Krawc čita w hospodźe
Chrósćicy. Na předwječoru štwórteho adwenta přeprošuje Chróšćanska putniska hospoda jutře, sobotu, w 19.45 hodź. w přitulnej atmosferje na měrny čitanski wječork z Křesćanom Krawcom z Hrubjelčic. Jedna z nowšich knihow spisowaćela je roman „Paradiz“ wo stawiznach serbskeje swójby přez tři generacije. Z njeje předstaji Krawc wosebje epizodźe „Gretcyne hody“ a „Serbski kwas“. Wšitcy lubowarjo serbskeje literatury su wutrobnje přeprošeni. Hižo w 16 hodź je dźěćace kino, pokaza so trikowy film.
Hrajki w muzeju widźeć
Njeswačidło. Wosebite wodźenje budźe njedźelu, 18. decembra, wot 13 hodź. po hodownej wustajeńcy w Njeswačanskim domizniskim muzeju. Tamnišu přehladku metalowych hrajkow jich zběraćel a wustajer Matthias Stein rozłoži a je tohorunja demonstruje. Tak budźe so hoberske koło runje tak wjerćeć kaž někotre dalše eksponaty. Přehladka je hač dosrjedź januara kóždu njedźelu wot 13 do 17 hodź. wotewrjena. Tež na hodownych a nowolětnych swjatych dnjach su wopytowarjo w muzeju witani, zdźěli Njeswačanske towarstwo přećelow domizny a kultury, kotrež so wo muzej stara.
Policija (16.12.16)
W bydlenju kradnyła
Łaz. Lochkomyslnosć wobydlerki je njeznata žona zawčerawšim we Łazu k padustwu wužiła. 87lětna wjesnjanka bě dopołdnja swój dom wopušćiła, zo by po šćěpki šła. Po wšěm zdaću pak durje njezamkny, tak zo móžeše cuza žona zastupić. Jako so rentnarka wróći, wona njeprošeny wopyt wuhlada a jemu kazaše, dom a ležownosć wopušćić. Hakle pozdźišo staruška pytny, zo běchu w spanskej stwě wšitke kamory přeborkane a zo je so mały drjewjany kašćik z wopismami a medaljemi w hódnoće něhdźe 50 eurow zhubił.
Přidatne wudawki plěsniwca dla
Rakecy (JK/SN). Energijowe předewzaće ENSO ma Rakečansku gmejnu přichodnje z płunom zastarać. Tole schwali gmejnska rada zawčerawšim na swojim posedźenju. Firma bě so jako jenička na wotpowědne wupisanje gmejny w juniju přizjewiła a ze swojim poskitkom a wuměnjenjemi radźićelow přeswědči. Wjesnjanosta Swen Nowotny (CDU) móže tuž wotpowědne zrěčenje z płunowym zastaraćelom wotzamknyć.
W dalšim dypku sej rasdźićeljo dokładnje dorěčachu, w kotrej formje plan za wohnjoškit w gmejnje dale powjedu. K tomu předstajištaj čłonaj wohnjoweje wobory zhromadnje z gmejnu zdźěłany plan naprawow a trěbnych nadawkow, zo by so wohnjoškit přichodne lěta we wšěch wsach gmejny zaručił.
Chcedźa hort zaso we wsy měć
Starši na posedźenju gmejnskeje rady rozhorjeni
Pančicy-Kukow (SN/MWj). Poprawom chcychu Wotrowske hortowe dźěći adwentničku w swojich po wulkej wodźe ponowjenych rumnosćach we Wotrowskej pěstowarni swjećić. Hač pak so to zešlachći, je dwělomne. Přetož přeco hišće njesmědźa wone do swojich rumnosćow zaćahnyć. Wina na tym je, zo njejsu rumnosće hišće twarsce wotewzate. Swoju rozhorjenosć dla toho někotři starši na wčerawšim posedźenju Pančičansko-Kukowskeje gmejnskeje rady zwuraznichu.
Třeći raz turněr dobył
Kozarcy (BŠ/SN). K swojemu poslednjemu lětušemu turněrej zetkachu so serbscy škotowarjo-seniorojo minjenu wutoru w Kozarcach. Chorosće a druhich terminow dla dyrbjachu někotři krótkodobnje wotprajić, tak zo zhromadźi so něšto wjace hač 20 kartyplacarjow. Nawoda turněra Jan Macka poda kaž kóždy króć najprjedy přehlad wo dotalnych hrach a wo dalšich nowostkach. Lětsa běchu škotowarjo jara aktiwni, dohromady zliči Jan Macka 40 hrajerjow, štož je jara wjele. To je wšak hižo tradicija, wšako hraja škotowarjo hižo w 22. sezonje. Klětu započnje so přichodna, a to w februaru z cyle wosebitym jubilejom. Jan Macka je swoje podłožki přehladał a zwěsći, zo budźe to potom 250. turněr, kiž sobu na nohi staji. Kónc 1990tych lět, jako započa tajke zetkanja organizować, njeby ženje na to myslił, zo so turněry takle wobstajnje wotměja. Za muži a žony při blidźe pak je to wjace hač wojowanje wo dypki. Bjesada, zetkanje a žortowanje, to wšo słuša k tomu, tak wjacori měnja. A za to přijědu z Lubija, Chróstawy abo tež ze wsow za Kamjencom, druhdy samo tute dołhe čary z kolesom.
