Jednora technika fascinuje

wutora, 15. awgusta 2017
artikl hódnoćić
(0 )
Nimo dalšich serbskich lubowarjow traktorow su so minjeny kónc tydźenja na wulkim zetkanju w Koblicach wobdźělili Marko Wawrij, Handrij Pěčka a Manuel Šiman ze Smječkec (wotlěwa).  Foto: Bianka Wjeńcyna Nimo dalšich serbskich lubowarjow traktorow su so minjeny kónc tydźenja na wulkim zetkanju w Koblicach wobdźělili Marko Wawrij, Handrij Pěčka a Manuel Šiman ze Smječkec (wotlěwa). Foto: Bianka Wjeńcyna

Serbscy fanojo traktorow na najwjetšim zetkanju wuchodneje Sakskeje

Koblicy (BW/SN). Z cyłeje wuchodneje Sakskeje a ze zdalenišich kónčin po­dachu so minjeny kónc tydźenja mějićeljo a lubowarjo starych traktorow do Koblic při Hórnikečanskim jězoru. 14. raz bě tamniše towarstwo traktorowych přećelow tele zetkanje organizowało, a po wšěm zdaću bywa wone z kóždym lětom wjetše. Wjace hač 200 staršich a nowšich, mjeńšich a wjetšich mašinow su tam pokazali.­ Wopytowarjo móžachu při wšelakich wubědźowanjach přihladować, techniku cyle bliska wobdźiwać, po wikach narunanskich dźělow dundać a wjele dalšich poskitkow wužiwać. Tež tójšto serbskich zajimcow z Radworja, Haslowa, Smjerdźaceje a wot druhdźe je sej tam dojěło.

Ale tež mjez mějićelemi starych traktorow běchu Serbja zastupjeni. Tak je Smječkečan Maćij Šiman ze swojej Eicher z lěta 1960 přijěł a wobdźěli so z njej na wubědźowanju w ćahanju ćežkich wahow. Loni bě wón při tym samo třeće městno wobsadźił. Tohorunja ze Smječkec bě Handrij Pěčka zastupjeny, a to z traktorom marki Eicher z lěta 1962 z 22 PSsow sylnym motorom. Jeho wjesnjan Marko Wawrij porno tomu bě z nowšim Lamborginijom z lěta 2011 přijěł. Wšitkich jednoći, zo nimaja swoje traktory jenož k wobhladanju, ale zo je doma při dźěle na swójskej ležownosći zasadźeja, rjekny přichodny nan Maćija Šimana Achim Čornak z Kanec. Wón bě z traktoro typa MTS 52, tak mjenowanym „Russu“ połdra hodźiny ze Smječkec do Koblic po puću. Podobny puć měješe Franc Piller z Pančic-Kukowa ze swojim traktorom typa Deutz D25 z lěta 1963.

Cyle tak daloko njeměješe Marko Hajdan z Wojerec. Rodźeny Radworčan bě sej loni Porsche-junior z lěta 1960 kupił a wobdźěli so lětsa prěni raz jako „traktorist“. Jeho fascinuje jednora a jara robustna technika tychle mašinow. „Ta wuńdźe cyle bjez elektroniki a móžeš nimale­ wšitko sam porjedźeć. Za to žadyn kompjuter njetrjebaš kaž pola nowych awtow.“

wozjewjene w: Lokalka

Galerija

dalši wobraz (1) Ze swojim Porsche-juniorom z lěta 1960 je so Marko Hajdan z Wojerec prěni raz na zetkanju traktorow w Koblicach wobdźělił.
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND