Znaty problem w Radworskej gmejnje chcedźa nětko znowa přeslědźić

Radwor/Droby (UM/SN). Hač su so wobydlerjo Radworskeje gmejny na dračinu z muchami hižo zwučili? W zašłych třoch lětach bě wo tym poměrnje mało w zjawnosći słyšeć. Wobydlerska rozmołwa krajneho rady Uda Wićaza (CDU) před časom w Njeswačidle pak je ludźom składnosć dała, zaso raz na to skedźbnić. Po tym je krajny rada zdźělił, zo su „wjacekróć z předewzaćom w Drobach rěčeli“ a zo tam „wšitke předpisy dodźerža“. Mjenowane předewzaće je Veolia wobswětowy serwis wuchod tzwr. Wone w Drobach wotpadki předźěła a wotstronja, mjez druhim organiske wotpadki. Hižo tójšto lět so na to tuka, zo je připrawa znajmjeńša sobu wina, zo je w Radworskej wokolinje přewšo wjele muchow wobkedźbować.