Hućinjansku pěstowarnju ponowja a přetwarja
Malešecy (CS/SN). Z twarskimi dźěłami dyrbja wot meje w Hućinjanskej pěstowarni žiwi być. Čłonojo Malešanskeje gmejnskeje rady su na swojim zašłym posedźenju wobzamknyli, dźěćace dnjowe přebywanišćo ponowić a přetwarić. Za čas twarskich dźěłow pak dźěći dale do njeje chodźa. Z přitwarom nastanje tam potom cyle nowy zachod, runočasnje schodźišćo powjetša. Dołhož budu twarscy dźěłaćerjo při dźěle, budźe pěstowarnja wot zadnjeho boka, potajkim wot hrajkanišća, přistupna. Kaž wjesnjanosta Matthias Seidel (CDU) rjekny, njebudu poćežowanjam cyle zadźěwać móc, na přikład hdyž dyrbja nutřkowne durje přetwarić. To chcedźa dalokož móžno redukować. Na kóncu wšak budźe kwalita zastaranja dźěći z twarskej naprawu lěpša.
Kak dołho maja twarske dźěła trać, wjesnjanosta hišće dokładnje rjec njemóže. Wón liči z něhdźe štyrjomi měsacami. Projekt płaći dohromady 150 000 eurow. Z toho je něhdźe 100 000 eurow ze spěchowanskeho programa Leader.
Dobyćerjo jutrowneje křižowki SN
Pruwuja móžnosće za hort
Rozsudy móhli wjesć k nazhonjenjam, kotrež budu pozdźišo trěbne
Njebjelčicy (JK/SN). Předewzaće Missale je na wčerawšim posedźenju Njebjelčanskeje gmejnskeje rady předstajiło nowy koncept składowanja a překładowanja wotpadkow z kumštnych maćiznow a drjewa na swojim terenje w Miłoćicach. Za zwoprawdźenje noweho systema trjeba zawod stejišćo a přizwolenje gmejny po zwjazkowym zakonju wo škiće před emisijemi. Dokelž je koncept přeswědčiwy a mnóstwo wotpadkow na teritoriju firmy so njepowjetši, móžachu radźićeljo bjez wobmyslenjow planam zawoda přihłosować. Tež ličba transportow do a ze zawoda so njepowjetši, zdźěli jednaćel Justus Große. Za september připowědźi wón dźeń wotewrjenych duri.
Šulersku wuměnu swěrnje haja
Wjelelětna šulerska wuměna mjez Ralbičanskej wyšej šulu a šulerjemi z čěskeho Mělníka je nětko wo dalši kapitl bohatša. Póndźelu přijědźechu šulerjo z Mělníka do Budyšina. Jich přewodźeše mjez druhim Antonín Vlk, kiž je hižo wot spočatka wuměny pódla. Zhromadnje wobhladachu sej Budyšin a wopytachu Małowjelkowski prazwěrjenc. Wječor witachu Ralbičanscy šulerjo čěskich hosći z pisanym programom do Delan. Při wječeri so šulerjo mjez sobu bliže zeznachu. Zwiski pak běchu hižo do toho z listami nawjazali. Zhromadnu wječer zmóžnichu starši šulerjow 5. lětnika.
Nazajtra wulećachu sej hosćo na kulturnu kupu Einsiedel pola Zhorjelca, hdźež sej mjez druhim z podpěru pilnych pomocnikow kołbaski pražachu. Srjedu pobychu we Łazkowskim lěsu, a tam přewjedźechu wšelake domiznowědne akcije. Serbscy šulerjo pokazachu swojim přećelam Ralbicy a wopytachu z nimi Marijinu studničku w Róžeńće.
Wot srjedź měrca móžeš so w krosnowanskim parku při Budyskim ...
W přihotach na festiwal Rogeński park & hród wot 26. do 28. meje su ...
Dnjej wotewrjeneho zahrodnistwa witatej
Nimale 100 zahrodnistwow wobdźěli so 29. a 30. apryla na akciji „Kćějaca Sakska“ z inspiracijemi a nowosćemi za wosadźenje zahrodkowych hrjadkow a balkonow. Je to jedne z najwuznamnišich zarjadowanjow za přetrjebarjow zahrodniskeje branše w Swobodnym staće Sakskej. Z tejle akciju započnje so čas sadźenja. We wobłuku zahajenja sezony tradicionelnje mnohe sakske zahrodnistwa a štomownje swoje durje šěroko wočinja. Nimo najwšelakorišich rostlinskich poskitkow maja zahrodnistwa tež pisany wobłukowy program za młódšich a staršich wopytowarjow přihotowany. Lubowarjo zahrodkowych a balkonowych rostlin su přeprošeni za kulisy rostlinskich zawodow pohladnyć, móža sej tam zahrodniske nowosće wotkryć a so wězo wot fachowcow poradźować dać.
Dobre wuměnjenja za dorost
W Njebjelčanskej gmejnje nowonarodźenych lěta 2016 witali
Njebjelčicy (JK/SN). Rekordnu ličbu 19 porodow registrowachu loni w gmejnje Njebjelčicy. Wjesnjanosta Tomaš Čornak (CDU) hódnoći přiběracu ličbu porodow jako wuraz toho, zo so młode swójby w gmejnje derje čuja a zo tu swój přichod widźa. Mějachu-li před dwaceći lětami jeničce tři porody, pokazuje lońša ličba, zo maja młode swójby z dźěćimi tu dobre a wěste wuměnjenja do přichoda. Z dobrej a jenož hišće w Njebjelčanskej gmejnje praktikowanej tradiciju je, zo wita wjesnjanosta nowonarodźene minjeneho lěta, zo by je přijał jako přichodnych wobydlerjow.
Přijeće přichodnych wjesnjanow wotměwaše so dotal stajnje na Njebjelčanskim gmejnskim zarjedźe. Lětsa pak witaše Tomaš Čornak młode maćerje a jich dorost wčera w tamnišej pěstowarni „Jan Skala – Barbojte kamuški“. Tak chcyše maćerjam pokazać, hdźe móhli jich dźěći w přichodźe derje zastarane być.
Pokazuja wjesne napohlady a křiže
Policija (27.04.17)
Trójce so błysknyć dał
Lěskej. Při kontroli spěšnosće zawčerawšim na zwjazkowej dróze B 156 w Lěskej je su wodźerja Audija hnydom trójce błysknyli. Při dowolenych 50 km/h lepichu jeho najprjedy ze 66, pozdźišo ze 86 a hišće raz z 72 km/h. Jako jeho zadźeržachu, 29lětny rjekny, zo ma nuzne.
