Budyšin. We wobłuku swojeho rjadu „Literarna kofejownja“ přeproša Budyski ekumeniski tachantski wobchod jutře, pajtk, na čitanje z Róžu Domašcynej. We 18.30 hodź. chce spisowaćelka a basnica pod hesłom „Soll was bleiben, tritt es aus dem Wort“ wurězki swójskeje krótkoprozy kaž tež swójsku lyriku a přebasnjenja předstajić. Zastup je darmotny, pjenježne dary su witane.

Młodźi hudźbnicy koncertuja

Smochćicy. Lubowarjo klasiskeje hudźby njesměli skomdźić sej dojěć jutře, pjatk do Smochćic. W tamnišim kubłanišću swjateho Bena koncertuje wot 17 hodź. Němska smyčkowa filharmonija. Hudźbne ćěleso, kotrež wobsteji z najlěpšich młodych smyčkarjow cyłeho kraja, je hižo na mnohich turnejach w kraju a wukraja wulke připóznaća žnjał. Orchester swjeći lětsa swoje 50lětne wobstaće. Pod dirigentstwom Emmanuela Tjeknavoriana zaklinča twórby Mozarta, Čajkowskeho a Vivaldija. Zastup je darmotny.

Ideje zapodać

Budyšin (CS/SN). Dokelž so ležownostne wobsydstwowe prawo z časa NDR porno tomu w ZRN zasadnje rozeznawa, dyrbja so runje tak kaž wšudźe druhdźe tež w Budyšinje poměry wo za čas NDR natwarjene garaže znowa rjadować. Z tym je so Budyska měšćanska rada na swojim zašłym posedźenju zaběrała. Za to je měšćanske zarjadnistwo registrowało wšitke garaže, kotrež na měšćanskich ležownosćach steja.

Dohromady jedna so wo 2 400 garažow na sto wšelakich městnach. Wo ně­hdźe 1 500 z nich bychu so přichodnje garažowe zjednoćenstwa starali a za tele garaže namrěwstwowe twarske zrěčenje podpisali. Zbywace garaže bychu w zamołwitosći města wostali. Při wotwažowanju wšelakich wariantow so wukopa, zo by najspomóžniše było, by-li Budyska bydlenjotwarska towaršnosć zamołwitosć za garaže přewzała. To pak njeje hišće doskónčnje jasne, dokelž dyrbjeli dawkowych přičin dla wosebity přemysłowy zawod załožić.

Z posedźenja Hamorskeje gmejnskeje rady

Hamor (AK/SN). Ze spočatkom lětnich prózdnin maja na Delnjowujězdźanskim boku Bjerwałdskeho jězora nowe móžnosće přenocowanja. Jedna so wo tři ­dowolowe domy, kotrež nastachu direktnje w safarijowym parku. Tole rjekny ­Hamorski wjesnjanosta Hendryk Balko (Hamorske wolerske zjednoćenstwo) na zašłym posedźenju gmejnskeje rady. ­„W třoch dowolowych domach njedaloko pobrjoha jězora maja dohromady 15 ­łoži. Pod www.safariwildrevier.de dóstanu zajimcy nadrobniše informacije a móža domy tež skazać“, praji wjesnjanosta.

Wot spočatka měrca 1992 wuchadźeja Serbske Nowiny jako wječornik. A wot toho časa je pomocnicy w mnohich wjetšich a mjeńšich wsach wšědnje ­čitarjam do domu noša. Najwjetši čas tuž našich pilnych roznošowarjow w lětnjej seriji předstajić (6).

W Čornecach, małej wsy južnje Baćonja, maš jeničce pjeć statokow. Pod kóždej třěchu drje bydla wjacore generacije, tola přiwšěm njeje tam wjac hač 25 woby­dlerjow. Jedna z nich je Lejna Rjenčowa, kotraž so mjeztym 15 lět w Čornecach wo to stara, zo čitarjo wšědnje dypkownje Serbske Nowiny do listoweho kašćika dóstawaja.