Jubilej ma město zwjazać
Wojerecy (AK/SN). Hódnje a mnohostronsce chce město Wojerecy klětu 750. róčnicu prěnjeho naspomnjenja swjećić. „Chcemy wobydlerjow runje tak zapřijeć kaž towarstwa, organizacije a předewzaća“, podšmórny minjeny pjatk socialny měšćanosta Thomas Delling, kiž nawjeduje dźěłowu skupinu „750 lět Wojerecy“. Jubilej złožuje so na 1. meju 1268. Tehdy podpisa markhrabja Otto von Brandenburg dźělenje Hornjeje Łužicy do Budyskeho a Zhorjelskeho kraja. Woběmaj přidźěli wón dźěl Wojerowskeho knjejstwa.
Za jubilej planuja 200 000 eurow. W septembru 2018 chcedźa swjedźenski tydźeń wotměć, rozłoži Thomas Delling. „Wažne při tym je stare a nowe město zwjazać.“ Wón móhł sej symbolisku časowu pruhu předstajić, kotraž saha wot stareho torhošća nimo hrodu hač k Łužiskemu naměstu. Na tejle pruze móhli najwažniše mězniki stawiznow na markantnych dypkach zwobraznić. Kónc oktobra chce Delling hruby koncept jubileja předstajić. We Wojerecach swjeća klětu nimo toho 120lětne wobstaće chorownje, 70lětne wobstaće ludoweje uniwersity, wotewrjenje kupnicy Centrum před 50 lětami a 650lětne wobstaće Kinajchta.
Wjesnu zhromadnosć skrućili
Róžant (JK/SN). Hdyž maja druhdźe na wjesnych swjedźenjach pisane programy a wulke zarjadowanja, spokojeja so Róžeńčenjo z něšto mjeńšimi atrakcijemi. Wažne je, zo maja něšto ze zhromadneho swjećenja. A tomu na lětušim bjezdwěla tak bě. Hižo pjatkowne zahajenje wopokaza so jako jara spomóžne, byrnjež wopytowarjo zdźěla hakle w połnocy přišli.
Sobota steješe w znamjenju sporta. Na beachvolleyballowym turněrje, kotryž bě za mustwa wokolnych wsow předwidźany, wobdźělichu so tež sportowcy z Kamjenca. Jako dobyćerja móžeše sobuorganizator Jurij Bjeńš počesćić mustwo „Volker Rachow“ z Worklec. Paralelnje k tomu kopachu bul na dartowu sćěnu. Najwuspěšniši bě tu na kóncu Kamjenčan. Wječor so něšto mjenje hosći do Róžanta na „čorny lód“ namaka. Přiwšěm běchu organizatorojo wokoło Bena Šołty, Jurja Bjeńša a Markusa Kobalca z wothłosom spokojom.
Policija (14.08.17)
W stanje wosrjedź lěsa bydlił
Wojerecy. Dokelž běchu so njeznaći minjeny čas do wjacorych bungalowow Wojerowskeho zahrodnišća „Wjesoły přichod“ zadobyli, je so policija sobotu nawječor w bliskim lěsu trochu dokładnišo rozhladowała. Při tym zwěsćichu tam 35lětneho muža, kiž wosrjedź lěsa w stanje bydleše. Pola njeho namakachu wšelake wěcy, pochadźace ze zadobywanjow. Nimo toho so wukopa, zo hižo dlěši čas za 35lětnym pytaja. Kriminalna policija je pad přewzała a jón nětko přepytuje. Hač jedna so wo bjezdomneho abo hač so muž w stanje chowaše, njeje znate.
Budźe twarić luksus?
Přebywanje w měsće zakazali
Budyšin (SN). Přećiwo dorosćenemu požadarjej azyla je Budyske měšćanske zarjadnistwo w přezjednosći z policiju třiměsačny zakaz přebywanja za dospołny teritorij města Budyšina wuprajiło. Zakaz płaći wot dźensnišeho, kaž z nowinskeje zdźělenki z radnicy wuchadźa. Přičina je wurjadne nakopjenje chłostajomnych njeskutkow w krótkim času, tež w zwisku z podawkami na Žitnych wikach. Po rešeršach SN jedna so wo libyskeho požadarja azyla, kotrehož njeje Budyski krajnoradny zarjad druhdźe w Sakskej zaměstnić móhł.
Po słowach Budyskeho wyšeho měšćanosty Alexandera Ahrensa (SPD) „je naš nadawk, so raznje přećiwo kóždemu wobarać, kiž ze swojim jednanjom měrliwu zhromadnosć w našim měsće wohrožuje. Tole płaći za wšě wosoby, njehladajo jich pochad abo politisku zmyslenosć“.
Njeje wuzamknjene, zo město přećiwo dalšim wosobam tajki zakaz přebywanja wupraja, rěka z radnicy. Połoženje stracha město a policija stajnje znowa pohódnoćatej.
