Do kupnicy zaćehnje nowe žiwjenje

štwórtk, 16. julija 2015 spisane wot:

Budyšin (UM/SN). Čas prózdneje bywšeje kupnicy Praktiker při Lubijskej dróze w Budyšinje so nachila. Předewzaće Sta­bilo­ Fachmarkt chce tule hišće lětsa jednu ze swojich prěnich kupnicow w nowych zwjazkowych krajach wotewrěć. Tole­ wobkrući nawoda za marketing předewzaća Markus Wedde na naprašowanje. Dokładny čas wón hišće rjec njemóže. „Chcemy w Sakskej – nimo Budyšina tež w Riesy a Freibergu – tři nowe kup­nicy wutworić. To wězo wšitko naraz njeńdźe,­ tak zo njemóžu hišće rjec, hdy wotewrjenje budźe“, praji Wedde.

Stabilo je hižo lětdźesatki w juhozapadnej Němskej etablěrowane a rozpřestrěwa so nětko tež do dalšich kónčin republiki. „Poskićamy nimo klasiskeho poskitka twarskich wikow tež twory za ratarstwo a lěsnistwo, grat za jězdźidłowe zamkarstwo kaž tež grat za hobbyjowych a profijowych rjemjeslnikow“, Markus Wedde rozłoži. Centrala předewzaća je w badensko-württembergskim Kupferzellu. W Budyskim předewzaću chcedźa 15 dźěłowych městnow wutworić. Domaj w Freibergu a Riesy stej tohorunja bywšej Praktiker-kupnicy.

Dźiwina so wjelka boji

štwórtk, 16. julija 2015 spisane wot:

Hłowna zhromadźizna Worklečanskeho hońtwjerskeho drustwa

Nowa Wjeska (aha/SN). Dohromady 90 wotnajerjow polow, łukow, a lěsow přisłuša Worklečanskemu hońtwjerskemu drustwu. Wot wšeho spočatka Nowowješćan Jan Pjech lěta 1991 załožene drustwo nawjeduje. Hajnikaj Ludwig Helgest a Hinc Krječmar wužiwataj na 625 hektarow wulkej płoninje hońtwjerske prawo, při čimž jimaj městopředsyda drustwa Jurij Lukaš po potrjebje wupomha.

W swojej rozprawje na wčerawšej hłownej zhromadźiznje drustwa Jan Pjech kritisce na minjene hońtwjerske lěto zhladowaše. Tak třělichu hajnicy w běhu lěta jeničce pjeć dańkow, runje telko dźiwich prosatow a jeničke dźiwje swinjo. We wobłuku rubježnych zwěrjatow běchu to štyri šupy a dźewjeć liškow. Rozłožejo hóntwjerske zakonske před­pisy sej Pjech přeješe, zo so wobstatk zwěriny nadźijomnje powjetši. Wón tež njezataji, zo je Róžeńčanska črjóda wjelkow po wšěm zdaću přičina snadneho hońtwjerskeho wunoška. Kelko wjelkow w črjódźe je, to njewě.

Nimo cyrkwjow su tež farske domy něme swědki stawiznow. Ze swojej lětnjej seriju so po serbskich a dwurěčnych­ katolskich­ a ewangelskich wosadach rozhladujemy a předstajamy wam někotre­ fary – dźensa Ralbičansku.

