Sprawne rjadowanje namakać
Ralbičanske hońtwjerske drustwo solidnje dźěła. Přiwšěm su jeho čłonojo na njedawnej hłownej zhromadźiznje wo někotrejžkuli aktualnej temje diskutowali.
Ralbicy (JK/SN). Wurunanu bilancu w hońtwjerskim kaž tež hospodarskim dźěle předpołoži předsyda Ralbičanskeho hońtwjerskeho drustwa Bjarnat Brězan minjeny pjatk w tamnišim sportowym domje. W rozprawje wuzběhny wón dobry poměr mjez přenajerjemi hońtwjerskich ležownosćow a hońtwjerjemi. Tak njetrjebaše drustwo loni žane wot dźiwiny zawinjene škody płaćić. Starosće pak načinjeja jemu njewoprawnjene žadanja a wupłaćenja hońtwjerskeje najenskeje danje (Jagdpacht). Drustwu njepředleži bohužel aktualny zapis wobsedźerjow ležownosćow, na kotrychž wone hospodari. Tak mjenowany kataster chcedźa ručež móžno nastajić a najenske pjenjezy jenož tym wupłaćić, kotrymž wone tež přisteja.
„My jeno přećehnjemy!“
Dźěći a wučerjo Handrija Zejlerjoweje šule hladaja do přichoda
Wojerecy (MFü/SN). „Z časa, jako běchmy sami dźěći, worjoł k tutej šuli słuša“, praji Christina Kasperowa. Staršiska rěčnica Wojerowskeje zakładneje šule Při worjole „Handrij Zejler“ bě sama šulerka na kubłanišću, kotrež nětko bórze přećehnje. Měšćanska rada je to na swojim posedźenju kónc februara wobzamknyła. Nowa městnosć budźe tuchwilna wyša šula „Na kromje města“.
Darićelow kreje počesćili
Twarnišćo – nó a?
Ach, kak móžemy so rjenje hóršić, hdyž zaso raz něhdźe nowe twarnišćo wuhladamy. Rady so potom prašamy, hač je to scyła trjeba, čehodla runje nětko a nic pozdźišo, što to zaso raz płaći. A scyła bychmy wšitko lěpje činili. Runje tak so rady hóršimy, hdyž mjez jednej dźěru na puću k druhej slalom jězdźimy a sej snano cyle připódla awto wobškodźimy. Kaž činiš, je wopak.
Druhdy by nam trochu tyło, wodychnyć a z mjenje napjatosću přez žiwjenje hić. Twarnišća kaž te na Schillerowych zelenišćach w Budyšinje dyrbja druhdy być, wšako chcemy wšitcy porjadne dróhi měć. Tež ja tónle puć rady wužiwam, hdyž chcu po swjatoku z města won. Přichodne tydźenje dyrbju sej tuž chcyjo nochcyjo hinaši puć pytać a – haj – tróšku wjace chwile zaplanować. A nimo toho je kóžde twarnišćo raz hotowe, hdyž so runje wo lětanišćo njejedna. Marian Wjeńka
Kupanje w sezonje dowolene
Łaz (AK/SN). We wothłosowanju ze Sakskim wyšim hórniskim zarjadom Freiberg přihotuje Łazowska gmejna tuchwilu zhromadnje z Łužiskej a srjedźoněmskej towaršnosću hórnistwoweho zarjadnistwa (LMBV) saněrowanje Slěborneho jězora. „Lětsa pak njebudźemy přibrjóh dale skrućeć. Tohodla je móžno Bjedrichečanski (Friedersdorf) přibrjóh wužiwać“, zdźěli zamołwity nawoda wotrjada projektoweho managementa wuchod pola LMBV Gerd Richter. Dowolnosć gmejnje předleži a je wot 15. apryla płaćiwa. Tak budźe we wupokazanym wotrězku přibrjoha Slěborneho jězora cyłu sezonu hač do oktobra móžno so kupać.
Dale dźěłatej LMBV a gmejna Łaz tuchwilu na wotrunanskim dojednanju. „Na zakładźe naprawow, škitać přibrjóh Slěborneho jězora, su žadanja wotrunanja po sakskim policajskim zakonju zrjadowane“, praji nowinski rěčnik LMBV dr. Uwe Steinhuber.
