Z połnej paru su w Pančicach-Kukowje minjene dny 9. integratiwny ...
Sydom lět jastwa za zaraženje
Budyšin. Wusud w procesu wo zaraženju w Budyskej měšćanskej štwórći Strowotna studnja 27. oktobra 2015 je wuprajeny. Walter M., mandźelski morjeneje Katrin T., dyrbi sydom lět do jastwa. Nimo toho sudnistwo wukaza, jeho do wotwučenskeje kliniki zapokazać. Do toho pak dyrbi zasudźeny znajmjeńša połdra lěta w jastwje pokućić.
Wusud wuprajiło je sudnistwo na sedmym procesowym dnju a tuž trochu zašo hač spočatnje wočakowane. We wobkrućenju předsydowacy sudnik Theo Dahm rozłoži, zo njeje žanych pokazkow na mjenje ćežki njeskutk. Wobskorženy drje bě w afekće a w stawje hłuboko sahaceho mylenja wědomja jednał. Přiwšěm bě wón tola – byrnjež we wobmjezowanej měrje – „knjez swojeho rozuma“. Zo bě wón do njeskutka wopojne srědki brał, je afektej polěkowało. We wobłuku wot zakonja předwidźaneho móžneho chłostanja dweju do jědnaće lět wosta sudnistwo ze sydom lětami někak w srjedźnym polu.
Krótkopowěsće (16.06.16)
Tilich wopory wopominał
Drježdźany. Krótko do róčnicy ludoweho zběžka w NDR dnja 17. junija 1953 je sakski ministerski prezident Stanisław Tilich (CDU) namołwjał, wopory politiskeho přesćěhanja wopominać. Zhromadnje z krajnym społnomócnjenym za podłožki stasi Lutzom Rathenowom sej wón wčera w Drježdźanach žadaše, so dale za demokratiju a swobodu zasadźeć.
Wuměłske twórby kupjene
Lipsk. Kulturna załožba Sakskeje je wot lěta 2005 wuměłske twórby w hódnoće 1,6 milionow eurow kupiła. Po tutym puću wona po swójskich informacijach něhdźe 280 wuměłcow, njewšědne wuměłske formy a nadźijapołne talenty spěchowaše. Lětsa su 37 wuměłcow k spěchowanju wuzwolili. Za to maja 170 000 eurow k dispoziciji.
Nowe kołće přepodate
Drježdźany. Sakski krajny sejm ma wotnětka tři pčolace ludy z hač do 35 000 pčołkami. Tak chcedźa plahowanje pčołkow widźomnje podpěrować, prezident krajneho sejma Matthias Rößler (CDU) wčera při přepodaću kołćow potwjerdźi. Wo pčołki, kotrež su na ležownosći sejma njedaloko plenareje žurle zaměstnjene, staraja so Drježdźanscy pčołarjo.
Při „žabje“ a při skale pobyli
Na přeprošenje Chróšćanskeho wjesneho towarstwa poda so minjenu njedźelu wjace hač 40 ludźi z kolesom na wulět. Při słónčnym wjedrje wjedźeše naš puć najprjedy do Hornjeho Hajnka. Składnostnje dnja wotewrjeneje pisarnje wobhladachmy sej tam dom a zahrodu Jurja Brězana. Wot wnučkow spisowaćela zhonichmy tójšto zajimaweho. Dale jědźechmy – zwjetša po pólnych pućikach – přez Smječkecy a Wěteńcu do Miłoćic. Při „žabje“ běše hižo swačina přihotowana. Tykanc a kofej přeprosyštej k přestawce z přijomnej bjesadu.
Nuzowy pad w šuli zwučowali
Ralbicy (aha/SN). Tele dny njezadźiwachu so jenož Ralbičenjo, ale tež tam nimojěducy zastróženi, što je so na tamnišej wyšej šuli stało. Wjacore wohnjowoborne awta a wulka syła wobornikow, wuhotowanych ze škitnymi maskami k dychanju, tam chwatnje wobornu techniku posłužowaše.
Pozadk bě, zo bě wyši hašenski mišter Achim Měrćink, nawoda wšěch woborow Ralbičansko-Róžeńčanskeje gmejny, po dorěčenju z wjesnjanostu Hubertusom Ryćerjom (CDU) zhromadne zwučowanje při šuli zwołał. Hižo do toho dorěča wón z nawodami wobdźělenych woborow zaměr kóždolětneho zhromadneho zwučowanja. Zaběrachu so z nałožowanjom a z prawym dodźerženjom předpisow a normow za škit dychanja w padźe wohenja a dorěčachu sej postupowanje při trěbnym wuchowanju w nuzowym padźe.
