při twarnišću
Z karu twory do wobchoda wozy
Nowy móst nad Klóšterskej wodu a wutwar statneje dróhi S 100 w Pančicach-Kukowje stej tuchwilu z wotstawkom najwjetše nadróžne twarnišćo w dwurěčnych gmejnach. Z tejle seriju twarnišćo přewodźamy a wobswětlamy starosće tamnišich wobydlerjow.
Łužiski „Paproć“ do Čěskeje
Njebjelčicy a Heřmanice skrućeja partnerstwo z pomocu wuměłstwa
Njebjelčicy/Heřmanice (SN/MiR). Partnerstwo mjez łužiskimi Njebjelčicami a čěskimi Heřmanicami chcedźa 18. awgusta z njewšědnej akciju skrućić. Na transporteru změje Njebjelčanski wjesnjanosta Tomaš Čornak (CDU) dalšich wjesnjanow, wuměłca Thomasa Birku a jeho twórbu. Z wulkeho kamjenja z łužiskeho zornowca je Drježdźanjan rostlinu wudypał. Jeho twórba rěka „Paproć“ a ma přichodnje na Heřmaničanskim torhošću stać.
Thomas Birke bě swoje wuměłske dźěło před lětomaj w Miłočanskej skale Při Krabatowym kamjenju zhotowił. Hižo tehdy bě Heřmaničanski wjesnjanosta Vladimír Stříbrný twórbu wobdźiwał. A nětko je jasne, zo paproć z kamjenja do Heřmanic dowjezu. Wšako tež w čěskej partnerskej gmejnje hižo 15 lět rězbarja. Kaž w Njebjelčicach dźěłaja tam regionalni wuměłcy předewšěm na twórbach z drjewa, byrnjež Heřmanice tohorunja zornowcowe składźišća měli.
Čiłe partnerstwo
Krótkopowěsće (28.07.17)
Lětanišćo ma nowu dowolnosć
Budyšin. Klukšanske lětanišćo wostanje dale centrum płujadłow. Sakska krajna direkcija je lětanišću nowu zawodnu dowolnsć spožčiła, po tym zo běchu zamołwići w Klukšu po noworjadowanju ležownosćow wotpowědnu próstwu zapodali. Při přerjadowanju běchu mjez druhim pistu za start a přizemjenje płujadłow dale na juh přepołožili.
Z płotom přećiwo mrětwje
Praha. Čěska republika chce z nowymi naprawami dalšemu rozšěrjenju afriskeje swinjaceje mrětwy zadźěwać. Tuchwilu wo tym rozmysluja, potrjechenu kónčinu z płotom wobdać, zo njemóhli so dźiwje swinje do druhich kónčin dóstać, kaž čěski minister za ratarstwo Marian Jurečka powěsćerni dpa rjekny. Dotal maja tam 40 wobkrućenych padow mrětwy.
Po dešćiku přińdźe horcota
Lipsk. Po dešćikojtym wjedrje minjenych dnjow so lěćo znajmjeńša zdźěla nawróći. Kónc tydźenja móhło hač do 29 stopnjow ćopło być, Němska wjedrarnja w Lipsku wěšći. W tym zwisku dóńdźe z městnami k šwihelam a sylnym njewjedram. Spočatk tydźenja horcota z hač do 31 stopnjemi dale přiběra.
Bože puće su wšelakore
Krótkopowěsće (27.07.17)
Wo Solarworld wuradźowali
Drježdźany. Hospodarski wuběrk Sakskeho krajneho sejma je so dźensa wurjadnje schadźował, zo by wo přichodźe insolwentneho twarca solarnych připrawow Solarworld wuradźował. Opozicija sej žada, zo měła Sakska móžnosće statneje financneje podpěry pruwować. W Freibergskej tworni předewzaća dźěła na wšě tysac ludźi.
Dealerow zajeli
Drježdźany. Policija je wčera we wobłuku wulkozasadźenja před Drježdźanskim Hłownym dwórnišćom pjeć muži wikowanja z drogami dla zajała. Dweju z nich su hišće samsny dźeń sudnikej předstajili, kaž policija informuje. Sydom kupcam drogow wupisachu skóržbu. Na akciji wobdźěli so nimale połsta zastojnikow. Woni sćazachu 60 gramow hašiša.
