Łusk (SN/MWj). Z dróhotwarskimi dźěłami na wokrjesnymaj dróhomaj K 7230 a K 7227 we Łusku pola Wósporka póndźelu, 13. februara, pokročuja. Kaž Budyski krajnoradny zarjad zdźěli, budu tam nětko škody, načinjene wot wulkeje wody 2013, dale wotstronjene. Planowane je jězdnje a pódlanske připrawy ponowić, zepěranske murje a chódnik twarić kaž tež roły za wotwodźenje dešćikoweje wody­ kłasć.

Twarske dźěła přewjedu w třoch wot­rězkach. Wot přichodneje póndźele hač do spočatka měrca budźe wokrjesna dróha K 7230 wot mosta nad Kotečanskej wodu hač k přijězdej ke knježemu dworej dospołnje zawrjena. Wot 1. měrca puć z Kotec kaž tež tón z Rodec přez Łusk dospołnje zawru. W tym času budźe dróhotwar we wsy na rjedźe a nimo toho ponowja­ dróhu do Rodec zwonka wsy. W třećim twarskim wotrězku wot spočatka julija budźe křižowanišćo wo­krjesneju dróhow do Kotec a Rodec zaso połojčnje wotewrjene. Za čas twarskich dźěłow dyrbja tohorunja busowe čary přepołožić. Wobydlerjo měli změny jězbneho plana wobkedźbować.

Spěšnosć kontrolowali

Čelchow. Wobchadna stražna słužba je zawčerawšim na Budyskej dróze w Čelchowje dodźerženje předpisaneje spěšnosće kontrolowała. Dowolenych je tam 50 kilometrow na hodźinu. W běhu pjeć hodźin trajaceje akcije je měrjenska technika 418 jězdźidłow zapopadnyła. Dźesać šoferow bě přespěšnje po puću. Njesławny rekord docpě wosobowe awto typa BMW z Hamburgskim čisłom, kotryž błysknychu ze 77 km/h. Wodźerka změje nětko sto eurow pokuty płaćić a dóstanje dypk w Flensburgu.

Na dróze a we wobchodźe harował

Kamjenc. Alkoholizowaneho muža dla su zawčerawšim policiju w Kamjencu wołali. 34lětny bě na Macherowej před jěduce awta běhał a we wobchodźe ludźi poćežował. Jako policisća jeho sobu wzachu, wón tež na nich mócnje swarješe.

Njebjelčicy. Štóž chce nawuknyć, kak so serbske jutrowne jejka debja, změje k tomu składnosć sobotu a njedźelu, 11. a 12. februara, w Njebjelčanskim gmejnskim centrumje. Pod nawodom Marje Šefrichoweje móža zajimcy wobaj dnjej w času wot 14 do 16 hodź. debjenje jutrownych jejkow nawuknyć. Za barbu, pjerka a wósk zběraja na wobdźělnika pjeć eurow. Wudute jeja měł kóždy sam sobu přinjesć. Zajimcy njech přizjewja so po 18 hodź. pod telefonowym čisłom 03578/ 301 804.

Ze Zhorjelca do Naumburga

Chrósćicy. Wo swojim putnikowanju po Jakubowym puću ze Zhorjelca do Naumburga přednošuje Anke Wolfert z Drježdźan sobotu, 11. februara, w 19.45 hodź. w Chróšćanskej putniskej hospodźe. Hobbyjowa fotografka pokaza swój wosobinski wid na puć z krasnymi wobrazami wo znatych a mjenje znatych blečkach, rozprawja wo ludźoch, kotřiž su ducy po puću zaćišć w njej zawostajili, a powěda wo njezapomnitych dožiwjenjach, na přikład wo kinje w farskej bróžni abo wo nóclěhu na chórje romani­skeje cyrkwje. Hižo w 16 hodź su dźěći z Chrósćic a wokoliny na serbske kino přeprošene. Ćeta Monika pokaza jim trikowy film „Puće fórmana Štrympički“.