Jeničce koncept wottorhanja
Na wobydlerskej zhromadźiznje wizije do přichoda předstajili
Wojerecy (AK/SN). Nowoměšćanski dźěl Wojerec ma přichodnje powabne městno k bydlenju za swójby a seniorow być. „Trjebamy atraktiwne nowe město, dokelž su tu wažne zarjadnišća kaž Łužiska hala, Łužiski center, kupjel a klinikum“, rjekny wyši měšćanosta Stefan Skora (CDU) wčera na wobydlerskej zhromadźiznje před 200 připosłucharjemi. Tam předstajichu wuwićowy koncept města hač do lěta 2030.
Ličba wobydlerjow budźe tež přichodnje dale woteběrać. Hižo dźensa je 40 procentow wšěch ludźi w nowym měsće staršich hač 65 lět. Jenož dwanaće procentow je 19 do 35 lět, rozłoži Nico Hoffmann z Lipšćanskeje firmy DSK. Wot lěta 1997 su za něhdźe 30 milionow eurow dohromady 9 000 bydlenjow zwottorhali. Přichodne lěta ma dalšich 6 000 bydlenjow slědować. Dźensa bydli w nowym měsće 19 000 wobydlerjow, w lěće 2030 budźe drje jich jeno hišće 11 000.
Plan wuslědk konsolidacije
Rakecy (JK/SN). Płaćiwy hospodarski plan ma wot wčerawšeho Rakečanska gmejna. Z hłosami frakcijow Swobodnych wolerjow a CDU jón wjetšina radźićelow schwali. Frakcija bjezstronskich wolerjow so zasadnje přećiwo naćiskej wupraji, skedźbniwši na njedostatki wšelakich wudawkow a łahodne kalkulowanje. Etat předwidźi wurunane dochody a wudawki. Přiwšěm napominaše wjesnjanosta Swen Nowotny (CDU) radźićelow a wobydlerjow, zo bychu łahodnje z financami wobchadźeli a sej wuswětlili, zo nima gmejna bjezskónčne móžnosće. Hladajo na susodne gmejny pak maja w Rakecach dobre wuchadźišćo. Komornica Franziska Pfeiffer přeradźi, zo je zaměr, měć za něšto lět šešćcyfrowu pozitiwnu ličbu pod smužku, zo móhli rezerwy zapołožić.
W kehelowanju wubědźowachu so wčera w Chróšćanskim Domje swj. ...
Policija (15.06.16)
Kopor požadany był
Njeswačidło. Před paduchami kopora su jednoswójbne domy runje tak mało wěste kaž cyrkwje. Mjez skućićelemi wosebje woblubowane su twarnišća, na kotrychž kónc tydźenja nichtó njedźěła, tak zo njejsu dlěši čas wobstražowane. Minjene dny běchu sej paduši wupytali bywše Njeswačanske šulske twarjenje při hrodowym parku. Wulki dom tuchwilu na bydlenja z wobstajnym hladanjom přetwarjeja. Tam pokradnychu něhdźe 90 metrow koporowych rołow z wotpowědnej izolaciju. Nimo toho so z twarnišća dalše twaršćizny zhubichu, kaž Zhorjelska policajska direkcija w nowinskim wozjewjenju zdźěli. Pjenježna hódnota wučinja něhdźe štyricyfrowu sumu. Kriminalna policija nětko za paduchami kopora pyta.
Swoje dźěło zhromadnje wusměrja
Budyšin (rw/SN). Za hłubše zhromadne dźěło wuprajichu so tele dny na swojim zetkanju socialni dźěłaćerjo a projektowe koordinatorki młodźinskeho dźěła w Domowinje a we wotrjedźe Rěčneho centruma WITAJ Franciska Wróblowa a Juliana Kaulfürstowa (projektowej koordinatorce srjedźna Łužica, Slepo), Lorenc Jankowsky (regionalny team Wojerecy), Franciska Šulcojc (Delnja Łužica, Choćebuz), Franciska Zopic (regionalny team zapadna Łužica), Rejzka Wałdźic (Hornja Łužica, serbski sydlenski rum) a Edit Šurowa (regionalny team Budyšin/Radwor). Tak chcedźa w přichodźe nimo prawidłownych zetkanjow tež zhromadne projekty wuwić, terminy wothłosować a za kooperacije mjez teritorialnje šěroko wupřestrětymi projektami na polu serbskeho młodźinskeho dźěła wabić.
Na zhromadne zeńdźenje přeprosyła běše kubłanska referentka Domowiny Rejzka Wałdźic. Do toho běchu wuwili zhromadne logo „my – serbske młodźinske dźěło“, pod kotrymž planuja socialni dźěłaćerjo a koordinatorki w přichodźe jednotne wustupowanje we wobłuku swojeho skutkowanja.
