Tři štwórćiny dźěłow hotowe
Ponowjenje Worklečanskeje sportownje cyle po planje – ale dróše
Worklecy (SN/MWj). Wulku twarsku taflu při Worklečanskej šuli njemóžeš přewidźeć. Tež twarski material, wuryte dźěry, firmowe awta a twarscy dźěłaćerjo pokazuja na to, zo tamnišu sportownju tuchwilu wobšěrnje ponowjeja. „Smy něhdźe tři štwórćiny wšitkich dźěłow zmištrowali. Hač na strukturu přitwara je wonkownje wšitko hotowe. Zyma nam ničo njewučinja. Móžemy nětko z nutřkownym wutwarom pokročować“, je dotalny rezimej wjesnjanosty Worklec Franca Bruska (CDU). Hala sama je wonkownje izolowana, z nowymi woknami wuhotowana a spodobnje wobarbjena.
Wuměnkarjow zawjeselili
Na přeprošenje wjesnjanosty gmejny Chrósćicy Marka Klimana (CDU) zetkachu so tele dny wuměnkarjo k zhromadnej adwentničce w sydarni Chróšćanskeje wjacezaměroweje hale „Jednota“. Tam dožiwichu hosćo wobšěrny kulturny program šulerjow zakładneje šule „Jurij Chěžka“. Z wušiknosću a połni elana dopokazachu wuknjacy swoje kmanosće w spěwach, basnjach kaž tež w spěwnych a hudźbnych scenach. Jako wjeršk předstaji 4. lětnik bajku wo „zbožownym Janku“. Wučerkam a šulerjam słuša dźak za derje poradźeny kulturny poskitk.
Po programje dachu sej wuměnkarjo kofej, wosušk a dalše přikuski słodźeć, kotrež běštaj Chróšćanski pjekar Florian Zahrodnik a firma EVSE sponserowałoj. Přizamkny so čiła rozmołwa. Kaž bě z njeje wusłyšeć, sej seniorojo jara chwala, zo su zaso jónu po jara dołhim času tež na staršu generaciju myslili. Šulerjo wužiwachu składnosć, hosćom swoje paslenki poskićeć. Dobytk a pjenježne připóznaće gmejny nochcedźa za sebje wužiwać, ale darja woboje Towarstwu swj. Filomeny.
Bjez nuzy ničo njepředać
Farski dom je za žiwjenje Wotrowskeje wosady wažny, bróžnja a hródź na samsnej ležownosći porno tomu nic. Tole je wuslědk naprašowanja, kotrež je wosadna rada přewjedła.
Wotrow (SN/MWj). Mjeztym hižo šěsć lět Wotrowska fara prózdna steji. Před pozadkom, zo ordinariat Drježdźansko-Mišnjanskeho biskopstwa wo přichodźe cyrkwinskich imobilijow rozmysluje, chcyše Wotrowska wosadna rada wědźeć, kak wosadni wo přichodźe fary mysla. Tohodla rozdźělichu na lětušej kermuši 132 naprašnikow z nimale 40 prašenjemi.
Krótkopowěsće (12.12.16)
Proša wo rozmołwu
Budyšin. Iniciatiwna skupina Serbski sejm je so na cyłkownje 38 politisce zamołwitych Sakskeje, Braniborskeje a Zwjazka wobroćiła a jich wo přeprošenje na rozmołwu prosyła. Po tym puću chcedźa politikarjam swój koncept za wutworjenje serbskeho parlamenta předstajić, w lisće rěka. Jedyn z adresatow je zwjazkowa kanclerka Angela Merkel (CDU).
ECMI wobsteji 20 lět
Flensburg. Europski centrum za prašenja mjeńšin (ECMI) je tele dny 20. róčnicu swojeho wobstaća woswjećił. Na swjedźenskim zarjadowanju w Flensburgu wobdźěli so tež społnomócnjeny zwjazkoweho knježerstwa za prašenja mjeńšin Hartmut Koschyk (CSU), kaž ze zdźělenki ECMI wuchadźa. Knježerstwa Danskeje, Němskeje a Schleswigsko-Holsteinskeje běchu ECMI 1996 załožili.
Witataj kandidaturu Serbowki
Zhromadnje přećiwo wulkowokrjesej
Baršć (HA/SN). Po tym zo bě braniborske nutřkowne ministerstwo w oktobrje konkretny plan k zwoprawdźenju wobšěrneje wokrjesneje reformy wozjewiło, spřećiwjenje spochi přiběra. Předwidźane je, zo změje Kraj Braniborska wot lěta 2019 jenož hišće dźewjeć wokrjesow a zo wostanje Podstupim jeničke bjezwokrjesne město. Tuchwilu ma 14 wokrjesow a tři bjezwokrjesne města Choćebuz, Frankfurt nad Wódru a Podstupim.
