Starši a kubłarki Čornochołmčanskeje pěstowarnje „Krabat“ žadaja sej za dźěći lěpše rumnostne wuměnjenja. To je Wojerowskeho wyšeho měšćanostu Stefana Skoru (CDU) a wjacorych měšćanskich radźićelow pohnuło, dźěćace zarjadnišćo wopytać.
Čorny Chołmc (AK/SN/MiR). Z wida dźědow a wowkow rysowaše Frank Galle situaciju wobmjezowaneho městna w Čornochołmčanskej pěstowarni „Krabat“, kotraž je w nošerstwje Dobroćelskeho dźěłaćerskeho skutka (AWO) Łužica. „Tu ma so nuznje něšto změnić. Prošu při tym stronske hranicy přewinyć. Financy za to maja być“, rjekny Čornochołmčan. Tuchwilu staraja so w zarjadnišću z 43 městnami wo 37 dźěći w žłobikowej a pěstowarskej starobje. 13 z nich chodźi do žłobika, 24 do pěstowarnje. Jeničce za dobu wot januara do decembra 2018 maja hižo jědnaće přizjewjenjow. Maja tam tež Witaj-skupinu, wo kotruž stara so Silwija Stephanowa, a serbskorěčnu kubłarku Georgiju Kubašowu za chowancow žłobika.