Na lodźe zapadnjenych wuchowali
Pěstowarni insektowy hotel darili
Njebjelčicy (SN/MWj). Tak mjenowany insektowy hotel maja nětko w Njebjelčanskej pěstowarni „Jan Skala – Barbojte kamuški“. Tón pak sej holcy a hólcy kupili njejsu, ale dóstachu jón dźensa dopołdnja darjeny.
Darićeljo, požadarjo azyla, su zapřijeći do projekta Kamjenskeje kubłanskeje towaršnosće (KABI) w Njebjelčanskej socialnej dźěłarni na kromje wsy. Po tym zo je tam wobšěrny projekt z dołhodobnje bjezdźěłnymi wuběžał, dósta KABI spěchowanske srědki přizwolene, zo móža w Njebjelčicach dźesać migrantow rěčnje wukubłać a jim tež praktiske dźěło zmóžnić. Tak woni jenož němsku rěč njewuknu, ale tež insektowe hotele twarja. „Runočasnje chcychmy jich dalokož móžno do našeje gmejny integrować a jim filozofiju našeje wsy zbližić, štož wšak rěčnje cyle jednore njebě“, rozłoži Njebjelčanski wjesnjanosta Tomaš Čornak (CDU). Zrodźichu tuž ideju, pěstowarskim dźěćom tajki hotel darić a tak dźěl wsy bliže zeznać.
Dalše socialne poradźowanje
Budyšin. Wulkeho naprašowanja zawčerawšim dla poskići zapósłanc Sakskeho krajneho sejma Hajko Kozel (Lěwica) štwórtk, 19. januara, dalše socialne poradźowanje w swojim Budyskim běrowje na Šulerskej 10. Zhromadnje z Gregorom Janikom, w socialnym prawje wosebje wobhonjenym prawiznikom, pomha wón problemy rozrisać, kotrež so často w socialnych prašenjach jewja, wosebje nastupajo Hartz IV. Poradźowanje wotměje so wot 13.30 do 17 hodź. a je tež w serbskej rěči móžne. Wosobinski termin dojednać móža sej zajimcy pod telefonowym čisłom 03591/ 31 89 904.
Towarstwo přeproša
Worklecy. Towarstwo Worklečanskeje kapałki Marije maćerje Božeje přeproša wutrobnje swojich sobustawow kaž tež wšěch dalšich, kotřiž so kołowokoło kapałki wo čistotu, wupyšenje, wobrubjenje a zaručenje Božich mšow a duchowneho žiwjenja staraja, na zhromadny wječor wutoru, 17. januara, na žurlu maltezow we Worklecach. Započatk je ze zhromadnym róžowcom we 18 hodź. w kapałce.
Policija (13.01.17)
Šofera zajeli
Horni Wujězd. Wichor a sněh stej srjedu nawječor policiji pomhałoj muža zajeć, za kotrymž w Sewjerorynsko-Westfalskej pytachu. 45lětny bě z nakładnym awtom na awtodróze A 4 pola Hornjeho Wujězda w sněze tčacy wostał, na čož wón policiju wołaše a wo pomoc prošeše. Zastojnicy jeho personalije na městnje přepruwowachu a zwěsćichu, zo Sewjerorynsko-westfalski krajny kriminalny zarjad za mužom z třomi wukazami zajeća pyta. Překwapjeneho wodźerja Lkw-ja policisća zajachu a do jastwa dowjezechu. Z awtom dyrbješe druhi šofer dale jěć.
Hrjebju chcedźa lětsa ponowić
Gmejna Dźěwin (Groß Düben) ma za lětsa a klětu dwójny etat, čehoždla móža dołhodobnišo planować. Za lětsa pak maja jenož jeničku wjetšu twarsku naprawu předwidźanu.
Brězowka (AK/SN). Najebać swoje ćežke pjenježne połoženje chce Dźěwinska gmejna jednanjakmana wostać. Tole podšmórny wjesnjanosta Helmut Krawc (SPD) na wčerawšim posedźenju gmejnskich radźićelow. Po intensiwnym wuradźowanju wobzamknychu woni z třomi wzdatymi hłosami dwójny etat 2017/2018. Jenička wjetša naprawa lětsa je, ponowić hrjebju wot Brězowskeho přemysłownišća do směra na Trjebin. Za to planuja 100 000 eurow. Trochu wjace hač połojcu dóstanu z programa „Mosty do přichoda“ spěchowane. Zbytk zapłaći komuna jako swójski podźěl.
