Z hesłom „Pój a pohladaj raz přez płót“ je Budyska wosada Jozuwy pjatk na swjedźeń zetkawanja do Parkoweho hotela w Delnjej Hórce přeprosyła. Organizatorojo maja jón za přewšo poradźeny. To nima jónkrótna wěc wostać.

Delnja Hórka (CS/SN). Wjesoły dźeń z tójšto hudźbu a hrami je wosada Jozuwy nimale 160 wobydlerjam domu za požadarjow azyla w Delnjej Hórce wobradźiła. Samo zrali mužojo swjećachu njepoćeženi kaž małe dźěći. Při mjetanju bulikow su so mali kaž wulcy zabawjeli. Zmužići móžachu po powjazowym rěblu łazyć, kotryž bě na kranje připrawjeny. Z nim su prěnjotnje planowanu akciju, staplować piwowe kašćiki, zarunali.

Zahajił bě so swjedźeń z kopańcu na sportnišću. Mustwo Parkoweho hotela je mocy ze zastupnistwom Sprjewineho hotela měriło a jasnje 5:0 dobyło. Zawěsće składnostnje dalša hra slěduje, wšako chcedźa so poraženi rewanšować.

Gauck hižo njekandiduje

Berlin. Zwjazkowy prezident Joachim Gauck njeje za dalšu wólbnu dobu hižo k dispoziciji. To je 76lětny dźensa w Berlinskim hrodźe Bellevue připowědźił. Hłowna přičina je jeho staroba, štož wjedźe k pobrachowacej energiji a witaliće, Gauck rozłoži. Noweho zwjazkoweho prezidenta wuzwola w februaru 2017. Gauck je wot lěta 2012 w zastojnstwje.

Ćežko městna wobsadźić

Lipsk. Sakska ma wulke ćeže, planowanych 1 200 nowych wučerskich městnow wobsadźić. W kultusowym ministerstwje je drje 1 700 požadanjow dóšło, tola jenož dwě třećinje z nich su studowani wučerjo, zdźěli rěčnik ministerstwa Dirk Reelfs. 70 procentow zajimcow chcyło do Drježdźan abo Lipska. Nimo toho maja mnozy mjeztym lěpše poskitku w druhich zwjazkowych krajach.

Olympiada na šuli

Pola čěskeho arcybiskopa byłoj

Praha. Předsyda Towarstwa Cyrila a Metoda Jurij Špitank a referent Domowiny Clemens Škoda staj wčera přeprošenje čěskeho arcybiskopa, kardinala Dominika Duki, na konferencu na Praskim hrodźe sćěhowałoj. Tam wuradźowachu wo zarjadowanjach k róčnicy 1 100 lět po skutkowanju swj. Ludmile, na kotrychž chcedźa so tež Serbja wobdźělić.

Sudetski tabu přełamać

Frýdlant. Lětdźesatki skerje zamjelčane wotsunjenja sudetskich Němcow z namjeznych kónčin Čěskeje spytaja w sewjeročěskim Frýdlanće reflektować. We wobłuku projekta tamnišeje šule su 80 zapusćenych němskich rowow ponowili a samo někotrych potomnikow pochowanych wuslědźili. Tež přirunowanska wustajeńca historiskich a tučasnych fotow města budźi wulki zajim.

Rekordny wobrot nadźěłali

W bance zamknjena

Wostrowc. Pomoc policajskich zastojnikow trjebaše zawčerawšim wječor žona we Wostrowcu. 49lětna bě něhdźe w 22.30 hodź. do wotnožki banki zastupiła zo by pjenjezy z awtomata wotzběhnyła. Jako chcyše zaso woteńć, pak so durje hižo­ wočinić njedachu. Žona zazwoni policiju, kotraž z pomocu wěstotneje firmy zamknjenu wuswobodźi.

Ješć w studni

Wojerecy. Hač měješe to „překwapjenka“ k dnjej dźěsća być, štož je policija 1. ju­nija we Wojerecach wuhladała? Znajmjeńša bě zawčerawšim na Łužiskim naměsće něchtó wopłokowanski srědk do dweju studnjow kidnył, na čož započa so woda chětro ješćić. Specialna firma dyrbješe wobě studni wurjedźić.