Móža zahrodu znowa wuhotować
Krótkopowěsće (06.07.17)
Lipšćanske myto spožčene
Lipsk. Lětuše Lipšćanske myto za swobodu a přichod medijow dóstanjetaj Deniz Yücel a Aslı Erdoğan. Tole zdźěla medijowa załožba Lutowarnje dźensa w Lipsku. Myto je 30 000 eurow hódne. Němsko-turkowski žurnalist Deniz Yücel sedźi „teroroweje propagandy“ dla w turkowskim jastwje. Awtorku a publicistku Aslı Erdoğan tam „našćuwanja ludu“ dla tohorunja přesćěhuja.
Wapnuja lěsy
Žitawa. Wot dźensnišeho na sakske lěsy wapno sypaja, zo bychu w nich přiběracemu kisnjenju pódy wobarali. Kaž wobswětowe ministerstwo zdźěla, maja helikoptery cyłkownje 20 000 tonow wapna na 6 600 hektarow lěsa rozdźělić. Tajke naprawy přewjeduja mjeztym wot 1980tych lět. Potrjechene su nimo Rudnych horin a Vogtlanda mjez druhim tež Žitawske horiny.
Zemski wolij a płun namakali
Policija (06.07.17)
Jedne awto pokradnyli, dwě nic
Budyšin. W nocy na wutoru běchu paduši awtow w Budyskej Strowotnej studni po puću. Z Nageloweje zhubi so slěbrobarbny VW Golf Plus z hamtskim čisłom BZ-MC 277. Hódnotu pjeć lět stareho jězdźidła trochuje jeho wobsedźer na 10 000 eurow. Na Gagarinowej běchu so njeznaći podarmo prócowali VW Golf GTI kaž tež VW Tiguan pokradnyć. Do Golfa drje so woni zadobychu, motor zaswěćić pak so jim njeporadźi. Při tamnym jězdźidle zwrěšćichu skućićeljo hižo na durjach. Přiwšěm nasta na woběmaj wosobowymaj awtomaj cyłkowna wěcna škoda něhdźe 2 000 eurow.
Dźěći z gmejny Srbsko Łužicu wopytali
W Bóščanskej gmejnje mějachmy minjene dny luby wopyt z čěskeje partnerskeje gmejny Srbsko, 35 kilometrow sewjerozapadnje Prahi. Njedźelu we wobłuku folklorneho festiwala běchu naši přećeljo do Chrósćic dojěli. Zhromadnje z nimi wobhladachmy sej swjedźenski ćah a galaprogram kulturnych skupin. Wječor dorosćeni domoj wotjědźechu, dźěći pak wostachu hišće něšto dnjow w swójbach we Łusču, Dobrošicach a Jaseńcy.
Twarja po planje
Dźěła na kapałce a zakładnej šuli derje postupuja
Kulow (AK/SN). Spalowska pohrjebnišćowa kapałka je nimale dosaněrowana. Tole podšmórny nawoda twarskeho wotrjada Kulowskeho měšćanskeho zarjadnistwa Stephen Rachel na wčerawšim posedźenju měšćanskeje rady. „Mulerjo dyrbjachu někotre dodatne dźěła wukonjeć. Wobmjetk tuchwilu schnyje“, wón rozłoži. „Róšty wokoło twarjenja nětko zaso wotstronimy. Kapałka ma nowe wokna, zachodne durje zaso zapowěsnu.“ Po móžnosći w septembru ma cyła naprawa dočinjena być.
Derje postupuje přetwar Kulowskeje Krabatoweje zakładneje šule. „Třěcha je nimale dosaněrowana“, praji Stephen Rachel. Za 111 000 eurow dósta nadawk domjaca třěchikryjerska firma Schlegel & Koplanski. Tak mjenowane hłowne twarske dźěła při ponowjenju třěchi přewza Łazowska firma Stramke. Tónle nadawk ma wobjim 22 000 eurow. Nimo toho w šuli tepjenski a rozdźělowanski system dospołnje ponowja. Tole wobstara za 140 000 eurow Žitawska instalaciska firma. Wona je hižo za zarjadnišća Swobodneho stata Sakskeje dźěłała a ma dobre referency, Rachel podšmórny.
Na deskowany wóz wosebje hordaj
W swojej lětušej dowolowej seriji předstajamy wosoby, kotrež na někajkežkuli wašnje stawizny zachowuja, zo starožitnosće zběraja a je zdźěla zjawnosći spřistupnjeja.
We Łomsku pola Njeswačidła napadnje rjenje hladany štyristronski Panachec statok. 1929 bě so tam Měrćin Panach narodźił. Doma zeznajomi so na 28 hektarow wulkim kuble hižo jako dźěćo z ćežkim ratarskim dźěłom. Tehdy Łomšćenjo tež hišće přewažnje serbowachu. W Njeswačanskej šuli to dowolene njebě. 62lětny syn Manfred je wot njeho lubosć k ratarjenju zdźědźił, byrnjež spočatnje powołanje blidarja nawuknył. Runja nanej wobhladuje wón jako winowatosć, pozdźišim generacijam zachować, kak běchu ratarjo něhdy pola wobdźěłali a skót zastarali, ale tež, kotre nałožki běchu pěstowali.
Njeličomnym nadróžnym twarnišćam w Hornjej Łužicy so nětko ...
Ze wsy 18 wučerjow wušło
Literarno-hudźbny wječor jedyn z wjerškow jubileja Noweje Wjeski był
Nowa Wjeska (BW/SN). Jedyn z wjerškow k 400. róčnicy prěnjeho naspomnjenja Noweje Wjeski bě minjeny pjatk literarno-hudźbny wječor pola Dyrlichec. Něhdźe sto wjesnjanow a zajimcow je na njón přišło, kaž hłownaj organizatoraj Jurij Šołta a Mikławš Dyrlich zdźělataj.
Policija (05.07.17)
Smjertny wopor njezboža
Porchow. Při ćežkim wobchadnym njezbožu wčera něhdźe w 13.30 hodź. na awtodróze A 4 mjez wotbóčkomaj Porchow a Horni Wujězd je 28lětny wodźer awta žiwjenje přisadźił. Ze swojim Seatom bě wón na lěwej jězdni do směra na Zhorjelc po puću, jako 53lětny šofer nakładneho awta z praweje jězdnje na lěwu změni a wotboka do Seata załoži. Zražka bě tak mócna, zo so prědni dźěl awta dospołnje skóncowa, samo motor bu wutorhnjeny. Młodemu mužej njemóžachu hižo pomhać, nuzowy lěkar móžeše jenož hišće jeho smjerć zwěsćić. Rumowanja a wobdźěłanja njezboža dla bě awtodróha do směra na Zhorjelc wjacore hodźiny zawrjena. Sčasami bě rynk čakacych jězdźidłow hač do pjeć kilometrow dołhi. W tym zwisku policija chwali, zo běchu šoferojo tak mjenowanu wuchowansku hasku přikładnje wutworili, zo móžachu wuchowarjo spěšnje k městnu njezboža dojěć.