Korčmy bjez kucharjow
Štó by sej to myslił, zo Slepjanski hosćenc „K hadźacej krónje“ k silwestrej zawru a zo njebudu tež pola Krawcec w Janšojcach najprjedy hižo słódny wobjed warić. Mrěće korčmow pak njeje ničo nowe. Jědźeš-li po Łužicy, nańdźeš dale a wjac wopušćenych abo samo rozpadowacych žurlow a hosćencow. A tam, hdźež so hišće swěca swěći, zwjetša swójbni korčmarjeja a sej mjez sobu pomhaja. Kelko hosćencarjow pak dźensa personal pyta a praweho kucharja tež namaka, to móžeš sej na pjeć porstach wuličić: lědma štó. Dołhe nocy drje su na rejach rjane, ale nic za kucharja a pinčnikow, a předewšěm kónc tydźenja! Tež w Slepom budźe zawěsće poměrnje ćežko, noweho hosćencarja namakać. Často zbywa jenička zastaranska alternatiwa cateringow, kotrež ći jědźe a napoje domoj přiwjezu.
Měrćin Weclich
Krótkopowěsće (12.01.17)
Kopańce w sydlenskim rumje
Podstupim. Gmejna Kopańce (Neuhausen) přisłuša serbskemu sydlenskemu rumej. To je hłowny wuběrk Krajneho sejma Braniborskeje na swojim wčerawšim posedźenju wobzamknył. Přirjadowanje Carneho Gozda (Schwarzheide) a Šejkowa (Schipkau) pak wuběrkownicy wotpozakachu. Wo dalšich 16 próstwach njejsu hišće rozsudźili.
Wobchad sněha dla haćeny był
Lipsk. W Sakskej, Saksko-Anhaltskej a Durinskej bě nadróžny wobchad minjenu nóc sněha a zalodźenych dróhow dla haćeny. W Kamjenicy a wokolinje zličichu 93 wobchadnych njezbožow ze 168 wobdźělenymi jězdźidłami. Tež we wuchodnej Sakskej dóńdźe k wjacorym njezbožam. Wokoło Zhorjelca su někotre awta z hładkeho puća do přirowa zjěli.
Wojerski konwoj we Łužicy
Wochozy. Konwoj armeje USA je wčera na Wochožanske wojerske zwučowanišćo dojěł. Něhdźe 40 wojakow tam zaměstnichu a zastarachu, kaž Zwjazkowa wobora zdźěla. Dźensa chcychu do Pólskeje jěć. Wojacy su dźěl 4 000 wojakow sylneje jednotki wójska USA, kotrež je tuchwilu po puću z Bremerhavena do srjedźneje a wuchodneje Europy.
Policija (12.01.17)
Pytaja swědkow
Budyšin. K wobchadnemu njezbožu, kotrež je so póndźelu w 14.45 hodź. w Budyšinje stało, pyta policija swědkow. Dotal njeznata wosoba bě z čerwjenym awtom z Mužakowskeje naprawo na Flincowu wotbočiła. Runje w tym wokomiku 25lětna žona Flincowu přeprěči, tak zo awto do njeje zajědźe. Młoda žona suny so přez motorowu hawbu a padny. Šofer/ka so zminy, bjez toho zo by so jako wodźer/ka wo snadnje zranjenu pěšku starał/a. Kriminalna słužba Budyskeho policajskeho rewěra pad přepytuje a pyta swědkow, kotřiž su njezbožo wobkedźbowali abo móža pokiwy k šoferej abo šoferce dać. Swědcy njech přizjewja so w Budyskim policajskim rewěrje pod telefonowym čisłom 03591/ 35 60.
Zymska słužba derje dźěłała
Chcedźa spěšny internet
Hamor (AK/SN). Po cyłym swojim teritoriju chce Hamorska gmejna šěrokopasmowu syć na moderny standard wutwarić a wšitke wjesne dźěle ze škleńčnej niću zwjazać. Jenož we wuwzaćnych padach budu koporowy kabl wužiwać. To su gmejnscy radźićeljo na swojim zašłym posedźenju w Hamoru jednohłósnje wobzamknyli.
„Wužiwamy-li škleńčnu nić, móžemy lěpje na dalše techniske wuwiće reagować. Z koporowym kablom je jeničce spěšnosć hač do 100 megabitow na sekundu móžna. Nowa technika porno tomu dowola hač do 200 megabitow na sekundu“, rozłoži nawoda gmejnskeho hłowneho zarjada Arian Leffs radźićelam. Z techniku škleńčneje niće chce so gmejna Hamor wot wšeho spočatka na moderny standard nastajić, tež hdyž je tón wězo dróši. Dohromady ma wutwar šěrokopasmoweje syće w gmejnje 13,5 milionow eurow płaćić. Z toho ma komuna dźesać procentow swójskeho podźěla přewzać. Přez Zhorjelski wokrjes staji tuž próstwu wo spěchowanje, kotrež ma hač do 90 procentow wučinjeć.
