Łaz (AK/SN). Šoferojo na statnej dróze S 108 kaž tež wobydlerjo Łaza a Běłeho Chołmca dyrbja so přichodne lěto na wobšěrne dróhotwarske dźěła nastajić. Krajny zarjad za dróhotwar a wobchad chce dróhu wot Běłeho Chołmca přez Łaz hač ke kromje wsy do směra na Delni Wujězd wutwarić, a to w třoch wotrězkach. Tole zdźěli Łazowski wjesnjanosta Thomas Leberecht (CDU) na zašłej ­wobydlerskej rěčnej hodźinje. Krajny zarjad twari puć, gmejna stara so wo ­nadróžne wobswětlenje a wotwodźowanje dešćikoweje wody. Po móžnosći ­matej nastać podłu dróhi chódnik a kolesowanski puć.

Jako prěnje chcedźa klětu wot meje druhi twarski wotrězk wot kromy Łaza ze směra Běłeho Chołmca hač ke kupnicy Penny zwoprawdźić. To ma předewšěm praktiske přičiny, wjesnjanosta zdźěli. W samsnym času chce LMBV južny pobrjóh Slěborneho jězora saněrować a trjeba S 108, zo móhła z ćežkej techniku k jězorej přijěć. Tamnej twarskej wotrězkaj matej pozdźišo slědować. Najwjetše wužadanje budźe po słowach Leberechta twar mosta před Běłym Chołmcom. Tón ma šěrši hač dotalny być, zo by městno za kolesowansku šćežku było.