Štó chcył hrajki darić?
Pančicy-Kukow. Na adwentnych wikach w klóšterskej bróžni w Pančicach-Kukowje 2. a 3. decembra chcedźa trjebane hrajki za dobry zaměr předawać. Štóž chce k tomu přinošować, móže hrajki wšědnje w dźěłarni za zbrašenych swj. Michała wotedać. Wunošk přepodadźa babje Christinje Pólkec, kotraž chce je klětu za šulu w afriskim Malawiju wužiwać. Po swojim dobrowólnym socialnym lěće 2012/13 w Malawiju chce Christina Pólkec klětu znowa w jednej z tamnišich chorownjow wupomhać. Kóždažkuli podpěra je tuž witana.
Poprjancy we wustajeńcy
Łaz. Lětuša hodowna wustajeńca we Łazowskim Domje Zejlerja a Smolerja wěnuje so Połčničanskim poprjancam. Wustajeńcu wotewru njedźelu, 27. nowembra, w 14.30 hodź., Zajimcy su wutrobnje witani. Přehladka znazornja stawizny poprjancow a demonstruje, kak so wone zhotowjeja. Nimo toho pokazaja wšelake nastroje, kotrež su za tele dźěło trěbne.
Předstaji knihu bratra
Lisćiki za koncert dobyć
Policija (25.11.16)
Wjelk wopor njezboža
Krynhelecy. Wo mortwym wjelku na statnej dróze S 131 mjez Krynhelecami a Rychwałdom su wčera rano policiju informowali. Wobsadka policajskeho awta so na městnje wo tym přeswědči, nihdźe pak njebě awto, kotrež bě do wjelka zajěło. Hakle pozdźišo přijědźe wodźer VWja, kiž bě po zražce z rubježnym zwěrjećom najprjedy dale jěł. Dokelž wone na puću ležeše, móžeše so jemu wodźer motorskeho runje hišće tak wuwinyć. Mortweho wjelka přepodachu sobudźěłaćerjam krajnoradneho zarjada. Wodźer VWja změje so nětko wotsalenja z městna njezboža dla zamołwić.
Drježdźanska zawrjena
W šulskej kuchni dale warja
Gmejnska rada Ralbicy-Róžant móže nětko zaso zaměrnje dźěłać
Róžant (JK/SN). W Ralbičanskej šulskej kuchni budu wot 2. januara dale čerstwy wobjed warić. Tole bě na wčerawšim posedźenju radźićelow gmejny RalbicyRóžant jedne z wjacorych wobzamknjenjow, kotrež měješe Michał Šołta jako nowowuzwoleny druhi zastupowacy wjesnjanosta sobu zamołwić. Rozsudźiła bě so za njeho wjetšina radźićelow w tajnych wólbach, kotrež je předsyda zarjadniskeho zwjazka Při Klóšterskej wodźe Měrko Domaška přewjedł. Dalši kandidat bě wot CDU namjetowany Eduard Luhmann, kiž wčerawše posedźenje jako najstarši čłon gmejnskeje rady zahaji, dokelž bě prěni zastupowacy wjesnjanosta Tomaš Bjeńš schorjeł.
Štó ma w Ralbičanskej kuchni klětu warić, wo tym budźe přichodne dny rozsudźene. Spočatk tydźenja chcetaj so techniski wuběrk a zastupjer zarjadniskeho zwjazka ze štyrjomi zajimcami rozmołwjeć, kotřiž su so na wupisanje přizjewili. Přichodnu srjedu so techniski wuběrk za jednoho zajimca rozsudźi.
Ze spěwom a wikami do adwenta
Konjecy (SN/MWj). Dypkownje k zazběhej adwenta wotměja so na wjacorych městnach adwentne popołdnja a hodowne wiki. Tak přeprošuja jutře, sobotu, wot 15 hodź. wjesnjanow ze Šunowa a Konjec na adwentne popołdnjo na dworje towarstwoweho domu „Delany“ w Konjecach. Tam chcedźa zhromadnje swačić, k čemuž zaspěwa muski chór Delany. Něhdźe w 16 hodź. witaja swjatu Borboru a swjateho Mikławša a na dworje kaž tež w katakombach budźe bjesada při horcym winje a kołbaskach.
