Budyski Kamjentny dom přeproša kóždu srjedu w awgusće na lětnje ...
Serbske sroki w němskej receptowej knize
Budyšin (SN/BŠe). W Budyskej pěstowarni „Kraj pjerachow“ Dźěłaćerskeho dobroćelstwa maja wot awgusta 2001 Witaj-skupinu. A koncept sej starši, kotřiž bydla w měšćanskej štwórći Strowotna studnja, jara waža. „Tuchwilu mam 17 dźěći w skupinje, a dalše přizjewjenja předleža“, praji kubłarka Stefanie Šramina. Lětsa rozžohnuje wona štyri dźěći do šule, kotrež stanu so přichodnu póndźelu z chowancami Serbskeho šulskeho a zetkawanskeho centruma Budyšin. „Při přizjewjenju dźěsća za Witaj-skupinu dźiwamy na to, zo starši serbšćinu tež po pěstowarskim času dale spěchuja“, kubłarka wuzběhnje.
Rozsudźa-li so starši za model Witaj, zeznawaja so jich dźěći nimo rěče tež z kulturu a tradicijemi Serbow. Kóžde lěto wuhotuje skupina na přikład mejemjetanje a spěwa samozrozumliwje serbske pěsnički. „Štyri dźěći skupiny su ruskeho pochada, tamne su němske bjez serbskich korjenjow“, Radworčanka rozłožuje. Zajim někotrych staršich za serbstwo ju stajnje zaso překwapja.
Westernske jěchanje wuskutkuje měr a wěstosć (6)
Woměrje, stajnje woměrje rěka kredo, podaš-li so na Helmec burski statok Dubjany dwór (Eichhof) w Jitku. Tónle měr nimaja jenož konje w kreji, cyła wokolina wuprudźa wodychnjenje. „To je bjez dźiwa, wšako lubuja na westernske jěchanje specializowane konje měr. Njejsu to zwěrjata, kotrež so wotsamo wjele hibaja“, měni Kornelia Helm. Na tamnym boku brunače dokładnje wědźa, hdy su jich kwality trěbne, na přikład, hdyž maja howjada hromadu wjesć. Runje dźensa chce tole konjaca hospodarska mišterka a trenarka B ze swojimi konjemi trenować. Před rohami maćernych kruwow dźě maja wone wulki respekt. Z treningom so konje, howjada a čłowjek na so zwuča. „Westernske jěchanje njeje w našich kónčinach jara rozšěrjene. Tu faworizuja ludźo skerje klasiske jěchanje“, praji 41lětna mějićelka Dubjaneho dwora. Mjeztym pak su sej mnozy wotkryli přijomnu sportowu družinu a waža sej wurunanosć konjow. Dźěći, wosebje holcy, wědźa wo jich dobrodušnosći. Měrna ruka trenarki a wobswět skludźatej někotružkuli temperamentnišu krej.
Krótkopowěsće (02.08.17)
Serb mjez kandidatami
Choćebuz/Berlin. K wólbam zwjazkoweho sejma nastupi w Braniborskej lětsa tež Serb. We wólbnym wokrjesu 64 kandiduje Torsten Mak za Die Partei, kaž z krajneje lisćiny strony wuchadźa. Wona ma so za stronu za dźěło, prawniski stat, škit zwěrjatow, spěchowanja elity a bazoweje demokratije. Torsten Mak je bywši wučer Delnjoserbskeho gymnazija a předsyda Rady za serbske naležnosće Braniborskeje.
Přepytuja přećiwo policistam
Budyšin. Po nowych rozestajenjach mjez domoródnymi młodostnymi a požadarjemi azyla wosrjedź Budyšina přepytuja tež přećiwo policistam. Jim wumjetuja w interneće ranjenja a namócnosće, k čemuž je tam wotpowědny widejo wozjewjeny. Zhorjelska policajska direkcija chce k wujasnjenju wšitkich wobdźělenych słyšeć.
