Planuja nowe awtomaty
Budyšin (CK/SN). Z kreditnej kartku abo z handyjom při parkowanskim awtomaće zapłaćić ma přichodnje tež w Budyšinje móžno być. Awtomaty měli nimo toho drobne pjenjezy wudawać móc a wjacerěčnje wuhotowane być. Dokelž w sprjewinym měsće tuchwilu nastajene awtomaty hižo načasne njejsu, zasadźa so frakcija FDP měšćanskeje rady za to je ponowić. Na zašłym posedźenju radźićelow je předsyda frakcije Mike Hauschild zarjadnistwo napominał, sej wotpowědne poskitki wobstarać.
Ležownosće prosće předrohe
Delanska gmejna chce z młodymi swójbami w rozmołwje wostać
Róžant (JK/SN). Wjesnjanosta gmejny Ralbicy-Róžant Hubertus Ryćer (CDU) kaž tež jeho zastupjer Tomaš Bjeńš budźetaj hišće dlěši čas choraj. Tole zdźělichu na wčerawšim posedźenju gmejnskeje rady. Tak druhi zastupowacy wjesnjanosta Michał Šołta (wobaj SWZ Delany) nadawki wjesnjanosty dale wukonja.
Wutworja dalšu twarsku městnosć
Byrnjež hłowny dypk dnjoweho porjada na wčerawšim posedźenju Worklečanskeje gmejnskeje rady – wutwar Klóšterskeje wody w Nowej Wjesce – chorosće referentki dla wupadnył, njebě wječor njezajimawy, mjez druhim tež twarskich naležnosćow dla.
Worklecy (SN/MWj). Młodym swójbam zda so Worklečanska gmejna dale jara atraktiwna być. Po tym zo za Smječkečansku Winicu mjeztym druha twarska próstwa předleži, ma tež we Wudworju městnosć za nowy jednoswójbny dom nastać, a to na bjezposrědnjej južnej kromje wsy. Tam steja tuchwilu hišće kontejnery wjesneho młodźinskeho kluba. Na tymle městnje chce sej serbska swójba z dźěćimi, bydlaca hišće w starych zwjazkowych krajach, nowy dom twarić.
Krótkopowěsće (27.01.17)
Myto na česć Pětra Barta
Kamjenc. Prěnje myto na česć Pětra Barta spožča Kamjenskej 2. wyšej šuli a spěchowanskej šuli za zbrašenych „Johann Gottfried Bönisch“ zhromadnje. Z 1 000 eurami dotěrowane myto přepodadźa spočatk februara na nowolětnym přijeću města Kamjenca, kaž wčera zdźělichu. Ergoterapeut Michael Schiewack bě to nastorčił. Město projekt podpěruje. Loni zemrěty Pětr Bart bě so wosebje na polu inkluzije a sporta angažował.
Wopory zhromadnje wopominali
Praha. Prěni króć scyła su Češa a bayerscy zastupjerjo dźensa wopory nacionalsocialistiskeho holocausta zhromadnje počesćili. Delegacija Bayerskeho krajneho sejma je so na swjatočnosći w Praskim senaće wobdźěliła. Na programje steješe tež wopyt něhdyšeju koncentraciskeju lěhwow Litoměřice a Terezín.
Matura přez internet
Chcedźa kup „Króny“ pruwować
Hišće na zašłym posedźenju Budyskeje měšćanskeje rady za tym klinčeše, zo město žadyn zajim nima měšćansku halu „Króna“ kupić. Po wšěm zdaću to nětko hinak widźi.
Budyšin (CK/SN). Wyši měšćanosta Alexander Ahrens (njestronjan) ma z wobsedźerjom „Króny“ wo móžnej kupje měšćanskeje hale jednać. To je měšćanska rada na swojim wčerawšim posedźenju wobzamknyła. Tule podpěru radźićelow bě sej Ahrens přał a bě ju tež jednohłósnje dóstał.
„Króna“ je na předań, dokelž so Berlinske předewzaće Onnasch w Budyšinje hižo angažować nochce. Dźe pak wo wjele wjace. Na terenje mjez Kamjentnej a Hornčerskej su nimo toho hotel, bydlenske domy a wulke parkowanišćo. Zo je areal swojeho połoženja dla za měšćanske wuwiće wažny, wo tym běchu sej radźićeljo a zarjadnistwo wot wšeho spočatka přezjedni. W nowembru bě wjetšina radźićelow namjetowała, zo měli so wuměnjenja za kup pruwować a tež to, kak hodźała so financować. Wčera su namjetej přihłosowali.
Krótkopowěsće (26.01.17)
Woidke: Populistam so wobarać
Podstupim. Braniborski ministerski prezident Dietmar Woidke (SPD) je hladajo na jutřiši wopomnjenski dźeń za wopory nacionalsocializma namołwił, so prawicarskim populistam a demagogam wobarać. Runje we wichorojtych časach dyrbja demokratiske mocy hromadźe stać, sej wón w zdźělence žada. Zwjazkowy sejm chce wopory jutře wopominać.
