9. junija budu nimo wólbow do Europskeho parlamenta tež wólby gmejnskich a měšćanskich radow. Smy so w někotrych gmejnach wobhonili, što su tam w minjenych pjeć lětach docpěli.
Wjelelětny zastupowacy wjesnjanosta Radworskeje gmejny Pětr Kliman zhladuje z dobrymi začućemi na nachilacu so wólbnu dobu w gmejnje a na skutkowanje gmejnskeje rady. Zhromadne dźěło z wjesnjanostku Madaleinu Rentsch – kotruž smědźeše wón w swojej funkciji w meji 2020 spřisahać, je dobre a spomóžne, 69lětny Serbskim Nowinam přeradźi. Jako zastupowacy wjesnjanosta ma Pětr Kliman poprawom dosć dźěła: Wón zastupuje wjesnjanostku, hdyž je tole trjeba. Tak nawjeduje wón w jeje nadawku posedźenja gmejnskeje rady a dyrbi tež rozsudźeć, hdyž wona tu njeje. Tak dopomina so Pětr Kliman dosć derje na wulki woheń w zawodźe za składowanje kumštnych maćiznow w Drobach w aprylu 2014, jako bě tehdyši wjesnjanosta w dowolu. Zhromadnje z wohnjowymi wobornikami dyrbješe Kliman wo njewšědnych wěcach rozsudźić, kaž wo potorhanju palaceho so twarjenja.