Wjelki třěleć móžno
Krajny rada Michael Harig namołwja k „regulowanju črjódow“
Budyšin (SN/mwe). W Rěčičanskim kontaktnym běrowje „Wjelči regiona Łužica“ wo tym rozmysluja, zo smědźa hońtwjerjo přichodnje wjelki třěleć. Tole wuchadźa z najaktualnišeje informacije „Měł-li najebać přidatne škitne naprawy wuspěch wuwostać, je wotstronjenje jednoho abo wjacorych wjelkow jako posledni srědk móžne“, w nowinskim wozjewjenju rěka. Takle běrow, kotryž je w nošerstwje Zhorjelskeho krajnoradneho zarjada/wokrjesneho lěsniskeho zarjada, na masiwne kritiki plahowarjow wowcow, politikarjow, hajnikow a wosebje znjeměrnjenych wobydlerjow reaguje. Wšako su wjelki Róžeńčanskeje a dalšich črjódow w minjenym času wospjet wowcy na dosć derje škitanych pastwišćach nadpadowali a morili.
Policija prezentna
Budyšin (SN/MWj). Na wjacorych městnach w Budyskim centrumje je wčera wječor a w nocy k policajskim zasadźenjam dóšło. Tak su policiji wo wohroženju na Žitnych wikach rozprawjeli. Tam bu skupina němskeju žonow a třoch ćěkancow wot wosom muži wohrožena. Dwaj z nich staj so z pistoli podobnym nastrojom na ćěkancow měriłoj. Swědcy přiličichu wonych muži prawicarskemu spektrumej, kaž w rozprawje Zhorjelskeje policajskeje direkcije rěka.
Dale bu znate, zo bě 20lětny Lybičan při kupnicy Lidl na Kamjentnej 19lětneho Budyšana atakował. Policiji hižo znaty ćěkanc steješe pod wliwom alkohola. Jeho dowjezechu na rewěr. Za jeho wukrajnymaj přewodźerjomaj spěchaše skupina 15 ludźi na Hornčersku. Při tym su po wšěm zdaću kamjenje na ćěkancow mjetali a jednoho z njeju snadnje zranili. Štyrjoch podhladnych skućićelow w starobje 19 do 28 lět policija zaja. Dale lepichu krótko po połnocy 29lětneho Budyšana na Kamjentnej, kiž bě z trašawku 39lětneho ćěkanca wohrozył. K honjeńcy, kaž medije internetnje rozprawjachu, po wuprajenju rěčnika policije dóšło njeje.
Rozsud wo Wochozach II pruwuja
Tema brunica steješe wčera znowa na dnjowym porjedźe Slepjanskeje gmejnskeje rady. Zastupjer LEAG informowaše tam radźićelow wo tuchwilnych prašenjach a přichodnych rozsudach.
Slepo (AK/SN). Wo nowych brunicowych jamach we Łužicy rozsudźi energijowy koncern LEAG hakle po dokładnym pruwowanju a wotwažowanju. Za to chce sej naslědnik Vattenfalla chwile brać. „Wjedźemy tuchwilu intensiwne rozmołwy a přepytowanja. Nadźijamy so, zo za něšto tydźenjow k rozsudej dóńdźemy“, podšmórny nawoda za rekultiwowanje a přesydlenje pola LEAG Thomas Penk wčera na posedźenju Slepjanskeje gmejnskeje rady. Po jeho słowach wotwisuje rozsud wot energetiskich, politiskich a hospodarskich wuměnjenjow.
Zastupjerjo LEAG su njedawno z wjesnjanostami tych komunow wuradźowali, kotrež su wot wotbagrowanja potrjechene. „Na kóždy pad nastaji so čěske předewzaće EPH, kotrež je maćerny koncern LEAG, na dołhodobny angažement we Łužicy“, je Slepjanski wjesnjanosta Reinhard Bork (CDU) přeswědčeny.
Krótkopowěsće (02.11.16)
Problemy z nowym jězorom
Choćebuz. Na wčerawšim rozjimanskim jednanju k powodźenju něhdyšeje brunicoweje jamy Choćebuz-sewjer jako nowy Wuchodny jězor wujewichu so bytostne problemy. Krajny zarjad za přirodu je připowědźił, zo njemóže tuchwilnym planowanjam přihłosować, kaž předsyda Zeleneje ligi Renej Šuster w zdźělence piše. Wjacori wobydlerjo připowědźichu skóržby přećiwo jězorej.
Dale mjenje bjezdźěłnych
Budyšin. W oktobrje bě we wuchodnej Sakskej 21 461 bjezdźěłnych, 448 mjenje hač w septembrje a 3 580 mjenje hač loni w tymle času. Kwota bjezdźěłnosće w Hornjej Łužicy je so w běhu lěta wot 8,6 na nětko 7,5 procentow znižiła. Šef Budyskeje agentury za dźěło Thomas Berndt ma to za „wulku, takle njewočakowanu dimensiju“.
