Njeswačanscy gmejnscy radźićeljo mějachu na swojim wutornym posedźenju tójšto wobzamknjenjow na blidźe, z kotrychž so wjetšina z twarskimi naležnosćemi zaběraše.

Njeswačidło (JK/SN). Na swojim poslednim posedźenju do lětnjeje přestawki mějachu Njeswačanscy radźićeljo zawčerawšim wobšěrny dnjowy porjad zmištrować. Wulki dźěl posedźenja zabra předstajenje naćiska k lětušemu hospodarskemu planej. Tuchwilu wšak hišće wšitke financy ze stron Sakskeje a Zwjazka dóšli njejsu, ale zo je dóstanu, je wěste, wjesnjanosta Gerd Schuster (CDU) podšmórny. Najebać to je wažne, zo w napjatym času wuwaženy plan nastaja, štož z widom na trěbne naprawy w gmejnje runje jednore njeje. Wot 19. julija naćisk plana w Njeswačanskej radnicy wupołoža. Na posedźenju w awgusće chcedźa jón wobzamknyć.

Na swjedźenju Božeho ćěła wjele družkow w procesionach kročiło

Chrósćicy (SN/MWj). Wysoki swjedźeń Božeho ćěła je za katolskich křesćanow nimo jutrow, swjatkow a hód sobu najwažniši cyrkwinski podawk lěta. Na tymle dnju woni wuznawaja, zo wěrja do Jězusa Chrystusa jako přitomneho w přežohnowanym woblatku. Dokelž je to jedyn ze stołpow křesćanskeje wěry, tole katolscy wěriwi we wulkich a dostojnych procesionach zjawnje wuznawaja. Tak kročachu dźensa po dopołdnišich kemšach syły ludźi w přewažnje ćmowej drasće k wonkownym wołtarkam. Tych maja na přikład na dworje klóštra Marijineje hwězdy hnydom štyri, w Chrósćicach je wón při wjesnej kapałce natwarjeny. Wosadni dujerjo kěrluše wěriwych na mnohich městnach přewodźachu.

We wšěch procesionach je dźensa znowa wulka ličba družkow sobu kročiła. Holcy w swojej wosebitej drasće spožčeja tomule dnjej přidatny swjedźenski raz. Za to dyrbjachu wone zdźěla hižo wo­srjedź nocy stawać, zo bychu hotowarniče wšitke sčasom zdrasćili. Nimo družkow je so wjele dalšich holcow a žonow katolsku swjedźensku drastu woblekło.

Zo zamóže so młodostny serbsce pisomnje derje zwuraznić, njeje dźensniši dźeń hižo tak samozrozumliwe. Chrystofer Wjenka to zamóže a dopokazuje to jako praktikant w redakciji Serbskich Nowin. W Konjecach bydlacy 16lětny chodźi na Budyski Serbski gymnazij a zmištruje runje tak kaž jeho sobuwuknjacy tuchwilu šulerski praktikum. „Za Serbske Nowiny sym so rozsudźił, dokelž rady pisam a so runočasnje za politiku zajimuju“, Chrystofer powěda. A tak wón tele dny wšědnje z dobrym serbskim prawopisom němskorěčne manuskripty do maćeršćiny přełožuje a wězo tež swójske artikle pisa, kaž we wudaću SN zawčerawšim tón wo putnikowanju dekanatneje młodźiny do Róžanta. Zo by swoje serbskorěčne znajomosće dale polěpšił, chce so Chrystofer wot přichodneho šulskeho lěta na Serbskim gymnaziju na wukonowym kursu serbšćiny wobdźělić.

Hižo dźesać lět Konječan na klawěrje hraje, na kotrymž so dźensa sam dale wukmanja. Nimo toho wón rady foto­grafuje, najradšo přirodne motiwy a portrety. A skónčnje angažuje so w dekanatnym kružku młodźiny.

Zaměrowy zwjazk Łužiska jězorina Sakskeje dźěła zaměrnje na systemje za wodźenje motorizowaneho wobchada po pućach. Na informaciskich taflach měli so z pomocu QR-koda informacije w třoch rěčach jewić, tež w serbskej. To je přidatna naprawa a zdobom wuznaće k serbskemu sydlenskemu rumej.

Hamor (AK/SN). „Dotalne naprawy turistiskeho systema wodźenja po pućach chcemy rozšěrić a wudospołnić“, podšmórny zastupowacy předsyda Dietmar Koark (CDU) wčera na posedźenju zaměroweho zwjazka w Hamoru. Na 34 stejnišćach budźe 90 informaciskich taflow instalowanych, z čimž je potom cyłkowny sakski dźěl łužiskeje jězoriny wuhotowany. Něhdźe 60 000 eurow naprawa płaći a wopřijima přełožk tekstow do serbšćiny, čěsćiny a jendźelšćiny, a zdobom wuhotowanje z wobrazami. Kaž jězorinowy zaměrowy zwjazk jednohłósnje wobkrući, chce za to swójski podźěl 15 000 eurow zwjesć.