Na Ralbičanskej nawsy, při tamnišim hatku a stołpje Swjateje Trojicy, bě hižo do lěta 1429 cyrkwička stała. W tym lěće bu wona runja tamnišej farje wot husitow zničena. 1515 na samsnym městnje zaso cyrkwička steješe. Sto lět pozdźišo natwarichu prěnju cyrkej z dwěmaj wěžomaj. 1716 staj tachant Měrćin Bjarnat Just a abatisa klóštra Marijineje hwězdy Kordula Sommerec samostatnosć Ralbičanskeje wosady ze zrěčenjom pisomnje připóznałoj. W lěće 1754 pod serbskim biskopom Jakubom Wóskim připadny Róžant klóštrej Marijinej hwězdźe, kotryž pak sobu podpěrowaše, zo dósta Ralbičanska­ wosada pódu za nowy Boži dom a faru na nětčišim městnje kaž tež za ratarske hospodarstwo. Za natwar cyrkwje přewostaji klóšter 1 000 tolerjow. Z fararjom bě tam tehdy hač do lěta 1766 z Čornec pochadźacy Jakub Delenčka. W lětach 1716 do 1752 nastachu hródźe a bróžeń far­skeho kubła.

Šiman: Čaru dlěje njewotstorkować

štwórtk, 16. julija 2015 spisane wot:

Budyšin (SN/MkWj). Zapósłanc CDU w Sakskim krajnym sejmje Marko Šiman zwjazkowe knježerstwo namołwja, dawno planowany wutwar železniskeje čary wot Drježdźan přez Zhorjelc do Wrócławja dlěje njewotstorkować. Tole rjekny Šiman na dźensnišej nowinarskej rozmołwje w Budyšinje. W tym zwisku wón na to skedźbni, zo běchu hižo lěta 2003 wobzamknyli čaru wutwarić, jako němsko-pólske zrěčenje podpisachu. Mjeztym drje je projekt w zwjazkowym dróhowym planje zakótwjeny, bu pak wšelakich přičin dla stajnje zaso wotstorkowany. Moderny zwisk do Pólskeje by Drjež­dźanam runje tak kaž wšej Sakskej tył.

Serbski zapósłanc informowaše nowinarjow tež wo dalšim wuwiću nastupajo trěbny nowotwar železniskeho mosta nad Zeppelinowej w Budyšinje. Tak wot spočatka měsaca twarske dźěła wupisuja, po tym zo běchu minjene tydźenje za­podaća a wobmyslenja potrjechenych firmownikow­ a wobydlerjow wobdźěłali. Twarske dźěła maja so 2016 započeć a drje­ dwě lěće trać.

Stražuja nad łužiskimi lěsami

štwórtk, 16. julija 2015 spisane wot:
Z připowědźenymi znowa stupacymi temperaturami rosće tež kedźbnosć słužbu wu­konjacych w centrali za lěsne wohenje Choćebuskeje wyšeje hajnkownje w Picnju. Sobudźěłaćerjo Braniborskeho krajneho lěsniskeho zawoda Sabine Nitsch­ke, Frank Koschan a Cornelia Moch (wotlěwa) sćěhuja połoženje na wobrazowkach, zo by­chu rozpřestrěću nastawacych lěsnych wohenjow zadźěwali. Picnjanska centrala je jedna z cyłkownje wosom w Braniborskej. Foto: dpa/Patrick Pleul

Krabatowy swjedźeń klětu w Kulowje

štwórtk, 16. julija 2015 spisane wot:

Mjeztym zo so w chorwatskim Žumberakskim regionje na lětuši Krabatowy swjedźeń wot 24. do 26. julija wjesela, započnu hižo nětko w Kulowje klětuši swjedźeń přihotować.

Kulow (AK/SN). Klětuši Krabatowy swjedźeń­ wuhotuje město Kulow. „Předwidźany je termin 12. do 14. awgusta 2016. To je prěni kónc tydźenja w šulskim času po lětnich prózdninach“, podšmórny měšćanosta Markus Posch (CDU) wčera na posedźenju měšćanskeje rady. ­Mi­njeny pjatk bě so prěnja dźěłowa skupina w małym kole na tónle termin dojednała. Přewjesć chcedźa Krabatowy swjedźeń direktnje w měsće. Jemu přisłušace wokolne wsy pak maja so po móž­nosći aktiwnje a kreatiwnje sobu zapřijeć.

