Dirk Albers (zady naprawo), nawoda předsydstwa Budyskeje wokrjesneje ...
Krótkopowěsće (22.02.17)
Schulz w Delnjej Łužicy był
Lubin. Kanclerski kandidat SPD Martin Schulz je dźensa Braniborsku a w tym zwisku tež Delnju Łužicy wopytał. Mjez druhim poby w Lubinje, hdźež jemu „Syć za strowe dźěći“ předstajichu. Tam so čestnohamtscy wo młode swójby staraja. Braniborski ministerski prezident Dietmar Woidke (SPD) Schulza přewodźeše.
Za Dźeń Saksow so přizjewić
Lubij. Towarstwa, zwjazki, institucije a dalše móža so hišće hač do srjedy, 1. měrca, za lětuši Dźeń Saksow w Lubiju přizjewić. Po mjenowanym terminje próstwy wo spěchowanske srědki hižo njewobkedźbuja, kaž statna kenclija w Drježdźanach zdźěli. Swobodny stat spěchuje wobdźělenje z přiražkami za jězbne wudawki, zastaranje a přenocowanje.
Nowe zawrjene pasma
Budyšin. Po tym zo běchu tydźenja při Olbaskim jězorje a w Rakecach dalšej padaj ptačeje gripy zwěsćili, je Budyski krajnoradny zarjad za wobě kónčinje škitne naprawy wukazał. Tak njesmědźa psy a kóčki hižo bjez dohlada wonka być. Plahowarjo pjerizny a wikowarjo mjasa maja přidatne naprawy wobkedźbować. Ludźo maja so w interneće wobhonić.
Bubony a spěwy po cyłym domje słyšeć byli
Smochćicy (aha/SN). „Hudźba je dar Boži a zwjesela čłowjeka.“ Takle wopisowaše Martin Luther wuznam hudźby za wěru a dušu. Po tychle słowach so mějo wuhotowachu w Smochčanskim Domje biskopa Bena lětuše dny dźědow a wowkow zhromadnje z wnučkami mjeztym 22. raz, a to pod hesłom „Hudźba zwjesela“.
Gratownju wutwarja
Radwor (SN/MkWj). Radźićeljo gmejny Radwor su wčera na swojim posedźenju dalšu kročel k zwoprawdźenju naročneho projekta zmištrowali: W zwisku z planowanym powjetšenjom Chelnjanskeje gratownje dobrowólneje wohnjoweje wobory přerjadowachu woni financy. Gratownja je dźěl inwesticiskeho projekta, kotryž běchu loni w zwisku z nowym fondsom sakskeho knježerstwa „Mosty do přichoda“ naćisnyli. Nimo rozšěrjenja gratownje chcedźa sej w Radworju ze srědkow knježerstwa nowe jězdźidło za gmejnski twarski zawod kupić a sej za jeho techniku nowu halu natwarić. Nowa gratownja w Chelnje ma cyłkownje 134 000 eurow płaćić.
Ze spokojenjom móžeše Pětr Kliman, kiž na wčerawšim posedźenju Radworskeho wjesnjanostu Wincenca Baberšku (CDU) zastupowaše, připowědźić, zo je twar wodowoda za Łupjansku gratownju wohnjoweje wobory nětko zawěsćeny. Wjele lět běchu wo wodowód wojowali. Projekt bě pak stajnje zaso na wysokich twarskich kóštach zwrěšćił.
Bal maskow sta norow přiwabił
Kulow (UH/SN). Jónu wob lěto swjeća w Kulowje bal maskow. A tak je tež 311. sesija legendarnych póstnic minjenu sobotu zaso sta kostimowanych norow z Kulowa, Wojerec a Łaza kaž tež tamnišich wjesnych dźělow přiwabiła. Hač do ranja w třoch hejsowachu wone po wosebje wupytanej hudźbje DJja Mathiasa Popjele a po moderaciji Sandra Modšinka w Kulowskej wjacezaměrowej hali.
