cylindriske drjewčka a hižo mam hrjebičkowak (Rillenzieher), z kotrymž sej rjane rune rynčki sćaham. Tež zela kaž pětršilku, lompuch (Sauerampfer) abo cyblink (Schnittlauch) móžu nětko hižo wusyć.