Dalše sudniske jednanja
Policija (01.11.16)
Tukanja rozjasnjene
Budyšin. Wot wčerawšeho w interneće a w socialnych syćach kursěrowace tukanja, zo chcedźa požadarjo azyla přichodne dny w Budyšinje njeměr naškarać, su rozjasnjene. Kaž je decernat za statny škit kriminalneje policije wuslědźił, bě tukanje nastało rěčneho njedorozumjenja dla. Nawodnica domu za požadarjow azyla je 17lětneho Syričana po wšěm zdaću wopak zrozumiła.
Wulět do stawiznow
Komorow (Hag/SN). Z mnohimi hosćimi zetkachu so čłonojo Domowinskeje skupiny Komorow-Trupin-Rakecy minjenu sobotu w młodźinskim klubje při Komorowskim sportnišću na přednošk dr. Lubiny Malinkoweje. Po zhromadnym kofeju porěča wona wo wuznamje a wuskutkach Ochranowskeho hibanja na Serbow a pokaza k tomu wobrazy. Po tym zo měješe Domowinska skupina loni skupinski wulět do Ochranowa a so hižo tam z tutym hibanjom zaběraše, běše přednošk Lubiny Malinkoweje wulět do stawiznow Serbow. Župa „Jan Arnošt Smoler“ je zarjadowanje spěchowała. Wosebje wjeselili so skupinarjo su, zo so Rakečanski wjesnjanosta Swen Nowotny, kiž w Komorowje bydli, ze swojej mandźelskej na zarjadowanju wobdźěli.
Hajnicy na nyšporu
Klóšterska bróžnja poswjećena
W přitomnosći abatisy klóštra Marijineje hwězdy Philippy Kraft, dalšich rjadniskich sotrow a hosći je farar Tomaš Dawidowski wčera dopołdnja nowonatwarjenu bróžnju na Kukowskim klóšterskim dworje požohnował.
Pančicy-Kukow (SN/mwe). Ze zhromadnym paćerjom, kěrlušemi a žohnowanjom su wobydlerjo z Pančic-Kukowa, nawodnistwo klóštra Marijineje hwězdy kaž tež rjemjeslnicy nowotwarjenu bróžnju za ratarske mašiny poswjećili. Na małym swjedźenju spominachu na to, zo bě 3. oktobra 2009 něchtó nawječor bróžnju zapalił, na čož so twarjenje ze składom słomy a Schlafkec wowčernju dospołnje wotpali. Policija njezamó zapalerja bohužel wuslědźić.
„Dźensa, sydom lět po zapalerstwje, pak móžemy so wjeselić a dźakować. Naš wosebity dźak słuša sotram klóštra Marijineje hwězdy z režiju našeje abatisy Philippy Kraft, kotřiž su znowazarjadowanje tutoho rjaneho a wažneho twarjenja zmóžnili“, inspektor klóšterskeho kubła Frank Weigel při witanju podšmórny. Wšako je klóšter trěbne financne srědki přez swój ratarski zawod přewostajił.
W Kamjencu knježeštej dźensa dopołdnja njewšědnej hołk a tołk, ...
Krótkopowěsće (01.11.16)
Wědomostnica wuznamjenjena
Würzburg/Choćebuz. Wědomostnica Braniborskeje techniskeje uniwersity Choćebuz-Zły Komorow na polu twarstwa, prof. dr.-ing. Angelika Mettke, je jedna z lawreatkow Němskeho wobswětoweho myta Zwjazkoweje załožby za přirodu. Wona přija myto z rukow zwjazkoweho prezidenta Joachima Gaucka zawčerawšim we Würzburgu. Mettke wuznamjenichu za jeje koncept, recyclingowy beton efektiwnišo znowa zasadźeć.
Žada sej wjace policije
Drježdźany. Nutřkowny politikar Zelenych Valentin Lippmann stražnych policistow jako dołhodobne rozrisanje problemow sakskeje policije wotpokazuje. Tole rjekny wón powěsćerni dpa, reagujo na interview sakskeho nutřkowneho ministra Markusa Ulbiga (CDU) w Lipšćanskich nowinach. Tam bě so Ulbig za to wuprajił, stražnych policistow spěšnišo do słužby přewzać.
Prěnje praskotaki sćazane
Policija (28.10.16)
Klawny w Hornjej Łužicy
Kamjenc. Informacije wo agresiwnych wosobach w kostimach klawna so tež w Hornjej Łužicy kopja. Zawčerawšim wołachu policiju do skaterskeho parka na Kamjenskej Goethowej. Tam běštaj hnydom dwaj tak mjenowanaj horor-klawnaj po puću, kotrejuž dla so štyrjo młodostni chětro nastróžichu a ćeknychu. Po jich wuprajenjach klawnaj za nimi spěchaštaj, při čimž měješe jedyn z njeju wjetši hamor w ruce. Na zbožo so ćěkacym młodostnym poradźi hač domoj doběžeć. Policajscy zastojnicy w bliskosći za klawnomaj pytachu, njemóžachu pak nikoho podhladneho lepić. Přiwšěm w tymle padźe dale přepytuja, kaž Zhorjelska policajska direkcija informuje.