Kritizuja rozdawanje nadawkow
Lipsk. Sakski zličbowanski zarjad je rozdawanje nadawkow za zjawnje spěchowane twarske předewzaća kritizował. Při pruwowanjach bě zarjad zwěsćił, zo so předpisy stajnje zaso ranja, bjez toho zo by to za zamołwitych konsekwency měło. Statne instancy maja dokładnišo pruwować, kak so ze spěchowanskimi srědkami wobchadźa.
Podpěruja młode předewzaća
Policija (26.01.17)
Najskerje z woknom padnyła
Kamjenc. Policiju a wuchowansku słužbu su wčera popołdnju ke Kamjenskemu domej za požadarjow azyla na Macherowej wołali. Za twarjenjom ležeše ćežko zranjena młoda wobydlerka. Sobuwobydlerjo běchu ju namakali. 20lětnu Syričanku dowjezechu ze žiwjenjastrašnymi zranjenjemi do chorownje. Što bě so dokładnje stało, spyta policija nětko wuslědźić. Najskerje bě młoda mać jenož něšto měsacow stareho dźěsća z woknom wjaceposchodoweho domu padnyła. Kriminalisća pad přepytuja.
Njewjedra, suchota a wichory
Łužiske gmejny tež w přichodźe wjedrowym kapriolam wusadźene
Worklecy (JK/SN). Zjawny diskusijny forum gmejnskeho zwjazka CDU wotmě so wčera wječor w sydarni Worklečanskeje wohnjoweje wobory. Zapósłanc CDU w Sakskim krajnym sejmje Alojs Mikławšk bě k tomu přeprosył statneho sekretara w ministerstwje za ratarstwo a wobswět Herberta Wolffa. Wón přednošowaše wo ekstremnych wjedrowych wobstejnosćach a bjezposrědnich wuskutkach klimoweje změny w Sakskej. Při tym skedźbni na to, zo budu wosebje łužiske gmejny wjedrowym ekstremam přichodnje dźeń a bóle wusadźane. W ministerstwje předleža spušćomne informacije, po kotrychž njebudu sylne zliwki, njewjedra, wichory abo wulka suchota, kaž smy je w minjenych lětach nazhonili, wuwzaća, ale skerje normalita. Wosebje ratarstwo změje pod wuskutkami měnjateho a njewobstajneho wjedra ćerpjeć. Poskićenu pomoc sakskeho knježerstwa, sćěhi wjedrowych kapriolow wobmjezować abo jim zadźěwać, ratarjo dotal mało wužiwaja, Wolff podšmórny.
Hač k zarywej hišće dołho traje
Delnja Hórka (UM/SN). W aktualnym, hač do lěta 2030 płaćiwym zwjazkowym wobchadnym planje je w Budyskim wokrjesu jenož jenički dróhotwarski projekt ze statusom prěnjorjadneje potrjeby, mjenujcy twar wobjězdki zwjazkoweje dróhi B 156 wokoło Delnjeje Hórki. Přednaćisk, na kotrymž hižo wot lěta 2009 dźěłaja, su kónc 2016 ke schwalenju zapodali, wobkrući Nicole Wernicke z krajneho zarjada za dróhotwar a wobchad (LASuV). Tónle naćisk pak je jeno započatk planowanja. Lětsa z tym pokročuja, zo bychu twarske prawo docpěli, z kotrymž móža tak mjenowanu proceduru zawěsćenja plana zawjesć. Na te wašnje móža wobydlerjo swoje wobmyslenja přednjesć, tak zo hodźa so wšitke zajimy wobkedźbować. Kak dołho jednanje traje, Nicole Wernicke rjec njemóže. „Trjebamy wjele časa, zo bychmy wšitke móžne pokiwy a znapřećiwjenja pruwowali.“
Wola noweho wyšeho měšćanostu
Dokelž so wólbna doba Běłowodźanskeho wyšeho měšćanosty lětsa kónči, su nowowólby do zastojnstwa trěbne. Dotal jenički kandidat je tuchwilny wyši měšćanosta Torsten Pötzsch.
Běła Woda (AK/SN). 24. septembra 2017 maja wobydlerjo Běłeje Wody noweho wyšeho měšćanostu wolić. To je tamniša měšćanska rada na swojim wčerawšim posedźenju wobzamknyła. Dyrbjał-li druhi wólbny přechod trěbny być, měł so wón 22. oktobra přewjesć.
Nowowólby su trěbne, dokelž so wólbna doba amtěrowaceho wyšeho měšćanosty Torstena Pötzscha (wolerske zjednoćenstwo Klartext) lětsa kónči. Wot nowembra 2010 wón měšćanske zarjadnistwo nawjeduje, za zastojnstwo pak 24. septembra znowa kandiduje. Kaž Pötzsch wčera sam rjekny, běchu so někotři wobydlerjo naprašowali, hač je dalšich kandidatow. Hač w měšćanskej radźe zastupjene strony a dalše wolerske zjednoćenstwa swójskeho kandidata nastaja, njeje dotal znate.