Při dróze mjez Nowoslicami a Ralbicami je Budyski dróhotwarski ...
Financne połoženje so polěpšiło
Zhorjelc (UM/SN). Dwójny etat za lěće 2017 a 2018 je Zhorjelski wokrjesny sejmik schwalił. Hinak hač minjene lěta planuja – znajmjeńša z wida komornika – samo nadbytk. Nimo toho chcedźa deficit lěta 2016 wurunać. Přiwšěm jewi so mjez radźićelemi tež kritika.
Diskusije wo etaće běchu w Zhorjelskim wokrjesnym sejmiku w zašłosći zwjetša tajke něšto kaž kolektiwne žałosćenje. Přewulke běchu dźěry, kotrež mějachu płatać, přesnadny běše wuhlad, zo so tole polěpši. W diskusiji wo dwójnym etaće 2017/18 bě tomu hinak. We woběmaj lětomaj so wokrjesej poradźi, znajmjeńša na papjerje, stajnje něhdźe 2,2 milionaj eurow dochodoweho nadbytka wuzbytkować. Tole samo dosaha, deficit lěta 2016 wurunać. Wotpowědnje lóštnje móžeše financny decernent Thomas Gampe (njestronjan) ličby prezentować. „Naše połoženje je so polěpšiło, dokelž mamy wjace dochodow“, Gampe rjekny. Zwjazk je wokrjesej wjace pjenjez přepokazać móhł. Situacija móhła hišće lěpša być, njedyrbjeli-li někotre gmejny koncernej Vattenfallej dočasa płaćene přemysłowe dawki wróćić.
Krótkopowěsće (16.12.16)
Kniha Meškanka zaso na předań
Budyšin. Za krótki čas rozpředata kniha Tima Meškanka „Sorben im Blick der Staatssicherheit. Die Akten der K 5 und des MfS der DDR 1949–1989“ je nětko w druhim nakładźe w Ludowym nakładnistwje Domowina wušła. Z knihu pomha historikar hač do dźensnišeho dnja wobstejace běłe blaki serbskeho stawiznopisa wo času NDR wuswětlić.
Njewěstosć pola Bombardiera
Zhorjelc. Njewěstosć sobudźěłaćerjow wagonotwarca Bombardier hladajo na jich dźěłowe městna traje dale. Dźěłarnistwo IG Metall njewočakuje, zo koncern hišće do hód konkretne ličby wozjewi, kelko dźěłowych městnow chce šmórnyć. W Zhorjelcu a braniborskim Henningsdorfje su dźensa přećiwo planam protestowali, wčera w Budyšinje.
Hackerojo w Sakskej aktiwni
Zběrać a darić
Strachi a předsudki wottwarić
Zamołwity za serbske naležnosće města radźićelam rozprawjał
Kulow (AK/SN). Dwurěčne kubłanje poskićuja w Kulowje wot lěta 2009 bjez přetorhnjenja wot pěstowarnje hač k wyšej šuli. Pěstowarnje, zakładna a wyša šula, cyrkej, město a towarstwa so wo serbsku rěč na mnohostronske wašnje prócuja. Tole podšmórny zamołwity za serbske naležnosće města Stephen Rachel, zdobom nawoda twarskeho zarjada města, w swojej lětnej rozprawje na wčerawšim posedźenju měšćanskeje rady. „Je wažne, so wobstajnje a konsekwentnje wo serbšćinu prócować. Wjele lět tomu tak njeběše“, rjekny Rachel.
Tele prócowanje widźi wón w pěstowarni Jakubecowy wustaw, kotrejež nošer je katolska wosada, kaž tež w pěstowarnjomaj w nošerstwje CSB w Kulowje a Sulšecach. W Krabatowej zakładnej šuli wuknje z 217 šulerjow 116 serbsce, z toho 40 po koncepće 2plus. „Nimo wučby serbšćiny wuwučuja w dalšich předmjetach dwurěčnje“, rěka w rozprawje. Tež šulske žiwjenje wusměrjeja dwurěčnje.
