Při nazymskim rjedźenju něštožkuli wobkedźbować
Zahrodkarjam hladaja tuchwilu nazymske dźěła do rukow. Tak maja so hnězdźenske kašćiki rjedźić. W nich dyrbja žiwe parazity kaž ptače pchi, roztoče a klěšće, wotstronić, zo njebychu młodźata klětu nadměru wohrožene byli. Za rjedźenje pak njeměli sylne chemiske čisćenske abo samo desinfekciske srědki wužiwać. Dosaha, hnězdźenski kašćik dokładnje wumjesć.
Štóž ma zahrodowy haćik, měł jón před lisćom, wotemrětymi rostlinami a zmjerzkom škitać, zo by nalěto zaso jasnje a bjez algow k žiwjenju wotućił. Ryby dyrbja z basenkow, kotrež dosć hłuboke njejsu, přez zymu do akwarija přećahnyć. Bónčawy a druhe wódne rostliny, kotrež zmjerzk wohroža, wzmiće z haćika a dajće je w bowje z wodu na chłódnym, ale před zmjerzkom škitanym městnje přezymować. Samsne płaći wězo za hatnu klumpu, njeje-li wona znajmjeńša 80 centimetrow hłuboko we wodźe, móhła škodu poćerpjeć.
Dalši štom za dźěći sadźili
Z hinašim widom na domiznu
Gratownja klětu hotowa
Wažnej twarskej předewzaći w Slepjanskej gmejnje pokročujetej
Slepo (AK/SN). Nowotwar wohnjowoborneje gratownje w Slepom a nowa Witaj-pěstowarnja „Milenka“ w Rownom derje pokročujetej. Tole rjekny Annet Dreißig z twarskeho wotrjada Slepjanskeho zarjadniskeho zjednoćenstwa wčera na posedźenju Slepjanskeje gmejnskeje rady. Gratownju chcedźa přichodny tydźeń wotwonka wobmjetać. Hač dosrjedź decembra ma nutřkowny wobmjetk hotowy być. Klětu maja potom suchotwar, tepjenje, přewětrjenje a sanitarne připrawy slědować. Za to je zymske tepjenje w twarjenju předwidźane. Kaž wčera zdźělichu, ma wohnjowoborna gratownja klětu kónc julija hotowa być.
Za nowotwar Rownjanskeje pěstowarnje „Milenka“ su nětko zrěčenja za hruby twar, twar róštow a dalše rjemjesła wotpósłali. Cil je, zo ma hruby twar hač do kónca decembra hotowy być. W januaru chcedźa potom wjerch kłasć. K časowemu njedostatkej je dóšło, dokelž je twarska firma njejapce insolwencu přizjewiła. „Hač do kónca februara zdźěłamy nowy twarski časowy plan“, Annet Dreißig rozłoži.
Wustajeńca dale přistupna
Pančicy-Kukow. Wustajeńca, kotruž je Towarstwo Cyrila a Metoda składnostnje lětušeje 775. róčnicy wobstaća klóštra Marijineje hwězdy wo serbskich wjerškach w zwisku z jubilejom před 25 lětami zestajało, je hišće hač do klóšterskeje kermuše, 15. oktobra, w rumnosći w přechodźe z klóšterskeho dwora w Pančicach-Kukowje přistupna. Zajimcy móža sej ju hač do pjatka wot 10 do 16.30 hodź. a sobotu wot 12.30 hodź. do 16 hodź. wobhladać.
Swědkojo zašłosće
Kamjenc. Wurězk wobstatka Kamjenskeho měšćanskeho archiwa ze sydom lětstotkow wobsahuje wustajeńca, kotraž je wot dźensnišeje srjedy hač do 28. januara přichodneho lěta w Kamjenskim sakralnym muzeju Swjateje Hany widźeć. Najstarši dokument pochadźa z lěta 1323. Wustajeńca je wot póndźele do pjatka wot 10 do 18 hodź, kónc tydźenja a swjate dny wot 11 do 16 hodź. widźeć. Zastup je darmotny.
