Katastrofa a jeje konsekwency
Běła Woda (AK/SN). Lěsny woheń w meji 1992 pola Běłeje Wody bě jedna z najzahubnišich katastrofow zašłych lětdźesatkow we Łužicy. Tole podšmórny lěsnik a žurnalist Torsten Richter-Zippack z Wjelceje na njedawnym předstajenju swojeje 48stronskeje brošurki „Lěsny woheń – Katastrofa – Běła Woda 1992“. „Płomjenja zničichu tehdy dohromady 920 hektarow lěsa. Sčasami bě murja wohenja hač do wosom kilometrow dołha“, wón rozłoži. Dokładnje 1 034 wohnjowych wobornikow ze 198 jězdźidłami z cyłeje Němskeje je přećiwo płomjenjam wojowało. Jedyn wobornik při tym žiwjenje přisadźi.
Prózdninske lěhwo nětko hotel
Hdźež běchu něhdy dźěći w dowolu, witaja nětko turistow
Kytlice (JuŠ/SN). W lětach wot 1966 do 2004 přebywachu mnohe serbske a němske dźěći Kamjenskeho wokrjesa w lětnich prózdninach w krasnej čěskej krajinje w Kytlicach, hdźež dožiwichu wulkotnej prózdninskej tydźenjej. Nimo wulkeho twarjenja z jědźernju a spanskimi rumnosćemi wabjachu šulerjow 6. do 8. lětnika wosebje małe chaty, stejace před lěsom na wysokim brjoze a skićace dźěćom překrasny wuhlad na wjes a wokolinu. Zajimawe zarjadowanja z čěskimi přećelemi skrućachu přećelske styki mjez nimi. Někotryžkuli dźensa hižo dorosćeny spomina rady na tónle čas a je sej snadź zas tam dojěł. Što pak je z toho dźensa zwostało?
Woda Sprjewje budźe čisćiša
Krótkopowěsće (30.05.17)
Erwin Sellering wotstupił
Schwerin. Ministerski prezident Mecklenburgsko-Předpomorskeje Erwin Sellering (SPD) je strowotniskich přičin dla wšitke zastojnstwa złožił. Tole zdźěla statna kenclija w Schwerinje. Přičina je dospołnje njejapcy zwěsćeny rak lymfowych žałzow. Za swoju naslědnicu je Sellering zwjazkowu swójbnu ministerku Manuelu Schwesig namjetował.
Dešć woheń zhašał
Choćebuz. Ćežke njewjedro je dźensa wulki woheń w Luboraskej holi sewjernje Choćebuza zhašało. To zdźěla braniborske nutřkowne ministerstwo. Sylne zliwki běchu płomjenja zhašeli. Woheń bě wčera na něhdyšim wojerskim zwučowanišću wudyrił a so spěšnje rozšěrił. Wobornicy pak njesmědźachu stareje municije dla na teren.
Thomas Tuchel woteńdźe
Dortmund. Borussia Dortmund je swojeho trenarja Thomasa Tuchela pušćiła. Jeničce tři dny po dobyću pokala DFB informowaše Tuchel dźensa přez Twitter wo kóncu zhromadneho dźěła z koparskim ligistom. „Sym dźakowny za dwě rjanej lěće połnej dožiwjenjow a rjanych podawkow. Škoda, zo to dale njeńdźe. Přeju klubej wšo dobre.“
Móhło wjace być
Mejski swjedźeń w pěstowarni
Po mejemjetanju zhromadnje wjele spěwali
Hórki (KJu/SN). Štóž je sobotu popołdnju přez Hórki jěł, měješe zaćišć, zo bě cyła wjes na nohach. Tójšto ludźi bě přichwatało na mejemjetanje, kotrež zahajichu popołdnju w swjedźenskim stanje z kofejom a tykancom a pisanym programom wjesnych dźěći. Wone běchu do toho mały program nazwučowali, w kotrymž móžeše kóždy na instrumenće abo na hinaše wašnje swoje talenty pokazać. Nowosć bě, zo steješe stan lětsa prěni raz při wohnjowobornej gratowni. Wottam ćehnjechu wšitcy zhromadnje k meji wosrjedź wsy.
Při napřemoběhu dźěći wo wjeršk bě Pascal Wehnert najspěšniši a wuzwoli sej Sophie Matješkec za swoju kralownu. Mejski kral młodźiny bě Chrystof Sćapan, jeho kralowna Rebecca Wjenkec. Po tym ćehnjechu pory młodostnych – dohromady bě jich sydom a holcy běchu narodnu drastu woblečene – kaž tež dźěći k stanej, hdźež sej zarejowachu.
Policija (29.05.17)
Žiwy płót so palił
Pančicy-Kukow. Jenož krótki puć mějachu dobrowólni wobornicy Pančic-Kukowa, jako jich minjeny pjatk wječor k hašenju wołachu. Na Dróze Ćišinskeho blisko tankownje bě 46lětny wobydler njerodź z pomocu płunoweho palaka wotstronił. Při tym so suche hałzy žiweho płota zapalichu, tak zo so płomjenja po dołhosći jědnaće metrow rozpřestrěchu. Muž a jeho 14lětna dźowka spytaštaj je podusyć, při čimž so holca snadnje zrani. Wobornicy přijědźechu z třomi jězdźidłami a cyłkownje 16 kameradami, kotřiž mějachu woheń spěšnje pod kontrolu. Wěcnu škodu trochuja na něhdźe 3 000 eurow.
Lěsna kupjel nětko zaso přistupna
Dobru zhromadnosć hajili
Skupina Serbska murja zabawny spěwny wječor organizowała
Jaseńca (BW/SN). Młódne hłosy serbskich holcow a hólcow běchu sobotu wječor z Jasčanskeho kulturneho domu „Bjesada“ słyšeć. Tam bě skupina Serbska murja na zabawny spěwny wječor přeprosyła. Něhdźe połsta młodostnych z Pančic-Kukowa, Chrósćic, Noweje Wjeski a mnohich druhich kónčin bě přišło, tak zo je so tele wočakowanje spjelniło, rjekny jedyn z hłownych organizatorow Pětr Dźisławk z Chasowa.