Plahuja dźiwje konje
Ludźi k angažementej pozbudźeć
Běła Woda (AK/SN). Z rjadom mjeńšich projektow – spěchowane ze srědkami Zwjazka a EU – chce město Běła Woda wobydlerjow zaměrnje k sylnišemu angažementej pozbudźeć. Tole wuzběhny tamniši wyši měšćanosta Torsten Pötzsch (Klartext) na minjenej wobydlerskej zhromadźiznje. Wjac hač 40 zajimcow bě k tomu na žurlu bywšeje škleńčernje Telux přišło.
Policija (27.07.17)
Konjej po jězdni běhałoj
Jitk. Wčera rano je na statnej dróze S 101 k njezbožu z konjom dóšło. Kaž policija zdźěla, bě so 31lětny šofer Golfa chětro nastróžił, jako steješe rano w pjećich w Jitku nadobo kóń před nim na jězdni. Wodźer awta drje spyta so wuwinyć, zrazy pak do dalšeho swobodnje běhaceho konja. Krótko na to běchu policisća a wobsedźerka na městnje a zwěsćichu, zo njeběchu konjej kaž tež šofer na zbožo zranjeni. Na awće nasta škoda 2 000 eurow.
Dobra powěsć šoferam
Budyšin (SN/JaW). Wot jutřišeho móža šeforojo zaso po Mosće měra do sprjewineho města jěć. Kaž Budyske měšćanske zarjadnistwo zdźěla, jón jutře w 9 hodź. zaso za wobchad wotewru.
Prěnje kročele
Slepo. Swoje „prěnje kročele“ předstaja molerka Manula Mohr z Běłeje Wody wot pjatka, 28. julija, we wustajeńcy Serbskeho kulturneho centruma Slepo. Přehladku „Moje prěnje kročele“ wotewru jutře we 18 hodź. z lawdaciju Jörga Tauscha z Rownoho.
Z kapsnej lampu po měsće
Kamjenc. Swójbnu ekskursiju zarjaduje Kamjenski Muzej zapadneje Łužicy jutře, pjatk. Arndt Hochrein wozmje zajimcow wot 19.30 hodź. pod hesłom „Njetopyrje – hońtwjerjo nocy“ sobu na pućowanje z kapsnej lampu po Lessingowym měsće.
Njewočakowana wotmołwa
Balon serbskeho ewangelskeho domizniskeho dnja hač do Alpow dolećał
Sprjejcy (AK/SN). Něhdźe sto balonow w serbskich barbach su wobdźělnicy lětušeho 10. serbskeho ewangelskeho domizniskeho dnja 18. junija w Nowym Měsće k njebju pušćili. Přičinjene mějachu wone kartu z próstwu w serbskej a němskej rěči so přizjewić a bibliskim hrónčkom „Chrystus rěči: Pójće ke mni, kiž sće sprócni a wobćeženi, ja was wokřeju“. „Je to zmužitosć spožčace hrónčko z hłubokej powěsću“, podpšmórnje Jörg Michel, wot lěta 2010 farar Sprjejčanskeje wosady, hladajo na minjeny domizniski dźeń.
Nětko je duchowny njewočakowano póštu z Awstriskeje dóstał. Přizjewił je so ratar, lěsnik a hońtwjer Josef Aschauer ze wsy Scheffau w Tennen-horinach. Wjes je něhdźe 40 kilometrow wot Salzburga zdalena. 19. junija rano bě Aschauer z wnučkomaj Annu a Katharinu balon našoł, kotryž běchu dźeń do toho w Nowym Měsće do powětra pušćili. „Běchmy překwapjeni, předewšěm zdalenosće dla, kotruž bě balon w tak krótkim času přeprěčił. Rěčimy wo 700 kilometrach“, powěda ratar. Zhromadnje sej prajichu, zo wróćo pisaja.