Hižo w 10 hodź. započnu so jutře hodowne wiki w Njeswačidle. W rumnosćach zwjazka seniorow móža dźěći poprjančki pjec. W 14 hodź. předstaja zakładni šulerjo musical wo štyrjoch swěčkach. W 15 hodź. chce wjesnjanosta wulki wosušk nakrać, potom wulosuja hodownu tombolu.
Tohorunja jutře změja wot 14 hodź. hodowne wiki při wobydlerskim domje w Brětni-Michałkach. Na wopytowarjow čakaja Wojerowske dźěćatko, adwentne zwuki z akordeonowym orchestrom, hra wo Bremenskich muzikantach a hodowny koncert kapały Kummel-Brass.
Puć po spisowaćelu pomjenowany
Na swojim poslednim posedźenju lěta je Worklečanska gmejnska rada wčera jednohłósnje rozsudźiła, puć mjez Worklecami a Hornim Hajnkom pomjenować jako Šćežku Jurja Brězana.
Worklecy (aha/SN). Kaž wjesnjanosta Franc Brusk (CDU) wčera rozłoži, běchu so do toho dokładnje zaběrali, kak móhli Jurja Brězana w jeho ródnej wsy trajnje z pomjenowanjom dróhi česćić. Tak rozjimachu wjacore móžnosće, a jako najlěpša ideja so wopokaza, wot spisowaćela rady wužiwany pućik wot jeho bydlenja w Hornim Hajnku do ródneje wsy po nim pomjenować. Rozsud tež přeswědčiwje wopodstatnichu, wšako kryje so pomjenowany wotrězk z Krabatowym pućom. Na te wašnje tohorunja tych na Jurja Brězana skedźbnjeja, kotřiž snano z kolesom po Krabatowym puću jědu.
Je wotpohladane, zo budu perspektiwnje na wjacorych městnach podłu puća wo wuznamnym spisowaćelu na wotpowědnje wuhotowanych tafličkach informować. Po jich zhotowjenju w serbskej a němskej rěči je předwidźane, wotkryće zwjazać z dostojnej zjawnej swjatočnosću.
Krótkopowěsće (25.11.16)
Impulsy za region
Choćebuz. Na 7. regionalnym forumje Łužiskeho energijoweho regiona zaběrachu so wčera z wužadanjemi strukturneje změny a z njej zwisowaceje digitalizacije. Runje změny energijoweho hospodarstwa region sylnje trjechja. Tak su zajimcy foruma wčera w Choćebuskim hotelu „Radisson blu“ wo impulsach za přichodne wuwiće rozmyslowali.
Mjeńšinowy běrow wopytał
Berlin. Prezident Schleswigsko-holsteinskeho krajneho sejma Klaus Schlie je běrow štyrjoch awtochtonych narodnych mjeńšin w Berlinje wopytał. Nawoda prezidialneho běrowa Kristian Rieser jeho přewodźeše. Pola nawodnicy mjeńšinoweho běrowa Judith Wałdźic staj so wonaj wo aktualnych nadawkach mjeńšinoweje politiki wobhoniłoj.
Na dwěmaj přehladkomaj pódla
Krótkopowěsće (24.11.16)
Domowina gratulowała
Budyšin. Domowina – Zwjazk Łužiskich Serbow – je Susann Šenkec k wuzwolenju za předsydku rady Załožby za serbski lud gratulowała. „Susann Šenkec je hižo mnohe lěta wuska přewodźerka w prócowanjach k zdźerženju a spěchowanju serbskeje rěče. Sym přeswědčeny, zo wona wočakowanjam Serbow wotpowěduje“, piše předsyda Dawid Statnik.
Fararka nastupi zastojnstwo
Drježdźany. W stawiznach Drježdźanskeje cyrkwje Našeje knjenje zahaji so přichodnu njedźelu nowa doba: Prěni króć změje Boži dom z fararku Angeliku Behnke žonu na čole wosady. Wona budźe zastojnstwo zhromadnje z fararjom Sebastianom Feydtom wukonjeć. 43lětnu Behnke běchu w juniju z wjace hač dźesać požadarjow wuzwolili.
Dobyćer z Budyskeho wokrjesa