Policija (11.10.23)
Drohe awto pokradnyli
Budyšin. Před Šulerskimi wrotami w Budyšinje su njeznaći w nocy na póndźelu chětro drohe awto pokradnyli. Tam je so Audi RS3 zhubił. Dwaj měsacaj stare jězdźidło bě w Pólskej přizjewjene a něhdźe 72 000 eurow hódne. Za awtom nětko mjezynarodnje pytaja.
Dróhu přichodne lěto wutwarja
Łaz (AK/SN). Šoferojo na statnej dróze S 108 kaž tež wobydlerjo Łaza a Běłeho Chołmca dyrbja so přichodne lěto na wobšěrne dróhotwarske dźěła nastajić. Krajny zarjad za dróhotwar a wobchad chce dróhu wot Běłeho Chołmca přez Łaz hač ke kromje wsy do směra na Delni Wujězd wutwarić, a to w třoch wotrězkach. Tole zdźěli Łazowski wjesnjanosta Thomas Leberecht (CDU) na zašłej wobydlerskej rěčnej hodźinje. Krajny zarjad twari puć, gmejna stara so wo nadróžne wobswětlenje a wotwodźowanje dešćikoweje wody. Po móžnosći matej nastać podłu dróhi chódnik a kolesowanski puć.
Jako prěnje chcedźa klětu wot meje druhi twarski wotrězk wot kromy Łaza ze směra Běłeho Chołmca hač ke kupnicy Penny zwoprawdźić. To ma předewšěm praktiske přičiny, wjesnjanosta zdźěli. W samsnym času chce LMBV južny pobrjóh Slěborneho jězora saněrować a trjeba S 108, zo móhła z ćežkej techniku k jězorej přijěć. Tamnej twarskej wotrězkaj matej pozdźišo slědować. Najwjetše wužadanje budźe po słowach Leberechta twar mosta před Běłym Chołmcom. Tón ma šěrši hač dotalny być, zo by městno za kolesowansku šćežku było.
We Wojerowskim zwěrjencu su zaso pinguiny widźeć. Dźewjeć ...
Krótkopowěsće (11.10.23)
Serbowka wuspěšna z filmom
Lipsk. We wobłuku festiwala DOK Lipsk wotmě so wčera prapremjera dokumentarneho filma Grit Lemke „Bei uns heißt sie Hanka – Pla nas gronje jej Hanka – Pola nas rěka wona Hanka“. Pask wobswětluje „njefolkloristisce prašenja serbskeje identity“.
Dóstanu nowu sportowu halu
Budyšin. Po wobzamknjenju měšćanskeje rady natwarja Budyskej wyšej šuli Dr. Salvadora Allendy nowu sportowu halu. Za projekt chcedźa dohromady 7 milionow eurow nałožować. Dotalna ćěłozwučowarnja njehodźi so hižo ponowić. Start twarskich dźěłow planuje město za lěto 2024. Wjace hač 200 wosobow budźe přichodnje nowu wjacezaměrowu halu runočasnje wužiwać móc.
Jamy dla twarja nasyp
Uhelná/Bogatynia. W zwisku z čěsko-pólskim dojednanjom nastupajo kontrowersnu brunicowu jamu Turów pola Bogatynije zahaji pólska strona natwar pjeć metrow wysokeho nasypa. Tón měł čěskej namjeznej wsy Uhelná jako „wizuelny škit“ słužić. Tule funkciju pak nabudźe hakle za dźesać do 15 lět, hdyž budu sadźene štomy wulke dosć. Wobydlerjo Uhelneje projekt tuž skerje skeptisce hódnoća.
Hdyž bańki pućuja
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk znatym a mjenje znatym chorosćam, zo by je čitarjam trochu bliže rozłožował (29).
