Braška na swjedźeń prosył
Wobzamknjenje zaso zběhnyli
Radwor (SN/MkWj). Lěsny puć po Kaponicy mjez Łupoju a Psowjemi wostanje zjawny. Tole je Radworska gmejnska rada na swojim wčerawšim posedźenju wobzamknyła. Radźićeljo su zdobom wobzamknjenje z lońšeho septembra jednohłósnje rewidowali, z kotrymž běchu swój čas zjawne wěnowanje zběhnyli. Přećiwo tomu bě wobydlerska iniciatiwa 750 podpismow znosyła. Nimo toho bě šěsć gmejnskich radźićelow oficialnje wo to prosyło wobzamknjenje zaso zběhnyć, dokelž njeje w zmysle wobydlerjow.
Wulke dźěle Kaponicy słušeja priwatnemu předewzaću, kotrež lěs wobhospodarja. Za to zasadźa ćežku techniku a jězdźidła. Lěsny puć wotpowědnje pod tym ćerpi. Firma bě poskićiła, puć na swójske kóšty wudźeržować. Za to njesměli ludźo z awtami po nim jězdźić.
Wutworja škričkowarnju na městnje
W ekstremnych nuzowych situacijach je Wojerowska centralna dispatchernja přežadana, kaž su lońše njewjedra pokazali. Wutworić maja so tuž decentralne škričkowarnje, jedna w zarjadniskim zwjazku Při Klóšterskej wodźe.
Pančicy-Kukow (SN/MWj). Zo hodźeli so wohnjowe wobory pjeć sobustawskich gmejnow zarjadniskeho zwjazka Při Klóšterskej wodźe w ekstremnych nuzowych padach lěpje koordinować, ma w Pančicach-Kukowje decentralna škričkowarnja (ortsfeste Landfunkstelle) nastać. To su čłonojo zhromadźizny zarjadniskeho zwjazka wčera jednohłósnje wobzamknyli. Trěbny škričkowanski nastroj za to płaći nimale 7 000 eurow. 75 procentow z toho dóstanu spěchowane.
W zmysle załožerjow
Lětsa nowe dwurěčne tafle
Budyšin (SN/at). Na 15 zarjadnišćach wokrjesneho zarjadnistwa abo w nošerstwje Budyskeho wokrjesa lětsa tafle z hamtskim němskoserbskim napisom ponowja. W Budyšinje su to powołansko-šulski centrum za hospodarstwo a techniku, internat Serbskeho šulskeho a zetkawanskeho centruma, spěchowanska šula kaž tež archiw na Einsteinowej a zarjadniskej twarjeni na Dwórnišćowej. W Kamjencu dóstanu Lessingowy gymnazij a jeho wotnožka, powołansko-šulski centrum a jeho wotnožka, spěchowanska šula na Macherowej a halowa kupjel nowy napis. Dotalne tafle wuměnja we Wojerecach při powołanskošulskimaj centrumomaj „Konrad Zuse“ a „II“ runje tak kaž na wosebitym pedagogiskim spěchowanskim centrumje za ćělnje zbrašenych „Dr. Friedrich Wolf“, zdźěli krajnoradny zarjad na naprašowanje SN.
Wuchadźišćo je wuprajenje krajneho rady Michaela Hariga (CDU) w serbskej rozprawje, zo přewostaji Budyski wokrjes 2017 za nachwatanje a aktualizowanje dwurěčnych napisow 10 000 eurow.
Krótkopowěsće (17.01.17)
Wothłosuja wo stawku
Zhorjelc. Dźěłarnistwo IG metal je dźensa swojich čłonow w Zhorjelskej tworni wagonotwarca Bombardier namołwiło, wo stawku wothłosować. Bombardier chcył produkciju přerjadować a tójšto ludźi pušćić. Rozmołwa hospodarskeho ministra Sigmara Gabriela (SPD) z koncernom njebě wuspěšna. Wuslědk wothłosowanja wočakowachu wječor.