Prócuja so njedostatki wotstronić
Wojerecy (AK/SN). Wo dwurěčnosć w měšćanskim wobrazu so Wojerecy najwšelakorišo prócuja. Tole podšmórny wyši měšćanosta Stefan Skora (CDU) na wčerawšim posedźenju měšćanskeje rady. Wón rozprawješe wo tym, kak město wustawki wo spěchowanju serbskeje rěče a kultury zwoprawdźa.
Na Lessingowym a Foucaultowym gymnaziju su serbski napis nachwatali. Tajki matej nětko tež dwě zakładnej šuli, po tym zo běchu jej saněrowali. Wobydlerski centrum Piwarska hasa 1 ma nimo wonkowneho serbskeho napisa tež nutřka wšitke rumnosće serbsce a němsce popisane. „Wot lěta 2011 mamy na wšitkich twarskich taflach w měsće znajmjeńša serbske pomjenowanje města“, Stefan Skora rozłoži, „hdźež je to móžno, tež twarski projekt dwurěčnje pomjenujemy.“
Wuměłstwowy bus tež do klóštra
Pančicy-Kukow (SN/MWj). Akcija wuměłstwoweho busa w Hornjej Łužicy wabi lětsa 24. a 25. junija z nowosću. Nimo mnohich dalšich stacijow poskića so prěni raz tež klóšter Marijina hwězda w Pančicach-Kukowje jako zastanišćo. Tole zdźěli nawoda dźěłarnje za zbrašenych swj. Michała Andreas Ošika, kiž ze swojimi sobudźěłaćerjemi a ze zbrašenymi tónle podawk přihotuje.
Pod hesłom „Drohoćinki klóštra“ chcedźa wopytowarjam klóštersku pokładnju runje tak zbližić kaž wobchod, posylnjenje w klóšterskej pjekarni a susodnu zahrodu. Na te wašnje chcedźa mjez druhim tych zajimcow narěčeć, kotřiž drje klóšter znaja, ale chcedźa jón raz na trochu hinaše wašnje dožiwić, Andreas Ošika rozłoži.
Krótkopowěsće (29.03.17)
Farar Beno Šołta njeboh
Kamjenc. Farar na wuměnku Beno Šołta je wčera w starobje 79 lět w Kamjencu zemrěł. Po měšniskej swjećiznje 1962 skutkowaše wón w Markneukirchenje, Chrósćicach, Wotrowje, Kulowje a Radworju. 1984 da so do Załomja přesadźić. Minjene lěta je časćišo njedźelnu Božu mšu w Róžeńće swjećił. Rěčnje nadarjeny bohosłowc bě wjacore serbske cyrkwinske spisy sobu zestajał a redigował.
Namołwja k protestam
Berlin. W rozkorje nastupajo planowany wottwar dźěłowych městnow w kanadiskim koncernje Bombardier ze stejnišćomaj w Zhorjelcu a Budyšinje njeje přeco hišće žanoho dojednanja. Dźěłarnistwo IG metal namołwja tuž k protestam. Jutře planuje dźěłarnistwo akciju w Berlinje, hdźež wočakuje něhdźe 1 000 wobdźělnikow.
Iniciatiwa smě so registrować dać
Časowy swědk wo swojich čěskich lětach rozprawjał
„Serbja trjebaja serbske šule“, běše po Druhej swětowej wójnje dewiza čěskich přećelow Serbow. Tak podachu so hižo 1. decembra 1945 nadarjeni serbscy šulerjo, mjez nimi Pětr a Jan Brězan ze Sulšečanskeje wjeledźěćneje młynskeje swójby, z ćahom do Českeje Lípy. Pozdźiši skótny lěkar, kiž sta so po politiskej změnje tež z městopředsydu Domowiny a bě wjele lět předsyda Kulowskeho Bratrowstwa, ma jara čiłe dopomnjenki na tele dožiwjenja. Njedawno rozprawješe wón wo tychle za přichodnu serbsku inteligencu jara spomóžnych lětach w kruhu Budyskich katolskich serbskich seniorow.
