Pančicy-Kukow (SN/JaW). Cistercienski klóšter Marijina hwězda w Pančicach-Kukowje ma nowu abatisu. To zdźěla klóšter na swojej internetnej stronje. Tak wotpowěduje konwent postajenju generalneho abta cisterciensow Maura-Giuseppy Leporija, po lěće přechoda nawodnistwo klóštra znowa wobsadźić.
Sotry konwenta su wčera popołdnju pod nawodom generalneho abta Leporija Gabrielu Hesse za nowu načolnicu wuzwolili. Generalny abt ju w zastojnstwje wobkrući, dowěrjejo jej nawodnistwo klóštra. Sotra Gabriela je 44. abatisa a naslěduje Philippu Kraft, kotraž bě loni w aprylu načolnistwo klóštra po pjeć lětach skutkowanja jako nawodnica złožiła a zdobom rjad cistercienskow cyle wopušćiła.