Krótkopowěsće (16.07.15)

štwórtk, 16. julija 2015 spisane wot:

Krajnoradny zarjad rozšěrja

Zhorjelc. Zarjadnistwo Zhorjelskeho wokrjesa nakupi dalše ležownosće w hódnoće 1,3 milionow eurow. Za to dósta wčera popołdnju wot wokrjesneho sejmika zelenu swěcu. W jednym z kupjenych twarjenjow ma chorobna kasa Barmer hišće swoje rumnosće. Tam maja so zaměstnić Zhorjelske wonkowne wobłuki twarskeho dohlada a přizjewjernja jězdźidłow.

Wjelk we wowcach pobył

Kodersdorf. W nocy na srjedu je wjelk blisko Kodersdorfa we wowčim stadle škodu načinił. Na wobhrodźenej pastwje blisko awtodróhi A 4 paseše so sydom Kamerunskich­ wowcow. Z tych je wjelk prawdźepodobnje dwě zakusał. Jednu wowcu hišće pytaja. Dotal su lětsa w Sakskej 28 padow zregistrowali, w kotrychž je wjelk škodu na domjacym skoće abo na plahowanej dźiwinje zawinił.

Kónc za kliniku

Policija (15.07.15)

srjeda, 15. julija 2015 spisane wot:

Mužakow. Z njewšědnym padom kón­cowanja wěcow zaběra so policija w Mužakowje. W tamnišim Parku wjercha ­Pücklera su njeznaći žadny štom skóncowali. Jedna so wo něhdźe 20 lět staru ­bahnowu cypresu, kotrejž su wandalojo wulki dźěl skory wottorhali a na městnje ležo wostajili. Tež zdónk poćerpje při tym škody, kotrež so snano hižo wot­stronić njehodźa. Kriminalna policija pad nětko wobdźěłuje. Nastatu škodu trochuje zarjadnistwo parka na něhdźe 15 000 eurow­.

Běła Woda. Hnydom z dweju firmow na Lutherowej­ a na Brězowskej běchu njeznaći w Běłej Wodźe minjene dny trezor­ pokradnyli. W nimaj běchu pjenjezy, dobropisy, wšelake awtowe kluče a listowe znamki. Z hrubej namocu skući­ćeljo trezoraj ze zemje wutorhnychu a sobu wzachu. Jeničce hódnotu rubizny trochuje policija na dohromady wjace hač 20 000 eurow. Zawčerawšim popoł­dnju hajnik policiji zdźěli, zo je w lěsu njedaloko Slepoho wočinjeny prózdny trezor namakał. Tón pochadźa ze zadobywanja do firmy na Lutherowej. Policija namakane slědy wuhó­dnoća a pyta za swědkami.

Nowy nasćěnowy wobraz hotowy

srjeda, 15. julija 2015 spisane wot:
Před něšto dnjemi wottwarichu róšty při saněrowanym bydlenskim domje w Grodku. Tak je nětko tež nowy nasćěnowy wobraz widźeć, kiž zapadne swisle domu pyši. Po předłoze wobrazow z historiskimi napohladami města je Berlinska firma tónle wulki wobraz stworiła, kiž nimojěducym hižo wotdaloka napadnje a kiž je nětko přidatna atrakcija łužiskeho města. Foto: Jost Schmidtchen

Třo zapósłancy z nowym běrowom

srjeda, 15. julija 2015 spisane wot:
Budyšin. Zapósłanc zwjazkoweho sejma Thomas Jurk a zapósłancaj Sakskeho krajneho sejma Harald Baumann-Haske a Thomas Baum (wšitcy SPD) maja wot spočatka tohole tydźenja zhromadny běrow w Budyšinje. Zajimcy nadeńdu jón Před Šulerskimi wrotami 13, hdźež maja tež frakciji SPD a Zelenych wokrjesneho sejmika kaž tohorunja Budyski zwjazk SPD swój běrow.

Serbska debata

nowostki LND