Chrósćicy (SN/MiR). Chróšćanski młodźinski klub je minjeny pjatk myto za angažement młodźiny w Budyskim wo­krjesu přijał, kotrež spožča Syć za dźěći a młodźinu (KiJu) w Biskopicach. Młodźi Chróšćenjo so socialnje angažuja a so wo dobru zhromadnosć prócuja. Zdobom chcedźa woni kubłanski nadawk spjelnić a němskim wobydlerjam serbsku kulturu a tradicije Serbow zbližić. Bernadette Zeller z KiJu rjekny po wopyće w Chrósćicach: „Mój kolega Christoph Semper a ja wopytujemoj tele dny wšitkich nošerjow myta tam, hdźež skutkuja. Wjeselo mjez čłonami skupinow je wulke, zo stanu so ze swojim skutkowanjom widźomne. Namaj napadny, zo skupiny z wulkim entuziazmom a elanom wo swojich akcijach a projektach za lěto 2024 rěča. Tež Chróšćanski młodźinski klub wšelake zarjadowanja za wšě generacije planuje.“