Štyridypkowa agenda ma zhromadne dźěło Hamorskeje gmejny z energijowym koncernom LEAG skrućić.

Hamor (AK/SN). Gmejna Hamor sadźa dale na zhromadne skutkowanje z koncernom Łužiska energija a hórnistwo (LEAG). Na minjenej gmejnskej radźe předstaji Hamorski wjesnjanosta Achim Junker (CDU) radźićelam zaměry dalšeho tajkeho zhromadneho dźěła.

Jedyn zaměr měł po předstawach wjesnjanosty Junkera być wujednać koope­raciske zrěčenje z koncernom, a to štyridypkowe. „Wobsahować ma wone zaru­čenje a rozšěrjenje dźěłowych městnow w industriji, wuwiće infrastruktury na stejnišćach koncerna LEAG, dalewuwiće krajiny po hórnistwje a spěchowanje wjesneje zhromadnosće w Hamorskej gmejnje“, rozłoži Achim Junker w swojej rozprawje k aktualnemu połoženju. Dotal bu štyridypkowa agenda jenož ertnje wobkrućena. Wjesnjanosta pak so nadźija, zo dóstanje prawje bórze pisomne a zawjazowace informacije ze stron předsydstwa LEAG.