Wukony młodych wuzběhnył
Drježdźany. Sakski ministerski prezident Stanisław Tilich (CDU) je wukony młodych angažowanych sportowcow, hudźbnikow a wědomostnikow w Sakskej wuzběhnył. „Wy chceće so dale wuwić, to trjebamy“, rjekny Tilich wčera na nowolětnym přijeću w Drježdźanach-Hellerauwje. Mjez 800 přitomnymi běchu młodostni, kotřiž su so wuspěšnje na wubědźowanjach wobdźělili.
Kemše tež w esperanto
Njewjedro wobornikam wulke wužadanje było
Konjecy (aha/SN). Hóstna stwa Konječanskeho towarstwoweho domu bě wobsadźena, jako witaše tam nawoda wohnjoweje wobory Šunow-Konjecy, wyši hašenski mišter Silvio Čórlich, minjeny pjatk kameradow na lětnu hłownu zhromadźiznu. Zhladujo na minjene lěto, jako swjećeše wobora 75. róčnicu załoženja, naliči Čórlich aktiwity wobornikow, wukonjane w dohromady 1 380 słužbnych hodźinach. Cyłkownje ma tamniša wobora 34 čłonow w přerěznej starobje 37 lět. 26 z nich wukonja aktiwnu słužbu, mjez nimi jedna žona.
Šěsć razow su kameradow delanskeje wobory loni alarmowali, z toho trójce k hašenju wohenja. Wulke wužadanje bě zasadźenje po njewjedrje 26. junija, jako bě pomoc wobornikow jara prašana. Nimo toho dyrbjachu Klóštersku wodu na kritiskich městnach w Konjecach a Šunowje kontrolować. K wjace hač sto zasadźenskim hodźinam dóńdźe nimo toho přez wobchadne njezbožo z dwěmaj zranjenymaj kónc nowembra. Dale skedźbni rozprawjer na dalekubłanja a zwučowanja kaž tež na hladanje techniki a wohnjowoborneho gratu.
Tójšto dochodow z błyskačow
Wokrjes statistiku wo wobchadnych přeńdźenjach wozjewił
Budyšin (SN/MWj). Stacionarny spěšnosć měrjacy nastroj při statnej dróze S 100 w Pančicach-Kukowje je jedyn z najwunošnišich błyskačow Budyskeho wokrjesa. Tole wuchadźa ze statistiki, kotruž je krajnoradny zarjad dźensa wozjewił. Po njej su loni w Pančicach-Kukowje 5 346 jězdźidłow błysknyli, štož wunjese wokrjesej 104 000 eurow. „Najpilniši“ błyskač wokrjesa pak steji při zwjazkowej dróze B 6 w Błócanach (Plotzen). Tam su loni 10 312 přespěšnych šoferow błysknyli a dohromady 206 500 eurow kasěrowali. Na druhim městnje steji připrawa w Póckowach ze 7 220 lepjenymi přeńdźenjemi a 137 500 eurami pokutneho pjenjeza. Błyskač w Chelnje je po informacijach wokrjesa 2 636 razow wuspěšnje dźěłał a wokrjesej 45 000 eurow dochodow wunjesł, tón w Hodźiju je 3 590 razow błysknył (58 000 eurow) a nastroj w Mučowje 3 280 razow (50 000 eurow).
Policija (17.01.17)
Pěšk policistam pomhał
Zhorjelc. Z pomocu kuražěrowaneho pěška je policija minjenu sobotu wječor w Zhorjelcu zasudźeneho młodeho muža zajała. Zastojnicy policajskeho rewěra zwěsćichu 21lětneho w nutřkownym měsće. Wuhladawši policistow wón ćekny. Sudnistwo bě jeho mjenujcy hižo w nowembru ke chłostanju poł lěta młodźinskeho jastwa zasudźiło. Te pak prosće nastupił njeje. Jako młody muž před policistami ćěkaše, njeznaty pasant do akcije zapřimny. Wón do ćěkaceho storči, tak zo so tón zakopny a do sćěny domskeho dyri. Tam jeho policisća dosahnychu. Ze zběhnjenym palcom pěšk signalizowaše, zo je wšitko w porjadku a so na to wotsali. Policisća so njeznatemu pomocnikej za jeho wobhladniwe jednanje dźakuja. 21lětneho pak dowjezechu do jastwa, hdźež dyrbi nětko swoje chłostanje wotsedźeć.
