Masterske dźěło gmejnskej radźe wuchadźišćo, lěpje dźěłać

Njebjelčicy (JK/SN). K wažnym dopóznaćam z wědomostneho dźěła absolwentki Rostockskeje uniwersity Heike Ungar za swoje­ komunalne dźěło dóńdźechu Njebjelčanscy gmejnscy radźićeljo na swojim wčerawšim posedźenju w gratowni Pěskečanskeje wohnjoweje wobory. Młoda žona bě so na přikładźe gmejny Njebjelčicy z temu rozestajała, kak móža lokalne struktury wuknjenske procesy na dobro dołhodobneho wuwića wob­wliwować. Při tym wona dopózna, zo su komunikacija, wosebje pak forma a intensita bjezposrědnjeje informacije wažne zakłady, wobydlerjow gmejny zahorić­ za jeje zaměry a za to, myslić a skutkować na dobro swojeje wsy.

Z toho wuchadźejo gmejnscy radźi­ćeljo a wjesnjanosta Tomaš Čornak (CDU) nastorčichu rozmyslować, w kotrej formje hodźa so wobydlerjo gmejny hišće­ lěpje a dokładnišo wo zaměrach a předewzaćach gmejny informować. Wo tym chcedźa na přichodnych posedźenjach dale wuradźować. Tohodla maja­ so posedźenja gmejnskeje rady dale we wšěch wsach gmejny wotměwać.

Sakske ministerstwo za wobswět a ratarstwo kaž tež Budyski krajnoradny zarjad­ stej wčera w Rakecach přewje­dłoj informaciske zarjadowanje wo wjelkach­ a jich wuskutkach a stej tak tójšto zajimcow přiwabiłoj.

Rakecy (aha/SN). „Wjelk w Sakskej a w Budyskim wokrjesu“ rěkaše tema, kotraž wčera w Rakecach wjace hač 60 wopytowarjow přiwabi. W dlěje hač tři hodźiny trajacej diskusiji měješe přirjadnica ­Budyskeho krajneho rady Birgit Weber jako moderatorka nuzu, na zdźěla njewěcowne a zwjetša emocionalne měnjenja reagować. Hižo w swojich zawodnych słowach, „zo dźe wo to, informaciski ­deficit w ludnosći nastupajo rosćacy wobstatk škitaneje rubježneje zwěriny a z nim přiběrace konflikty mjez plahowarjemi kozow a wowcow wottwarić“, měješe so wona z nutřwołanjom wot­namakać. Bernd Dankert z ratarskeho a wobswětoweho ministerstwa rozłoži ­žadanja managementoweho plana za škit wjelkow a za pomjeńšenje škodow přez njeho.

Hinak hač zarjadnistwo města Budyšina žada sej měšćanska rada, wo kupjenju „Króny“ jednać započeć. To ma so tež z widom na měšćanske wuwiće stać, kaž rěkaše na wčerawšim posedźenju radźićelow.

Budyšin (CK/SN). Budyska bydlenjotwarska towaršnosć (BWB) měła z Berlinskej předewzaćelskej skupinu Onnasch jednanja wo kupje měšćanskeje hale „Króna“ a susodneho parkowanišća zahajić a při tym aspekty hospodarskosće a měšćanskeho planowanja wobkedźbować. Wjetšina radźićelow je wčera wobzamknyła, zo ma wyši měšćanosta Alexander Ahrens (SPD) na přichodnej zhromadźi- znje towaršnikow BWB tajke wobzamknjenje zapodać.

Wospjetuja mate-pruwowanje

Podstupim. Misnjenja šulskeho zarjadnistwa dla chce 2 580 šulerjow w Braniborskej 12. junija maturitne pruwowanje w matematice hišće raz pisać. Tak něhdźe 42 procentow wšěch šulerjow tónle poskitk wužiwa, kubłanske ministerstwo dźensa zdźěli. Šulerjo běchu so po prěnim pruwowanju hóršili, zo dyrbjachu nadawki wuličić, kotrež njeběchu we wučbje scyła wobjednawali.

Tramwajki zaso jězdźa

Choćebuz. Tramwajki w Choćebuzu zaso jězdźa. Tole zdźěli rěčnica měšćanskeho wobchadneho předewzaća. Zasadźenje wohnjoweje wobory bě wobchad nadróžnych dźensa rano zlemiło, jako dyrbjachu milinu wotpinyć. Tak njemóžachu tramwajki depot wopušćić. Při wohenju w bydlenju na Karlowej bě wosoba zemrěła.

Zwučowanska chorownja