Model Rownoho je posledni a zdobom najwjetši, kotryž su čłonki ...
Njewšědny wječor za narodniny
Nuknica. „Serbska subkultura swjeći“ je móhłrjec hesło soboty, 25. junija, hdyž chce Nukničanske towarstwo barakka na 20 lět twjerdych zynkow a alternatiwnych swjedźenjow zhladować. Při tej składnosći wuhotuja čłonojo towarstwa wosebity swjedźeń. Popołdnju w třoch su wšitcy přećeljo towarstwa a zajimcy z dźěćimi na kofej a tykanc přeprošeni.
Wječor we wosmich potom po za barakku typiskim wašnju na jewišću zatepja. Budźe to porědki wječor – wšako so tajkeje zestawy skupin hišće žane łužiske jewišćo dohladało njeje. Z barakku swjeći skupina DeyziDoxs, kotraž so mjeztym hižo 15 lět na tu- a wukrajnych jewišćach prezentuje. Wo dalšu hudźbu staratej so Blind Judgement, kotraž bě so před dźesać lětami na tymle městnje rozpušćiła, a Widła, kiž so tehdy samsny wječor zjawnosći prěni raz předstaji. A jako njeby to hišće dosć jónkrótnosće na wječor było, samo skupinje Stoned Hajtzer a Crying Blue z hłubiny lět swój puć do Nuknicy namakatej. A kaž so na prawych narodninach słuša, je zastup darmotny. Měrćin Wjenk
Za socialne projekty dźěłali
Wopony skedźbnjeja na swjedźeń
Kulow (HH/SN). Zo so lětuši Krabatowy swjedźeń wot 12. do 14. awgusta w Kulowje wotměje, drje je dawno znate, wšako tam hižo cyłe lěto tónle wulki podawk přihotuja. Nětko póčnje so jedyn z wjerškow lětušeho měšćanskeho žiwjenja tež wonkownje wotbłyšćować. Minjeny pjatk su mjenujcy sobudźěłaćerjo komunalneju twarskeju zawodow Kulowa a gmejny Njebjelčic na Kulowskim torhošću tak mjenowany Krabatowy štom stajili. Na wjace hač dźesać metrow wysokim stołpje přičinjene su wopony tych městow a gmejnow, kotrež su z čłonom Krabatoweho towarstwa. Mjez druhim su to Njebjelčicy, Rakecy a Wojerecy. Na dalšej tafličce napisane su mjena towarstwow a zarjadnišćow, kiž Krabatowemu towarstwu přisłušeja, kaž na přikład Křesćansko-socialny kubłanski skutk a Ćišćanske kulturne towarstwo.
Prezencu zaso wožiwić
Syć putniskich městnow chce za klětu nasćěnowu protyku wudać
Smochćicy (JK/SN). Syć srjedźoeuropskich putniskich městnow bu lěta 2005 załožena a prezentuje so mjeztym sydom lět na zhromadnej internetnej stronje. Zhromadny zaměr putniskich městnow a komunow ze znatymi putniskimi srjedźišćemi w Němskej, Čěskej, Pólskej a Awstriskej je, poskićeć wobšěrne informacije k putnikowanjam a zarjadowanjam kołowokoło hnadownych městnow kaž tež k jich bjezposrědnjej wokolinje. Nimo toho maja zajimcy zhonić wo stawiznach a wuznamje jednotliwych putniskich městnow.
Policija (22.06.16)
Z kolesom do awta zrazył
Wjazońca. Ćežko zranił je so zawčerawšim dwanaćelětny kolesowar we Wjazońcy. Wón wujědźe z pódlanskeho puća na hłownu dróhu. Njewobkedźbowaše pak předjězbu 20lětneje wodźerki Peugeota, do kotrehož na to zrazy.
Krabat pola seniorow w Němcach
Wjace hač 50 staršich ludźi je so tele dny na Němčanskej Grofic žurli „La Galeria“ k wólnej bjesadźe a kofejej zetkało. Sobuorganizatorka Monika Neubertowa wšitkich wutrobnje witaše a připowědźi překwapjenku. Na to informowaše jich wjesny přestejićer Wolfgang Neubert wo planowanym dróhotwarje přez wjes, kotryž přichodnej lěće planuja. Zdobom dźakowaše so senioram za jich aktiwnu pomoc při wuhotowanju njedawneho wjesneho swjedźenja.
Dwě městnje swobodnej
Nětko móža twarić
Smječkecy. Za štyri planowane nowe twarske ležownosće při Winicy w Smječkecach su wšitke běrokratiske zadźěwki přewinjene, tak zo móža tam młode swójby twarić započeć. Kaž Worklečanski wjesnjanosta Franc Brusk (CDU) zdźěli, su trěbne planowanske jednanja wotzamknjene a prěnja próstwa wo twar jednoswójbneho domu na gmejnskim zarjedźe mjeztym předleži. Hakle před dobrym lětom bě gmejnska rada Worklecy wobzamknyła, za Smječkečansku Winicu twarski plan nastajić.
Přidatne předstajenje
Budyšin. Za inscenaciju Budyskeho lětnjeho dźiwadła NSLDź „Olsenowa cwólba a wulki pozadnik“ je dale jara wulki zajim. Tohodla je so dźiwadło rozsudźiło, přidatnu inscenaciju do programa přiwzać, a to wutoru, 5. julija, w 19.30 hodź. Dalšich přidatnych terminow pak hižo njebudźe. Z tym potom po wšěm zdaću 37 razow stawiznu wokoło Egona a jeho cwólby pokazaja. Hižo k premjerje 9. junija běchu wšitke lisćiki rozpředate. Minjenu njedźelu bě prěnje přidatne předstajenje. Kaž NSLDź připowědźi, čaka klětu na wopytowarjow pokročowanje „Olsenowa cwólba wupućuje“.
24 milionow eurow a nic wjace
Poprawom měješe Slepjanski němsko-serbski šulski centrum hižo loni hotowy być. Dotal pak wot njeho hišće ničo widźeć njeje. Nětko ma so w tym nastupanju skónčnje něšto hibać.
Slepo (AK/SN). W septembru chce Slepjanska gmejna němsko-serbski šulski centrum wotkrywać započeć. „Po móžnosći nalěto 2017 ma so twarić započeć a 2019 chcemy zaćahnyć“, podšmórny nawoda twarskeho wotrjada Slepjanskeho zarjadniskeho zjednoćenstwa Steffen Seidlich na zašłym posedźenju gmejnskeje rady. Jeje čłonojo so po intensiwnej a kontrowersnej diskusiji dojednachu, zo ma twar 24 milionow eurow płaćić a nic wjace. 7,6 milionow eurow ma sakske kultusowe ministerstwo jako spěchowanje přidać, „zbytk“ financuje Vattenfall. Gmejna swójski podźěl płaćić njetrjeba, wona pak je twarski knjez.