Wšitkich, kotřiž maskeradu jara chutnje bjerjechu, njejsy w jich kostimach a wotpowědnych maskach spóznał. Kaž přeco, běchu karnewalisća za to wjele prócy a swobodneho časa nałožili. Wosebje skupinki ze samsnym outfitom su w publikumje, póstniskim towarstwje a mjez jurorami dypki hromadźili. Někotři z nich, kaž Němčanske Halštrowske soniny, zwažichu so samo wosrjedź žurle na parket, zo bychu k wotpowědnej hudźbje a nastudowanej choreografiji rejwali. Tež Torsten a Gabi (Kulowski princowski por lěta 2013), kotrajž běštaj so před štyrnaće lětami na maskowym balu zeznałoj, so jako fanaj maskerady wuznaštaj. Něhdźe w 22.30 hodź. přewjedźechu wulke demaskěrowanje a zadźiwanje bě wulke.
Policija (22.02.17)
Njezboži ze štyrjomi zranjenymi
Budyšin. W Budyskej Strowotnej studni su wčera popołdnju blisko kupnicy Kaufland tři awta do so zrazyli; při čimž so dwě wosobje zraništej. Policija přičinu njezboža hišće přepytuje. Na wotbóčce mjez statnymaj dróhomaj S 106 a S 100 pola Błohašec stej wčera popołdnju z dotal njeznateje přičiny awće do so prasnyłoj. Tež tam so dwě wosobje zraništej.
Do awta so zadobył
Njedźichow. W nocy na wutoru lepi wobydler w Njedźichowje muža, kiž bě so do Renaulta zadobył, kotryž steješe na Jahnowej hasy. Z njeho chcyše z Pólskeje pochadźacy paduch industrijowy prochsrěbak spakosćić.
„Influenca wjeršk docpěła“
Dr. Alfons Nawka: Tež wokoło karnewala sej radšo časćišo ruce myć
Budyšin/Chrósćicy (SN/mwe). W Budyskim wokrjesu zličichu hač do zawčerawšeje póndźele 1 294 padow schorjenja na influencu. W druhim kalendrowym tydźenju lěta 2017 bě jich 97, w pjatym hižo 505 schorjenych. Lěkarske praksy su tuž tohorunja w serbskich a dwurěčnych kónčinach přepjelnjene. Kaž nowinski rěčnik Budyskeho krajnoradneho zarjada Gernot Schweitzer na naprašowanje Serbskich Nowin zdźěli, „njetrjebachu pak na teritoriju žane zarjadnistwa zawrěć. Runje tak njebuchu žane smjertne pady přizjewjene.“
Angažement lěpje koordinować
Wojerecy chcedźa angažement za ćěkancow a pomoc pytacych přichodnje lěpje koordinować a zwjazać. Tomu słuži wot minjeneje póndźele wosebita a jednotna internetna strona.
Wojerecy (AK/SN). „Chcemy eksistowacy čestnohamtski potencial mjez sobu bóle zwjazać. Chcemy pomhacych a pomoc pytacych hromadu wjesć“, wuswětla Kai Petschick, społnomócnjeny za azyl a integraciju města Wojerec. „Internetna strona http://hoyerswerda.helpto.de ma přinošk k integraciji być a ma so z centralnej městnosću stać. Porno wobydlerskemu běrowej je wona 24 hodźin docpějomna. Přez nju móže pomocliwosć čłowjeka k čłowjekej nastać.“
Radworske seniorki zetkawaja so w zymje jónu wob měsac w Kupkec ...
Chcedźa při jězoru hotel twarić
Na Hamorskim přibrjohu Bjerwałdskeho jězora ma dołhodobnje hotel nastać. Tomu přihłosowała je Hamorska gmejnska rada na swojej njedawnej zjawnej zhromadźiznje.
Hamor (AK/SN). Na posedźenju wobzamknychu radźićeljo druhu změnu wobtwarjenskeho plana. Třo hłosowachu z „ně“, jedyn so hłosa wzda. Nadawkidawar za hotel je Hamorska gmejna. Nošer předewzaća je firma Hotel a dožiwjenski park Hornja Łužica. Wona lětsa tež zakuskowe zastaranje na Hamorskim přibrjohu přewozmje.
