Komorow (HN/SN). Hakle prěni kónc tydźenja w septembru běchu w Komorowje pola Klukša wulke zetkanje woso­bowych awtow typa VW Käfer přewjedli. A hižo minjeny kónc tydźenja steješe w samsnej wsy 54. holanski swjedźeń na programje. Zakład dołheje tradicije bě w lěće 1956 Domowina połožiła. Pod jeje wjednistwom wuwiwaše so Komorowski swjedźeń k jednomu z najwjetšich tehdyšeho Budyskeho wokrjesa. Po přewróće dóńdźe k přestawce, kotruž pak 1999 ze załoženjom towarstwa Komorowske holanske zetkanje skónčichu a swjedźeń wožiwichu.

Prěni wjeršk bě minjeny pjatk smól­nicowy ćah, kotremuž přizamknychu so reje hač do nocy. Sobota steješe cyle w znamjenju sporta, jako wuslědźichu dobyćerjow pokalow wjesnjanosty w třělenju, darće, kehelowanju a volleyballu. Njedźela bě swójbam wěnowana. Tak mějachu dźěći na swjedźenišću swoje zawjeselenja, liveband nA und postara so wo spodobnu hudźbu, a w tomboli sy móhł jako hłowne myto koleso dobyć. Překwapjenka bě popoł­dnju demonstracija moderneje žnjenskeje techniki.

Drohi diagnozowy nastroj fuk

Mužakow. Wšelki grat kaž tež kompjuter su njeznaći w nocy na póndźelu z awtoweje zamkarnje w Mužakowje pokrad­nyli. Tež diagnozowy nastroj ležeše njezamknjeny w hali, a zadobywarjo njedachu sej dwójce kazać jón sobu wzać. Tele nastroje su paducham awtow wulce witane, dokelž móža z nimi motor jězdźi­dła tež bjez klučika startować. Rada policije, diagnozowe nastroje kaž pjenjezy po dźěle do trezora zamknyć, njebu w tymle padźe wobkedźbowana. Škoda wučinja 10 000 eurow.

Z jónkrótnej přiražku gmejna Łaz Mortkowsku twjerdźiznu podpěruje

Łaz (AK/SN). Za dźiwadłowe inscenacije na Jakubecec twjerdźiznje w Mortkowje přida Łazowska gmejna klětu jónkrótnje 2 100 eurow. Tole su wčera Łazowscy gmejnscy radźićeljo wobzamknyli a tak próstwje mějićela twjerdźizny dr. Andréja Jakubetza wotpowědowali.

Dr. Jakubetz bě so pola kulturneho ruma ­Hornja Łužica-Delnja Šleska wo spěchowanje moderneje swěcoweje a zwukoweje techniki prócował. Po płaćiwych směrnicach pak ma so wotpowědna gmejna – w tym padźe Łazowska – z pjeć procentami wobdźělić. „Jako priwatna wosoba po zakonju tele pjenjezy přidać njesměm“, rozłoži Jakubetz. Wón chce twjerdźiznu jako kulturne městno dale wutwarić. Hakle njedawno je tam Serbski ludowy ansambl hrodowej nocy wuhotował a chce to tež klětu. Sakske krajne jewišća so klětu tohorunja w Mortkowje znowa prezentuja. Předewšěm inscena­cije za swójby chcedźa tule pokazać. Techniku sej stajnje wupožčować pak načinja­ wudawki. Tuž ma swójska technika wotpomhać.