Srědki za wutwar interneta
W Brězyny rady do korčmy załožeja
Z małeje přehladki k stajnej wustajeńcy
Ptačecy (HH/SN). Nimale dwaj lětdźesatkaj spřistupnjeja w Šulskej a domizniskej stwě Ptačecy zajimcam něhdyše žiwjenje a šulstwo na serbskej wsy.
Kónčny spurt w knihowni
Budyšin (SN). Něhdźe połsta młodych čitarjow je so w Budyskej dźěćacej a młodźinskej bibliotece za knižne lěćo Sakskeje přizjewiło. Woni mnohostronski poskitk lektury wužiwaja a pilnje čitaja. Hač do 11. awgusta je hišće chwile, so z klubowym čłonom stać. Wulki zakónčacy swjedźeń, hdźež dóstanje kóždy wobdźělnik za tři čitane knihi certifikat, budźe 8. septembra. Wšitcy za knižne lěćo přizjewjeni dóstanu wot biblioteki wosobinske přeprošenje na swjedźeń. Knižne lěćo Sakskeje je prózdninska akcija sakskich zjawnych bibliotekow za zajimcow w starobje jědnaće do 16 lět.
Za tolerancu płuwać
Wojerecy (SN). Město Wojerecy pohosći 30. septembra wobdźělnikow zarjadowanja „Płuwać za demokratiju a tolerancu – Sym pódla“. Iniciator sportoweho zarjadowanja je Swobodny stat Sakska. Kónc julija přepodachu Wojerecam a tamnišemu wyšemu měšćanosće Stefanej Skorje (CDU) pućowanski pokal. „Sym sej wěsty, zo tež lětsa w našim měsće z tohole zarjadowanja we Łužiskej kupjeli jasne znamjo za swobodnu, demokratisku a swětej wotewrjenu towaršnosć wuchadźa“, Skora wuzběhny.
Zornowc haći
Policija (02.08.17)
Wopity dźěsću z nožom hrozył
Wuskidź. K njewšědnemu zasadźenju policije, wohnjoweje wobory a wuchowanskeje słužby dóńdźe wčera we Wuskidźi (Weißkeißel). Najprjedy bě tam 32lětny wopity Libanonjan před domom požadarjow wo azyl maćeri ćěšenka namócnje wutorhnył. Po tym zo bě jeho zaso wróćił, wza sej wosomlětneho hólca a hrožeše jemu z nožom. Wot zastojnikow žadaše sej mjez druhim medikamenty. Krótko na to wón wosomlětneho pušći a wza sej jeho 27lětnu mać jako zastajenču. Po tym zo su jemu sobudźěłaćerjo wuchowanskeje słužby medikamenty dali, wzda so tež žony. Zastojnicy SEK muža přemóchu. Dźěsći a mać dowjezechu do chorownje.
Tež kosu klepać nawuknyli
Dołhoboršćanska přirodoškitna stacija mjez dźěćimi woblubowana
Dołha Boršć (SN/mwe). Annett Hertweck je w Dołhoboršćanskej přirodoškitnej staciji „Wuchodna Hornja Łužica“ za projekty sobu zamołwita. A tajkich bě jich w lětnich prózdninach zaso wjele. Holcam a hólcam tam na přikład pokazachu, kak wowcu třihaja, někotři samo nawuknychu, kak so kosa klepa. We wšěm dźe wo přirodu. Wobźělnicy seminarow a kursow zaběraja so tam z družinami ptakow abo rěča wo tym, što w lěsu rosće a kak měli tam štomy škitać.
„Naša přirodoškitna stacija je jara znata, a to we kaž tež za mjezami Hornjeje Łužicy“, Annett Hertweck hordźe praji. Tak spěchowanske towarstwo tež k šulam, kaž w Radworju, a k wjesnym šulskim domam, kaž w Połpicy, prawidłowne zwiski wudźeržuje. We wobłuku projektow dźěći rady do Dołheje Boršće jědu, zo bychu so tam tež ze starodawnymi rjemjesłami zeznajomili. We wobłuku jednoho projekta pobychu wone njedawno na ekskursiji w Liberecu.