Wosebje razne spjećowanje komunalnych politikarjow, opozicije a wobydlerjow jewi so w južnym dźělu Braniborskeje. Knježaca koalicija SPD a Lěwicy chcyła tamniše tři wokrjesy Srjewja-Nysa, Hornje Błóta-Łužica a Halštrow-Łobjo zjednoćić a zhromadnje z městom Choćebuzom wulkowokrjes z mjenom Delnja Łužica wutworić. W nim by něhdźe 500 000 ludźi bydliło. Wokrjes by z někak 5 000 kwadratnymi kilometrami tak wulki był kaž zwjazkowy kraj Posaarska, kotryž ma šěsć wokrjesow.
Wjele awtow w Židowje po puću
Krótkopowěsće (09.12.16)
Twarc bombow zajaty
Drježdźany. Dwaj a poł měsaca po bombowymaj nadpadomaj na mošeju a na kongresowy centrum w Drježdźanach je policija 29lětneho podhladneho z Drježdźan zajała. Při přepytowanjach namakachu zastojnicy maćizny, kotrež so za twar bombow hodźa, kaž statne rěčnistwo dźensa zdźěli. Na městnomaj njeskutka namakany genetiski material a DNA pohladneho so kryjetej.
Konkretne ličby njepředleža
Budyšin. Koncern Bombardier chce po informacijach nowiny Handelsblatt jasnje wjac dźěłowych městnow šmórać, hač je dotal znate: 2 500 po wšej Němskej, mjez druhim w Budyšinje, Zhorjelcu a Hennigsdorfje. Konkretne Ličby njeje koncern dotal wozjewił. Dźěłarnistwo IG metal chce přichodny štwórtk w Budyšinje přećiwo tomu protestować.
Masowy doping w Ruskej
Luhmann nowy změrc
Pančicy-Kukow. Nowy změrc (Friedensrichter) za pjeć gmejnow zarjadniskeho zwjazka Při Klóšterskej wodźe budźe wot 1. januara 2017 Eduard Luhmann ze Smjerdźaceje. 70lětny bě jako jenički za tele čestnohamtske zastojnstwo kandidował, a zhromadźizna zarjadniskeho zwjazka je jeho zawčerawšim wuzwoliła. Wólbna doba noweho změrca traje hač do kónca lěta 2021.
Z wjerchowku a dźěćatkom
Wojerecy. Hač do njedźele přeprošeja we Wojerecach na Teschenske wiki, kaž tam swoje dohodowne wiki mjenuja. Wjerchowka von Teschen, Wojerowske dźěćatko a rumpodich su je dźensa wotewrěli. Nimo mnohich předawanskich budkow a kulinariskich poskitkow maja tam tež wobšěrne kulturne zarjadowanja, kaž koncerty, kinowe předstajenja a klankodźiwadło. Tohorunja hač do njedźele, ale stajnje hakle wot 16 hodź. su na Wojerowskim hrodźe wosebite romantiske wiki rjemjesła, hdźež předstajeja so blidar, pčołarka, módroćišćerka a dalši.
Policija (09.12.16)
Na čerwjene bankowki kedźbować
Biskopicy. Při rozbuchnjenju pjenježneho awtomata w nocy na štwórtk w Biskopicach (SN rozprawjachu) su njeznaći něhdźe 100 000 eurow rubili. Při tym pak je barbowa patrona bankowki wočerwjeniła. Policija tuž prosy, na tajke z čerwjenej barbu woznamjenjene bankowki kedźbować. Štóž tajke poskićene dóstanje, njech informuje policiju.
Trjebaja informacije
Přijězd k pěstowarni často přičina pohórškow
Hórki (JK/SN). Swoje poslednje lětuše posedźenje přewjedźechu Chróšćanscy gmejnscy radźićeljo wčera w Hórčanskim Młynkec hosćencu. Byrnjež na dnjowym porjedźe přewjele dypkow njebyło, mějachu tola dosć dokładnje wuradźować. Krajna direkcija w Drježdźanach wočakuje wot gmejny stejišćo k planowanej nowej deponiji klasy 0 w něhdyšej kaolinowej jamje na Šibjeńcy. Tam chce priwatnik mineraliske twarske wotpadki składować dać. Při tym pak ma so wobkedźbować, zo je składowanje planowane na tam hižo eksistowacej něhdyšej deponiji. To wuwabi mjez radźićelemi wobmyslenja, kak so staw dnowneje wody změni a w kotrej měrje so kwalita wody wuwije. Tučasnje drje so w pjeć studnjach při jamje woda zběra a kontroluje. Kak pak to z nastaćom noweje deponije budźe, chcedźa radźićeljo hišće dokładnišo wědźeć.