Krótkopowěsće (11.08.17)
38. městno docpěli
Sernjany. We wobłuku hrajkanišćoweje iniciatiwy limonadoweje marki Fanta je skupina Sernjanskich staršich z wčerawšim zakónčenjom akcije docpěła 38. městno. Dohromady dóstachu 3 494 hłosow, tak zo móžachu so zašłej dnjej hišće wo dwě městnje polěpšić. Jako myto kiwa jim 1 250 eurow, z kotrymiž chcedźa Sernjanske hrajkanišćo porjeńšić.
Štom ministerku zranił
Podstupim. Braniborska socialna ministerka Diana Golze (Lěwica) je so w swojim dowolu ćežko zraniła, jako štom na nju padny. Njezbožo sta so wčera popołdnju při njewjedru na stanowanišću w sewjernej Italskej, rěčnica ministerstwa zdźěli. Ministerku su na to w chorowni hnydom operowali. Mjeztym pak je staciju intensiwneho hladanja wopušćiła.
Sprjewiny hotel nowy centrum
Lisćiki za jubilej
Chrósćicy. Serbska lajska dźiwadłowa skupina Chrósćicy swjeći lětsa swój 40lětny jubilej załoženja. Jubilejny swjedźeń wotměje so sobotu, 2. septembra, we 18 hodź. w Chróšćanskej „Jednoće“. Tam budźe premjera noweje dźiwadłoweje hry. Mjez hosćimi budźetej chór Lipa a skupina něhdyšich rejwarjow z Wudworja. K rejam zapiska kapała Logarhythmus. Zastupne lisćiki dóstanu zajimcy we wobchodźe časnikarja Jürgena Njeka w Chrósćicach.
Na wjesny swjedźeń
Róžant. Z natočenjom piwa a jednoeurowej party započnje so dźensa wječor Róžeńčanski wjesny swjedźeń. Jutře popołdnju změja zaběry za dźěći a beachvolleyballowy turněr, wječor slěduje black ice-party z hudźbu za młódšich a staršich. Njedźelu popołdnju swjedźeń z kofejom a tykancom wuklinči.
Paruja informacije wo twarnišću
Pančicy-Kukow (SN/MWj). Byrnjež na dnjowym porjedźe njestało, je twarnišćo na statnej dróze S 100 w Pančicach-Kukowje wčera najwjetši dźěl časa posedźenja tamnišeje gmejnskeje rady we Wotrowskej starej šuli zabrało. Při tym wjesnjanosta Markus Kreuz (CDU) runje tak kaž wjacori radźićeljo porokowachu, zo wot krajneho zarjada za dróhotwar a wobchad (LASuV) přemało informacijow wo twarskim stawje a přichodnych krokach na twarnišću dóstawaja. Tak je gmejna před tydźenjemi hakle cyle krótkodobnje zhoniła, zo ma so wotrězk wot tankownje hač ke kupnicy Netto ponowić. W kupnicy samej pak bě to po wšěm zdaću znate.
Policija (11.08.17)
Při dwórnišću traktor skóncowali
Radwor. Po wšěm zdaću wulki lóšt na ryzy kóncowanje mějachu w nocy na srjedu njeznaći při Radworskim dwórnišću. Tam přerězachu při traktoru wjacore kable a nimo toho wolijowu a dieselowu hadźicu. Skónčnje wotklumpachu hišće dźesać litrow ćěriwa, tak zo nasta něhdźe 200 eurow škody. Dale łamachu so na samsnym městnje do kólnje a wzachu z njeje dwě něhdźe 30 lět starej powětrowce w hódnoće 80 eurow sobu.
Móža nowu techniku kupić
Chróšćanska gmejnska rada po lětnej přestawce zaso wuradźowała
Hórki (JK/SN). Zo móhła komunalne nadawki kaž dotal derje a spušćomnje spjelnić, trjeba Chróšćanska gmejna nowe jězdźidło. Dotal wužiwany Multicar je přestarjeny a nowy TÜV by sej žadał wulku reparaturu. Tohodla běchu so radźićeljo na to dojednali, kupić nowe jězdźidło, z kotrymž móhł gmejnski dźěłaćer Beno Wjenk dale porjadnje dźěłać. Při financowanju pomhaše takrjec nošer pěstowarnje, Serbske šulske towarstwo. Po wotličenju zawodnych kóštow a perspektiwiskej kalkulaciji so wukopa, zo budźe gmejnski podźěl za pěstowarnju lětsa wo nimale 22 000 eurow niši hač planowany. Tuž móža trjebany Multicar za 6 500 eurow kupić. Tón ma jara dobre techniske wuhotowanje a hodźi so tež za nadawki w zymskej słužbje zasadźić.
